“Johana khan tuiin a baptis thin a, nimahsela ni rei
lo tean Thlarau Thianghlimin baptisma in chang ang,” a ti a. (Tirhkohte 1:5)
Tin, Pentikost ni a lo
thlenin, an zain hmun khatah an awm khawm vek a. Tin, thawklehkhatan van ata
ri, thlipui tleh angin a lo thleng ta phut a. Tin, chu chuan an thutna in chu a
tikhat ta vek a, tin, leite te, amaha insem darhin, mei angin an hnenah a lo
inlar ta a. Tin, an chungah chuang theuh va, an zain Thlarau Thianghlimin an
khat ta vek a, Thlarauvin a tawngtir ang zelin tawng dangin an lo tawng ta a. (Tirhkohte 2:1-4)
Lal Isua khan a
zirtirte hnena thuchah ropui tak, an thiltihtheihna thuruk a hnutchhiah chu
Thlarau Thianghlim Baptisma an chan tur chungchang a ni a. Chu Thlarau
Thianghlim Baptisma an chan hma chuan thiltihtheihna leh huaisenna an la neih
loh avangin an dawih em em a. Jerusalem pawh chhuahsan a phal lo reng a ni.
An innghahna ber
Isua kha khenbehin a awm a, an mangan em em laiin thihna chelh hlen rual lohvin
a lo tho leh ta a. A zirtirte ho zingah khan ni 40 chung zet chu a rawn inlar
leh a nih kha. Chumi hnuah Vanah hruai chhohin a awm ta a. An hnena a thuchah
Jerusalem chhuahsan lova awm chu an tih theih chhun alo nita. Chutichuan, Marka
nu pindan chungnung, Lal Isua ho ngeia zanriah an kilhona hmunah chuan an awm
khawm ta a. An thianpa, Isua tangka 30 a hralhtu Juda Iskariota aiawh tur
zawnga tawngtaia, ai enin an lo awm khawm a.
PENTECOST : Lal
Isua a thih atanga ni 50 ni fehrensan (zing dar 8-9) velah chuan an zingah
Thlarau Thianghlim a lo thleng ta a. Thlarau Thianghlim lo thlenna tur atana
rilru hmunkhat pu a, amah beiseia an lo awm khawm lai a ni. Kan chhungkuaah,
kohhran/corps ah, kan ramah Thlarau Thianghlim alo thlen theih nan beiseina
rilru hmunkhat pu a kan awm a tul a ni.
THLARAU
THIANGHLIM : Lal Isua an hnena alo tiam “Thlarau Thianghlim chu in chunga a lo
thlen hunah thiltihtheihna in la nei ang; tichuan, Jerusalem khuaah te, Judai
leh Samari ram khaw tinahte, kawlkil thleng pawhin ka thuhretute in ni ang”
(Tirhkohte 1:8) kha an hnena alo thlen takah chuan huaisenna a thuam an lo nita
a.
Thlarau Thianghlim an hnena alo thlen
hma a an tih ngam loh Pathian thu chu huaisen takin an puang tan ta a. Judai
ramah te, Jerusalem a puithiam, inti kohhran kulmuk puipui leh lehkhathiam
(Saddukaiho) te huaisen takin an hmachhawn ngam ta a. Chumai nilovin, Thlarau
Thianghlim in a ken tel thiltihtheihna a thuam in an lo awm ta a.
Petera pawh a thuchah sawi hmasaberah
mi 3000 in piantharna (baptisma) an chang ta nghal a. An hnena awm Thlarau
Thianghlim thiltihtheihna avangin damlo te an tidam a, an nuna Thlarau
Thianghlim thiltihtheihna chu miten an lo hmu ta a ni. Petera phei chu a kal
paha a hlim (shadow) ah ringawt pawh damlote, ramhuai bawlhhlawh sawisakte
pawhin damna an chang ta hial a ni. (Tirhkohte 5:15-16).
Chutiang taka Lal Isuan a aiawh tura
khawvela min pek Thlarau Thianghlim kawltu nang leh kei kan ni hi kan va vannei
tak em! Chu Thlarau Thianghlim chu a tharin lo dawng la, lo chang thar leh la ka duh a ni.
Lalpan malsawm che rawh se. Amen.