vrhmachhuana.blogspot.com

KHAWTLANG NUN SIAM THAT (REFORMATION OF SOCIAL LIFE)

2011-08-03T03:31:00.000-07:00

Kan thupui “Khawtlang Nun Siam that (Reformation of Social Life)” hi kum 1994 khan CYMA General Conference Mamit a neih chuan a lo puang tawh a. Chumi hnu 1995 kuma General Conference Lungleia neih khan a lo puang nawn leh tawh bawk a. Tun hnai 2009 CYMA General Conference Darlawna neih chuan thupui atan a thlang leh in, nikum 2010 a Lunglei khawpui a Conference in 2010-2011 chhung thupui atan a thlang nawn leh ta a. Chutiangin CYMA in inkaihhruaina fel tak nen he kumpuan hi hmang turin min beisei a.

Inkaihhruaina dan a siam atang te hian kumpuan tih hlawhtlinna bul in tanna pawimawh ber a ka hriat chu CHHUNGKUA ah a ni tih hi ka hmu chiang in ka in hria. Kan inkaihhruaina in min beisei ruihhlo do mai bakah hian midangte phurrit siam lo turte in min duh a. Kut tling lova thil nei lo turte in min duh a. Mipat hmeichhiatna hman khawlohna laka inthiarfihlim turtein min duh bawk a. Heng kan sawi tak kaihhruainate a ler atanga beih chuan khawlaia duty nilen thak thak pawh hian a hlawhtlinna hi beisei asang vak lo thei a. Chuvangin CHHUNGKUA atanga bul kan tan erawh chuan tam tak hi chu kan sukiang thei dawn a ni.

Kumpuan inkaihhruaina then hnihna in min beisei angin Mizo nun zemawi leh nunphung tha te ngaihlu a chhawm nun te, Khua leh tui tha nih te, Mahni theuh Intodelh leh taimak te, Ngaihhlut tur thlan thiam te, Zirna leh thiamna kawnga rual el te, Khawtlang, ram leh hnam hmangaihna thinlung neih te pawh hi ngun taka han chhut chuan CHHUNGKUA bawk a bul tan fuh hi kei chuan ka la rawn cheu a ni. Chuvangin kan kumpuan thupui “Khawtlang Nun Siam that (Reformation of Social Life)” a hlawhtlin tak tak na tur chuan hawh u chhungkuaah theuh bul i tan ang u.

Hetih mek lai hian kan khawtlang a lo nawm a, tihfelloha awm tawhte nunkawng dik an zawh leh theih nana CYMA in 27th June - 9th July, 2011 chhung a Ruihhlo ngaite leh Hmeichhe rahbi tleu tawhte Chhandamna Camping Krista Hnungzuitute Tawngtai Bethel Camping Centre, Chawnpui buatsaih chu a kal mek a.

He Camping- neih mekah hian Campers 498 (Mipa 392 leh Hmeichhia 106) an lut a(src -http://centralyma.org.in) Speaker atan Lalsanglura Ralte, Sons of God Ministry chu hman a ni. He Camping hi a hlawhtlin ngei theih nan mimal, chhungtinte leh Kohhran hote tawngtaipuina kan ngen a ni.

Dawrpui Multipurpose Centre ah vantlang hnatlang

2011-07-19T03:14:00.000-07:00

Dawrpui Multipurpose Centre chu Dawrpui khawtlang duh ang ngeiin sorkar min tihhlawhtlinsak dawn ta a. Chumi atan chuanni 16.7.2011 (Inrinni) khan hnatlang neih a ni a. Bialtu MLA Minister ni bawk Pu Lalsawta'n thute sawiin min rawn hmanpui a. Dawrpui veng pa MLA Deputy Speaker ni bawk Pu John Rotluangliana'n thute sawiin min tel pui bawk.
Local Council Chairman-Pu Zosangzuala'n hneh takin min kaihruai a. Upa Rokamlovan Pathian hnenah a hlan a. Chuan hunserh te kan zawh hnu in Pu Sawta'n Bawngtuthlawhin hma a hruai a. Hnatlang chu kan tan a. Chhunah sawhchiar leh thingpui tuihnai tak nen hnatlang kan nei a. DMCDC Chairman Pu Chhawnkima Pachuau a phur hle a. Kum tam tak kan lo sual leh kan lo beisei thin a hlawhtling ta chu kan lawm hle mai. Khawnawt a hnatlang kan ni bawk a. Kan thawkchhuak tha in kan hlim hle. A nawlpui a hnatlang kan ni bawk a, Kan bankhur laih te kha hman tlak tak maw. Chuan tlai dar li velah kan sulhnute kan enfel hnu in hnatlang chu kan tin ta a.

Hnatlang hi a tul anga la chhunzawm leh tur nimahse, Mistiri te zai ngai a chet a fin thlak khawp mai.

Ka lung a leng thin

2011-04-26T22:48:00.000-07:00

Tobul : Kum 1971 ah ka nu leh pa te chu Pathian venna leh kaihhruainain 'Tiam tlat e" an lo ti a. A hun lai a Middle School zirtir tu ni ve ta nafam chu TMB ngei mai in mo an hruai ve luk luk a ni awm e.

Saitual khaw "al" khawp inneihna chu hetiang hunlai hi chuan thil har angin lang lo mahse tun thleng pawh a an sawi hian an hmai a la uang ve lek lek thin hian kan ngaih bel ve ngawt a.
Hnulam : Chutiang in hun chuan tumah nghak ve hek lo le. Fanu hmasa ber na na na chu tiin Durtlang Presbyterian Hospital ah nausen hmel duh awm tak "Fa hmasaber" ni turin Mahruaii chu a lo piang ta. Chutiangin a chhang tur chu Saitual lamah piang leh in, Fa pa hmasa ber tur atan inneih atanga kum 6 a vei meuh chuan "nausen lian buang theng thung 'tahbelh zet mai chu' " a rawn piang ta a. ( See picture Right most) Khi ngei khi a ni zoram kalsiam rel tura khua nu ruat chu tih mai tur khawp a thluak tha leh viak tha chu ni. Chutiang zelin fanau malsawmna atan fapa in rawn chhun zawmin kum 1980 ah chuan fanau tan a hnuhnung ber tur chuan hnung a rawn khar ta a. Chhangchhiat bak berh lai sawi hlei thei lovin-Saitual, Haulawng, Durtlang, Vairengte, Tuikual te hrut kual zelin tunah Dawrpui veng ah khua an chuan ve mek a. Hetiang a nih avang hian naupan lai thian (Childhood friends) sawi tur ngah lo mahse then leh rual kawmah chuan tudang an ngai bil lo. Chungkhuanu malsawmna a zarah tunah zawng kawppui te nen fanau maltluan chawiin an leng za ta a. He chhungkua ah hian "Malsawmna hi Khuanu hian a phalrai bik em ni" tih hial khawpin Malsawmna an dawng a.
Thlalak han en hian lung a leng em a.. Ka awmawl in kan thai kawi mai mai a ni e.

Dawrpui Veng -Guiness World Records ah kan tel

2010-03-31T23:22:00.000-07:00

Dawrpui Branch Y.M.A pawh tun March ni 12 a Mizoram in Guinness World Records a siamna ah kan tel ve a. He mi atana kan sorkar leh CYMA in ruahmanna a siam atang khan kan Branch YMA pawhin lehkha a hmu a. Chu lehkha chu hmanhmawh thlak a nih avangin hmanhmawh takin Branch O.B te chu President Pu Masanga in ah kan thu khawm a. Tel ve ngei nise kan tih rualin kan Branch YMA Cultural Sub-Committee hruaitute pawh phone hmanga rawn an ni a. Branch O.B ten kan sawi khawmna ah pawh kan phur tlangin "til mu langraiin kan khawng ang chu le" "tilmu chat ram khawpin kan thu tung ang chu mole" kan ti a. Kan nupuite lam thin pawh i khawrh chhuak vek ang u tiin phur takin bul kan tan a.
Chuan vengchhungah chhiattawk kan awm avangin duh angin bul kan tan lawk thei lo chungin Sub-Committee Chairman Pu Lianzama Pachuau leh Member puite hmalakna in Dawrpui School ah kan han in hmukhawm chu kan beisei aiin kan thalaite an lo phur a. Kan Branch chhunga Instructor training chhuak ngat Pu Valbuanga hoin Dawrpui School kotah lam kan thai tan ta a.
A va nuam tak em!!! thiam sa leh ngaihna la hre lo te pawh hriat hran rualloh in kan hruaituten min zirtir a. Zan tin deuh thaw Dawrpui School kawtah thawm kan chhuah ta. Veng mipui an phur tual tual, lamna lama rawn tel ve theilo te pawhin sum leh paiin tan an rawn la a.
Vengchhung V.C, MUP, MHIP etc.. kan tangrualin 'kawi kawm thin ang thapin' kan in tawi tha hle. In thuamna lam ah pawh mahni in ngaihtuah theiin kan in ngaihtuah a. Branch pawhin a tul ang ang chu a sengso bawk a.
Inrinni leh Office chawlhni ah nilengin SAWHCHHIAR nen kan in awi a. A va nuam tak em! Min ti phur zual tu chu kan thalaiten rilru leh tihtakzeta lam an zir ka hmuh khan ka lawm a ti zualin a khawngtu (Cheraw) a tel ve ngei turin kei pawh zantin mau vuanin ka thing thi ve thin. Chutia kan han thiam hnu a kan lam thawm chu ngaihteh a van mawiin hriat nawn fo ka chak a ni.
Soundtrack nen a lam a ngaih hunah lah Pu Valpuia'n a neih tha tha a rawn chhawp chhuak bawk a. Branch hruaitute lah tumah thu mai mai thei tawh lo hek lo. Zantin Dawrpui School kawt kan pan hum hum zel mai chu a nih hi.
World Record lam ni chu nidangah....

PAULA HLING LEH NATNA CHUNGCHANG

2009-03-09T22:33:00.000-07:00

PAULA HLING LEH NATNA CHUNGCHANG
ZIAKTU THUHMA

by P.C.Lianhmingthanga

Bawhchhiatna avangin mihringte chu, thim thuneihna hnuaiah kan lut a. Thim lal, diabola chuan khawngaihna tel hauh lovin min tiduh daha. Pathian Thupek leh Dan zawm lohna avangin ANCHHE DAWNG - DAN ANCHHE Hnuaia leng kan ni bawk si. Khawvel lal, diabola chuan mihring nunah dichim taka rorelin min sawp vel ani ber mai (John 10:10).
Lal Isuan,”Khawvelah hian hreawmin in awm thin, thlamuang takin awm rawh u, keiin khawvel ka ngam ta” a ti (John 16:33). Khawvel lal hnuaia kan retheih hreawmzia hria in, LAL ISUAN, khawvel thim chunga roreltu min hnehsak thu a puang a ni, “... Tunah he khawvel lal hi paihchhuah a ni ang. Tin, kei lei ata khai kana ka awm chuan mi zawng zawng keima hnenah ka hip ang,” kan Lal Isuan a ti (John 12:31,32). Lal Isuan diabola a hneh thu leh thlamuang taka awm tura min duh thu a sawi a ni.

Sual leh Natna tinreng, chaklohna, Accident leh thihnate hi khawvel lal lam chhuak, bawhchhiat ni atanga khawvel tihreawmtu an ni. Lal Isuan khawvel Lal chu min hnehsakin, kan sualna, kan khawlohna leh Natnate min phurh sakin Kros-a thihna leh thawhlehna in min chinfel sak ta a ni. Tichuan, Krista Isua Rinna avangin Thiamchantirna thilthlawnpek kan dawng thei ta. Natna leh chaklohna hnâr, khawvel lal min hneh sak tawh avangin. A taksa a vuakna vual leh pem a tawrh te chu kan taksa ngei damna a ni (Isa 53:4,5). Kan thlarau, kan Rilru leh kan taksa Damna chu Rinnaa kan chan turin Lalpan a lo ruat diam a ni. VAN, famkimna hmun kan thlen hmaa, diabola leh a hote chetna rama kan awm lai ngeia, kan dawn theih tura LALPAN min thawhsak a ni. Vanah Setana leh a hote awm ve lohnaah, Taksa Damna te a ngai tawh lo. Natna, thihna leh Accidentte a awm dawn tawh lo. Khawvela kan chamchhung ngei hian, Hneha, Damnate, thlamuanna te chang tur kan ni; kan mamawh a ni reng bawk a. Chuvang alawm Lal Isuan khawvel a ngam thu puanga, Thlamuang taka awm tura min duh reng ni.

Pathian Thu ringlo mi thenkhatten diabola nen inremsiamin, zirtirna dik lo an la luta a pawi hle a ni. Pathian Ring ang taka lang siin a Thiltihtheihna an awih talo (II Tim 3:5). Khawvelah hian na reng tur leh, hreawm taka thi tur niin an in ngai tlat. Lal Isuan natna tinreng a tihdam ziate chu hre mahse, hmanlai thawnthuah an ngai a. Pathian a pangngai reng ti lawi siin. Tunah pawh a la pangngai tih erawh a takin an pawm si lo. “Paula Hlingte” a diklo zawnga zirtirin; Pathian tihdamna mite rinhlelhtirtuah an hmang thin. Paula chu natna nei reng, Pathianin a tih dam duh loh angin an sawi thin. Rinawm taka phun nawi lova naturin an infuiha, Paula chu entawn turin an zirtir thin. Heng hi Diabola Theology leh bumna a lo ni reng alawm maw le !

Lalpa hian Ringtute hi hnehtu ni tur leh, Setana ram thiat zel turin min duh a ni. Lalpa hian kan Dam leh hrisel an duh, Diabola, thim lalpa hnuaia kûna, natna hreawm tinreng tuara thi tur ringawtin FAPA Thisena tlan kan ni lo. KRISTA min hnehsakna chu khawvel atanga hmanga, hneh zel a, Van thleng tur kan ni.

He lehkhabu tereuhte hi Pathian Thutaka min kaihruaitu ni tur leh, Rinnaa kan din ngamna tura zirtirtu ni thei sela tih hi a ziaktu tawngtaina a ni e.

LEHKHABU DAWR HRANG HRANGA LEITHEIH TURIN NI 10.3.2009 HIAN ARCHIVE HALL BABUTLANGAH MIZORAM CHIEF SECRETARY, PU VANHELA PACHUAU IN A TLANG ZARH TA.

Mizoram ah Technical Education hmasawn mek

2009-02-13T01:43:00.000-08:00

Tunlai khawvel thang zelah Technical Education in hma a sawn zel a. Chutiang bawkin India ram pawhin Technical Education lamah nasa takin hma a sawn a, khawvel ramdangte pawhin kan ram mithiamte atangin pur an rawn chaw mek a nih hi.
Chutih laiin keini Mizoram hi Technical Education lamah engemaw kan din hmun ve le? Mi hmasawn rual hian ke kan pen ve mek em aw! tiin ka ngaihtuahna a kal nasa em em a. Mizoramah thalai lehkha thiam tak tak an lo chhuak a. Engineering/Technology lama Degree tha tak tak nei pawh an kat ve ta nuk mai. Chutih laiin kan State pualin Engineering College pakhat pawh kan la nei lo te hi chu rualawh a na duh deuh chuan ka hria. Ama’rawhchu Technical Education lamah ro hlu tak mai kan lo nei ve reng mai a. Engineering College em la nei lo mah ila, Technical Institution pahnih Mizoram Polytechnic, Lunglei leh Women Polytechnic, Aizawl te neiin kan phak ang tawk tawk ah chuan hma kan lo sawn ve em em mai a. Kan Technical Institution pahnih neih chhun – Mizoram Polytechnic, Lunglei leh Women Polytechnic, Aizawl te chu tih chang tlun an ni a. Kum 2001 atang phei kha chuan World Bank tanpuina in Technical Education lamah nasa takin infrastructure leh thil dangah hma a sawn nasa em em a, a lawmawm hle mai. Chumai pawh ni lovin he World Bank Project hnuaiah hian Course thar pathum ngawt hawn a lo ni a. Chung course thar hawn pathum Computer Science & Engineering (CSE)-Lungleiah, Garment Technology (GT)-Aizawlah leh Beauty Culture & Cosmetology (BCC)-Aizawlah te phei hi chu kan tunlai khawsak nen a inmil in course zir duh naupang pawh seat in a daih bak dil tu an awm thin niin ka lo hria a. A lawmawm hle mai. Chutih lai mek in he course thar hawn a thawk tu tur World Bank Project hunlaia lak te hi regular/anghet a thawk pakhat mah an awm lo niin ka lo hria a. Hei hi a pawi hle in ka hria a, chuvangin kan Technical Institution pahnih neih chhun a thawk te hi sorkar hian aranglamin ngaihtuah thei se a lawmawm ngawt ang.
Hetiang taka Technical Education lama hma kan sawn mek lai hian, hmasawnna tur kan la ngah avang hian kan sorkar chak tak leh thil ti thei tak hian hma min laksak se. Tuna kan Institution pahnih te mai bakah Engineering College te hial pawh kan thalaite tan hian min han chhawpchhuah sak teh se. He khawvel hi zawng rualawh na khawvel a ni a. Chu kan rualawhna chuan a tha lamin rah han chhuah zel teh se.

In thlan Campaign in vawrtawp thleng

2008-11-23T21:17:00.000-08:00

Mizoram General Election chuan a vawrtawp a thleng mek a. Party tin ten theih tawp chhuahin hma an la a. Congress lam pawh Central lama an hotute chah chhuakin theih tawp an chhuah a, MNF lam pawh an buai char char hle. UDA lam pawh theihtawp chhuahin tlin ngei in beisei takin hma an la a. LJP leh Independent a ding turte pawh an buai char char hle. TU TAK TLING ANG MAW!! I lo thlir teh ang.

Tunlai Aizawl ti ti ber 'Chiahpuam'

2008-11-10T22:19:00.000-08:00

Chiahpuam hi mi then khat chuan karkhat bank an ti mai thin a. Pawisa karkhat chhungin interest sang tak takin a pung a, chuvangin mipuiin an hlut in pawisa dah tu pawh an pung tial tial a. Chutih lai tak chuan thilfello a awm tak avang nge? a buai ta thut mai a. Pawisa tam tak tak dah tu leh tlem deuh dah tu te pawh an buai ta nuai nuai mai a. A ler lama khawihtu ni a an sawi Pi C.Lalmuanpuii(Muanpuii) lah chu a chi hriatloh in a bo ta daih bawk si a. A hnuai (downline) a mite chu tih ngaihna hre lo in an hawi hil hlawm hle mai a. Mahse kan Police (CID) te thawhrah avangin tunah hian Muanpuii chu man a niin an custody ah an kawl mek a. Thu zawhfiah tura dah mek a ni a. Hetiang hi tunlai Aizawl boruak a nih avangin kan hma lawka General Election lo awm tur pawhin hmun a luah hleithei meuh lo chu a ni e.

Thianpa P.C.Zohmingthanga Damdawiin atangin a chhuak ta.

2008-10-19T22:16:00.000-07:00

Thianpa Zohminga Civil damdawiin a a awbawm zai pawh tluang taka neih a nih hnuin inrinni (18.10.2008) khan an in lama in enkawl turin a chhuak ta. Kan tawngtaina chhana awm avangin a lawmawm hle mai.. Aw thatak nen YMA zaipawlah kan la dinho leh ngei kan beisei.

Ka thianpa P.C.Zohmingthanga hrawk zai

2008-10-16T22:40:00.000-07:00

Pu P.C.Zohmingthanga hi Dawrpui veng pa fel tak a ni a. Amah hre chiangtu chuan an nel em em zel a. Mi rilru tha tak leh taima tak a ni a. Khawtlang tana mi in hmang tak a ni. A awmna veng Dawrpui Branch YMA ah hian mi tangkai tak a ni a, tunah hian Executive Committee member a ni. YMA a Section Leader ah hun rei tak a awm a. A leader chhung hian Branch YMA tan mi tangkai tak tak a chher chhuak hnem hle a. Section Leader a nih lai hian Section Zaipawl te dinin zailam hi a ngaina em em a. Tuna Branch Zaipawl ah pawh Bass part la in damdawiin a admit a nih hma zan thleng hian Branch Zaipawl in Central YMA General Conference a zaipawl a neihna a hla zir naah a tel a ni. Chuvangin keini a thian te chuan dam leh thuai se tih hi kan tawngtaina leh kan duh thu sam a ni.

Mizoram in Pathian hnaih se..

2008-10-16T01:38:00.000-07:00

Hei hi chu tupaw'n kan vei ka ring e. Zoramah hian Pathian lalber se. Kan hnathawhna hmun - Sumdawng tan kan sumdawnna hmunah, Sorkar hnathawk tan kan hnathawhna hmunah, Kuthnathawk tan kan kuthnathawhna hmunah.. chutiang zelin. Zoram kristian te hi a huho in kan tha a, mahni a kan awm hian kan kristian leh hlei thei thin lo a ni. Aizawl chhuahsan in Kolkata ah kan thlawk lut a, thlen zanah kan kristianna dah tha in zu leh sa kan chen a. Aizawl a ka thenawmpa emaw kan Kohhran Upa in emaw min rawn hmuh phak tawh loh avangin kan duh duh danin kan nung a. Hei hi a pawi em em a, Pathian chuan min lo hmu reng si a. Pathian aiin kan kohhran upate kan thenawm khawveng kan zah zawk em ni?

Faina lam ah kan thangharh!

2008-10-16T01:29:00.000-07:00

Mizo te hi hnam hmasawn tak mai kan ni a. Kan hnam a naupan ang hu chuan khawvel huapah pawh mite hriat ka hlawh ve tawh hle a. Hei tun hnaiah sorkar lai pui (India) sorkar hmalak nain meizial zuk that lohna leh mipui vantlangah, puipunna hmunah te meizial zuk te an khap a. Hengte hi kan zawm chuan kan hnam tan a that mai bakah thianghlimna(Faina) lamah pawh nasa takin min tanpui dawn a ni. Kan khawpui ve Aizawl kawng dung tluana meizial zukna bung an let rum mai te hi a lo fai tawh anga. Kan khawpui a lo thianghlim tawh anga. Kan lo hrisel tawh bawk ang.