Matthaia 16:24 Tin, Isuan a zirtirte hnenah, "Tupawhinmi zui a duh chuan mahni hreawm pawisa lovin, a kraws puin mi zui rawh se.
Luka 9: 23 Tin, amah vekin, mi zawng zawng hnenah, "Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se.”
I Petera 4:2 Chutichuan tun hnuah tisaa in la awm chhung zawngin mihring chakna lamahte awm tawh lovin, Pathian duhzawng lamah in awm tawh ang.
Salvation Army ten kum tina kan hman thin mahni inphatna (Self Denial) lakkhawm ni kan lo thleng leh ta reng mai. A hmasa in mahni inphatna lo chhuah dan tobul tlem ilo thlir hmasa ila.
A lo intan dan : John Carleton a, salvation army ngaisang vak lo tu chu tum khat chu a farnuin Ireland hmar lama Salvation Army inkhawmna hmunah a hruai ve hlauh mai a. Tum hnih a inkhawmnaah chuan a piangthar ta tlat mai. Salvation Army ah lutin, Officer ah hial a tang ta a. Kum 1880 a Northern Ireland a Salvation Army dintu a ni ta nghe nghe a ni.
John Carleton a chuan a nitin ‘Pudding’ ei ai chu pawisa a khawlin kum khatah Shillings 50 a khawl tlingkhawm chu General William Booth a hnenah a thawn ta a. Chu chu khawvel puma mahni inphatna (self denial) rawngbawlna lo intanna a ni ta a. United Kingdom a self denial an lakkhawm an buatsaih hmasakber tum chuan 4820 pounds ($ 24,000) lai a tling nghal nghe nghe a ni.
Chu rawngbawlna chu Mizoram ah pawh kum 1920 atangin chhunzawm a ni ve a. Kum 1921 ah Brig. Ngurliana’n Ratu khua a self denial khawntute a zui ve thu te, kum 1925 a Rs. 150 lai an khawn chhuah thute leh chumi avanga Pu Kawlkhuma a lawmthu te Ratu khua a sipai hmasa Thanchhinga’n a sawi te kan hre thei a.
Awmzia : Mahni Inphat hi a awmzia chu, kan chanai mite hnena kan hlan/pek na hi a ni a. Kan kawrthar leina ai tur, mi harsa kan tanpuite, kan thil ei duh zawng tak kan ei ai a, mite kan tanpui hian mahni kan in phat a lo ni reng a ni.
Keini mihringte, Eden bawhchhiatna avanga sual nihna nei, engti kawng zawng pawha hremhmun pumpelh thei tawh lo kha, Pathian hmangaihna avanga Hremhmun kan pumpelhna tura Pathian ruahmanna Lal Isua kaltlanga pek kan nihna pawh hi mahni inphatna (self denial) dik tak a ni. Sualna reng reng neilo Lal Isua khan Chhandama kan awm theih nan van ropuina pawh thlahlel hlei thei lovin, a ropuina te hlipin khawvelah a rawn kal a. Krawsa khenbeh hial tur khawp a a sualna leh a thiltih dikloh kha Pilata’n a hmu lo chung pawhin nang leh kei avangin thiamthu sawi lovin vuakin, nghaisakin, kraws lerah kan tan a nun a hlan a. Chu kan tan a inhlanna avang chuan nang leh kei hi vankhua leh tui nihna chanvo kan lo nei thei chuah a ni. Hei hi mahni inphatna(self denial) a ni. Chuvang chuan mihringte tan hian mahni inphatna (self denial) hi ava hlu zual bik tak em.
Kan tana entawn tur min hnutchhiahtu Lal Isua hnungzuia, midangte hnena kan phak tawk tlem lua/tam lua awm lova kan luanchhuah ve hi ringtute tih tur niin, chu mawhphurhna ropui tak chu hmuchhuaktu William Booth a thinlungah Thlarau Thianghlimin a hriatfiah tir a. Chu rawngbawlna kalzel avang chuan vawiin ah pawh mahni inphatna (self denial) kan lo lakhawm leh ta a nih hi. Mahni inphat thei a, hriselna, damna min pe a, mal min sawmtu kan Pathian chu fakin awm rawh se.
Mahni inphatna (self denial) hi vawiin ah chauh nilo, ringtute nunah hian nitin kan hmanchhuah a, kan nunpui hian Pathian rawng kan bawl a lo ni reng a ni. Mite angin thu kan sawi thiam lo a ni thei, mite angin mawi takin kan zai thiam kherlo a ni thei. Mahse, kan phak tawk theuh ah, kan rawngbawlna tur tawk hi Pathianin min buatsaih sak a ni tih hriain, he kan hringnun tawite ah hian thahnemngai takin Pathian rawng i bawl zel ang u.
Lalpan malsawm rawh se. Amen!
No comments:
Post a Comment