Corps Cadet hi Junior Cadet tiin kum 1896 ah din tan a ni a, Junior Cadet Brigade chung chang sawifiahna chu 1896 April ni 25 War Cry phek hmasa berah a khat tlata ziak a ni. He Brigade a tel tur chu a naupang berah kum 12 a ni tur a ni a(Mizoram ah chuan kum 11 hman mek a ni), kum a tlin veleh Officer a tang duh tur leh an hriselna leh theihna leh hriatna ten a tlin phawt chuan zawm mai thei tur buatsaih tur an ni.
Zirlai pawh Bible thu te, khawlai inkhawmnaa thusawi dan tur te, Pathian thu sawi tur buatsaihna leh sawi chhuah dan tur te, Sipai Pawl hnathawh chanchin te, Thurin leh inthununna te, Thupek leh Thunun Dan(Field Officerte tan bika siam) te a huam vek a, Corps ah Sipai Pawl tana mawhphurhna bikte pe in, an tihturte phur taka ti tura zirtir leh enkawl an ni a, an hmasawn dan report na Card (Work Card) pawh thlaruk dan zela thehluh tur a ni a, an Corps Officer in a hriatpuina hming a ziak ve ngei thin tur a ni.Junior Cadet hi a din tan thla khatnaah pawh mi 500 laiin an zawm nghal a ni.
Kum 1898 February ni 10 atang chuan Junior Cadet chu CORPS CADET tia thlak a ni ta a. He hming hi tun thleng hian kan lo pu ta zel a ni. Hun lokal zelin Mizoram ah pawh kum 1929 ah Corps Cadet dil theih a nih thu chhuah a ni a CC atan mi 10 pawm an ni a, kum 1930 January thla atangin chhan tan ani a Corps Cadet hmasa te chu Khualkungi, Thanzami, Mungi, Lianchhungi, Di-a, Lalchhunga, Tawia, Senbawnga, Doliana leh Lalnghaki te an ni. Corps Cadet Brigade hian hmasawn zelin tunah chuan India Eastern Territory ah Corps Cadet 3500 chuang lai kan lo awm ve ta in Corps Cadet chhang zova Merit Badge hmu engemawzat chu Officer ah an tang zui a. Mizoram Salvation Army Centenary lawmnaah khan General kut atangin mi 447 laiin Badge of Merit an dawng a. Tin, Local Officer tha tak tak tam tak chu an ni bawk.
Kum 1954 khan Lalramzauvi d/o Lt.Col.K.Khara chu International Corps Cadet Congress palai a ni a, a ni hi Mizo zinga International level-a Corps Cadet Congress chhim awmchhun a la nih hmel. Kum 1971, 3-7 November khan Calcutta-ah Corps Cadet engemawzat Corps Cadet Congress palai niin an kal bawk a, an zingah hian Commissioner Lalngaihawmi Territorial Commander (2011-2017), Pu Vanlalnghaka CS Temple Corps, Pu Joseph Vaikhuma Territorial Envoy, Pu Daniel Chianghnuna CCG Temple Corps, Pu P.Lalthianghlima (PG), Pu R. Dawngliana Band Secy.(Rtd) Temple Corps, Pu M. Dawngliana ACSM Zemabawk Corps, Pi Vanlalmawii Tuikual South Corps, Pu Rozamlovi Sailo (ka nu) Chaltlang Corps, Pi Miriam Moss Australia te pawh an tel a ni.
Tun hun ah hian Zirlai (Lesson) hi International Headquarters atanga siam Discovery Course A,B leh C te Mizo tawng aletlingin zir a ni a, chu chu a lehlin leh thu kalhmang te a harsa deuha hriat anih avangin Revised leh Edit niin Naupang te pawhin awlsam zawka an hriatthiam theih tur a dah a lo ni ta zel a ni. Course tin ah hian Set Book neih tel vek a ni a chungte chu- Rinnaa Pasaltha te(Heroes of the faith), Hmangaihna tello chuan engmahlo mai(Love without nothing), Salvation Army Kohhran nihphung(Higher Grade bik tan), Salvation Army G.K(Lower Grade bik tan) te hman mek a ni.
Corps Cadet ten inkaihhruaina tha zawk leh tihdan mumal zawk kan neih theih nan IHQ atangin Order & Regulation for Corps Cadet tih chhuah a ni a, chu chu Mizo tawnga letlingin abu a chhuah a ni bawk. Division tin ah Divisional Youth Secrtetary te kaihhruaina in Division Corps Cadet Council din ani a, chu chuan Corps Cadet te hmasawn zelna turin ruahmanna hrang hrang te siamin hma an la thin bawk. Territory level ah pawh Territorial Youth Secretary chuan Corps Cadet Guardian leh DYS te a tul dan ang zela kokhawmin ruahmanna te siam a hmalak thin a ni.
Corp Cadet chu sipai Thalai tha zawk leh tangkai zawk tura mahni Corps a zirna leh inbuatsaihna lo nei lawktu hi a ni. Corps Cadet zir hun chhung hi sipai , Local Officer leh Officer ni tura lo inchher hriamna in a khat vek a. Corps Cadet te Officer-a an tan duh leh duhloh chu Pathianin a kohna an hriat danah in nghat mahse, Kristian , ringtute nun leh rawngbawlna chu , Bible hriat leh Kristian te rindan hriatchianna ah hian a innghat tlat a ni. A bikin, Sipaite chu Corps Cadet an lo nih tawh chuan Chanchin Tha rawngbawlna an kalpui danah chu chuan tha zawkin a inhnamhnawih tir thei ang. Officer ni tura kohna hria Corps Cadet chuan C.O emaw C.C.G emaw hrilhin an nin tul leh pawimawh an kawhhmuh thei ang.
Corps Cadet ni tur chuan kum 11 aia naupang lo a ni tur a ni a, Naupang Sipai ah emaw , Puitling sipaiah emaw thla 2 tal lo awm tawh a ni tur a ni . Nu leh pa (enkawltu) pakhat zawk tal remtihna lak a ngai . Hengte hi a zawm ngei bawk tur a ni.
Tihtur tulte a zawm tha tur a ni a , Class leh inkhawm ah a tam thei ang berin a kal tur a ni . Hei hian Inkhawmpuite pawh a huam tel ang. Uniform a neiin a tul hunah a ha tur a ni a. Corp Cadet Badge (Pin) chu Uniform leh Uniform tello pawhin a inbel thin tur a ni. Corps leh Khawtlang rawngbawlna ah te a tuldan ang leh a mamawh dan ang zelin, hotute kaihhruaiin a tel tur a ni. Krista hnena a mite hruaithleng thei turin a tangkai thei ang berin a thawk tur a ni.
Corps Cadet ni duh chuan a dilna form chiang taka fill-up in a dil thei ang. Corps Cadet diltu chuan hengte hi a zawm tur a ni :
1. Thawmhnaw zahawm taka hain Sipai Pawl kalphung angin a in chei thin ang.
2. Zuk leh hmuam , damdawi hmansual , zu in leh pawisa khelhna lakah te a fihlim tur a ni.
3. Corp Cadet Lesson te chu a hun takah a chhang thin tur a ni , Sipai Pawl thu leh hlate a theihdan angin zuarin a sem thinin , YP inkhawmnah telin a tul chuan a zirtir thin ang.
Corps Cadet dilna hi ku khat ah vawi khat hawn thin a ni a, December thla ralhmain DHQ ah dilna a thleng kimin Headquarters in a pawm te chuan January thla atangin Lesson an chhang tan thin.