*LOCKDOWN/QUARANTINE LAIA ELIJA IANGIN!* (June 28, 2021)

*Tin, LALPA thu chu a hnênah a lo thleng a, "Heta ta hi chhuak la, khawchhak lam panin kal la, Jordan bula awm Kerith luiah han biru rawh.* 1 Lalte 17:2-3

Lalpa thu zawlnei Elija hnena lo thleng angin zawlnei Elija chuan thuawih takin Jordan bula awm Kerith luiah a biru (quarantine) a. Pathian thuawih chu atan himna, chakna alo ni.

 

Lal Ahaba nupui Jezebelin Lalpa zawlneite te a râwt chimih chiam laia Lalpa zawlnei te zinga dam awmchhun ni turin Pathianin Kerith lui bulah Elija a quarantine a. A hunlai khan zawlnei Elija khan a him nana Pathian ruat a ni tih a hre kher lovang.

 

Chumai bakah, Baala puithiam 450 nena tu pathian nge Pathian tak zawk? fiahna tura bawngpa, maicham hma a halral thil hlana an in el ṭuma van aṭanga mei ko thla tura an in elna tura Pathiana chakna alakna atan alo ṭangkai hle a ni.

 

Tunlai kan hripui avangin kan sorkarin mipui te min kharkhip (lockdown) te, min dah hrang (quarantine) te hi hripui (Jezebeli) laka kan himna tura Lalpa remruata ni a.

 Khawvel mi (Baala) hma a kan din chan na tura Pathian a chakna kan lakna tur a ni.

Lockdown/quarantine laia Elija a hima, Lalpa a chakna ala ang hian keini ringtute pawh hian Lockdown/Quarantine hi i hmang ṭangkai ang u.

 

*Lalpan malsawm rawh se.*

*SAY SUNDAY ZAN* *Zoom Online SERMON* _(Tawi)_ (June 27, 2021)

 

*Tin, Isuan sawm leh pahnihte chu a ko khawm a, ramhuai zawng zawng chunga thiltihtheihna leh thuneihna leh nate tihdam theihna a pe a. Tichuan Pathian ram thu hril tur leh damlote tidamturin a tir chhuak ta a.* Luka 9:1-2

 

*Thi tûra hruaite chu chhan chhuak la. Thah mai tûrte chu chhan chhuak thuai rawh.*

Thufingte 24:11

 

Pathian rawngbawl tur hian naupang, puitling, Upa a thliar lova. Mahse, Pathian rawng bawl tur hian tlai luat erawh a awm thei.

 

Pathian rawngbawl duh ngawih ngawih mah ila, chaklohna, hrisellohna emaw thihna avangin kan tlai thei.

 

SAY Bible chang innghahna Thufngte 24:11 ah hian SAY zawng zawngte Pathian rawngbawla koh vek kan ni.

 

Luka 9 a Isuan a zirtir 12 te a tirhchhuahna aṭangin-

 

*1. A ko* - Kan thiam, kan finna, kan ropuinate avanga a rawngbawl tur ni lovin, SAY member kan nih avangin keini pawh rawngbawl turin min ko a. SAY Member kan nih rual hian min ko a ni.

 

*2. Thuneihna leh thiltihtheihna a pe* - Isua hian a hun tam takah a zirtirte tan example a set a. Thiltihtheihna, thuneihna a neih zia a tarlang a - ramhuai man tihdam, damlo tihdam, mithi kaihthawh etc... Chumi hnuah chuan chu thuneihna leh thiltihtheihna chuan a thuam a. Keini SAY te pawh Thlarau Thianghlimin kan hnenah a awm a, thuneihna leh thiltihtheihna in min thuam a ni. _(Highlight Petera te thiltihtheihna leh thuneihna a a thuam Tirhkohte 5:15. Paula thiltihtheihna a thuam Tirhkohte 19:12)_

 

*3. A tir chhuak* - Chutia a thuamte a zirtirte a tir chhuak ang hian keini SAY te pawh a rawngbawl turin min tir chhuak a ni.

 

Min tir chhuaktu Lal Isua hian Matthaia 28:18-20 _"Lei leh vana thuneihna zawng zawng ka hnenah pek a ni tawh. Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang,"_ min tih avangin ṭhahnem ngai takin Pathian rawng i bawl zel ang u.

 

*Lalpan malsawm rawh se.*

*LAL ISUA KUTAH HLAN ILA!* (June, 27, 2021)

 

*Tin, an vaiin an ei a, an puar ta hlawm a. Tin, chhang nawi leh sangha nawite chu bawmrâng sawm leh pahnih an rut khat a.* Marka 6:42-43

Pathian thu lar leh sawihlawh em em mai mipui 5000 hrâi chungchang hi kan hre fo tawh ṭhin a.

 

Lal Isua thu ngaithla duh a lokal khawmte hian an rilṭam leh eitur an neih loh lam ngaihtuah lêk lovin Lal Isua an buaipui a, a thu an ngai thla a.

 

Isua hian khawvel thil (ril ṭamna leh eitûr tlakchhamna) te aia amah ngaihsak leh buaipui zawk tute tlak chham hi alo phal reng reng lo.

 

A zirtirte an lo mangang, an awmna thlaler a ni a, khua a tlai tawh si. Ei tur an neih theih nan mipuiho ṭîn tir turin Isua an nawr a. Mahse, Isuan a remti lo. A zirtirte zawk hnenah chuan ṭîntir/hawntir a hnekin, "nangmahnin eitur pe rawh u" ala ti zui a. A zirtirte tan mipui chuti zozai eitur pek tur an neilo. Tih ngaihna an hre lo.

 

An zingah eitur nei an in dap a. *"Chhangper 5 leh sangha 2"* tlawng an nei. Mipui (patling chauh pawh) 5000 an nih chuan, hmeichhia leh naupang nen phei chuan an tam ngawt ang. Chung zozai eitur an nei lo. Zirtirten tih ngaihna an hre lo! Tih ngaihna a awm lo.

 

*Mahse, ropui em em chu maw, an neihchhun tlem thamte kha tihngaihna hria ISUA kuta an hlan kha a ni.* Tih ngaihna awmlo kha, tih ngaihna hria Lal Isua kutah an han pe a. Mal a lo sawm a. A phel a, an sem ta. 

 

An vaiin an puar takin an ei mai a nilo. An ei bâng sangha leh chhang nawite chu bawmrâng 12 an la rût khat a nih chu. *Lalpa chu fakin awm rawh se.*

 

Kan kuta kan kawl(natna, tuarna, lungngaihna, hrehawmnate), tih ngaihna kan hriatloh hi tihngaihna hria Isua hnenah i hlan ila. A nin mal alo sawm anga. Kan tân malsawmna alo ni dawn a ni.

 

Pathian rawngbawl tura kan chhuanlam chi hrang hrang- thu ka sawi thiam lo, ṭawngkam ka thiam lo, talent ka neilo, ka zak zum si, finna ka neilo, etc..kan tih zawng zawngte hi Lal Isua kutah hlan ila. A nin mal alo sawm anga, alo tipung anga. Miten puar nan an lo hmang anga. Tin, midang zelte tan malsawmna alo ni dawn a ni.

 

Kan tlinlohna, kan tlakchhamte hi tihngaihna hria, tipung theitu, malsawm ṭhintu Lal Isua kutah i hlan mai ang u.

 

*Lalpan malsawm rawh se.*

*SAVUN LEHKHA MAWLH KHA!* (June 26, 2021)

 *"Nang erawh chu engkimah fimkhur la, hrehawm tuar la, Chanchin Ṭha hriltu lam hna thawk la, i rawngbawlna kha hlen rawh."*

2 Timothea 4:5

Krista pasal ṭha huaisen Tirhkoh Paula chuan a hun hnuhnung a hmang mek a. Rom ah tanin (Dungeon) ah khungin a awm a.

Chuta ṭang chuan a ṭhuihruai, Krista chanchin ṭha hrila a rawngbawlna a a hruai ṭhin Timothea a fuih a. _"Thu chu hril rawh; a hunah te, a hun lovah te pawh bei zel rawh; dawh thei taka zirtir chungin an thiam loh hriattir la, zilh la, fuih rawh."_ tiin a fuih sauh sauh a.

Amah Paula ve thung chuan a hunhnuhnung tih hriain *"Intihsiakna ṭha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni; tunah chuan felna lallukhum chu ka tân dahin a awm tawh a, chu chu Lalpa ngaihtuahtu fel tak chuan chu mi ni-ah chuan mi pe ang; ka hnenah chauh ni lovin, a inlarna ngai apiangte hnenah pawh."* (2 Timothea 4:7-8) tiin a fuihna thuchah a tlip zui a.

Tirhkoh Paula ṭhahnem ngaihna leh tanin (Dungeon) rûn thim pawh ala hman ṭangkaizia han ngaihtuah hian a hnena awm, a mah hruai ṭhintu Pathian hi ava chawimawi tak em! _(A boruaka zu chênpui chuan hnukno te pawh a kâichhuak thei dawn hial a lawm le)_

A fuihna a tlip zawh hnua amah tlawh tura Timothea a tih ruala, a hnena rawn keng ngei ngei tura sawi *savun lehkha mawlh kha rawn keng ang che* a ala ti hram hram hian, Tirhkoh Paula Pathian thu a ngainatzia leh tanin chhûngah pawh chu savun lehkha (Pathian thu) a mamawhzia a tarlang chiang hle mai.

Keini, Isua Krista ringtu, Pathian rawngbawltute hian Paula angin savun lehkha (Pathian thu) kan ngâiin kan thlahlel em? Mahni ṭheuh lo in zawt ila.

Zalen takin lockdown avangin hun thawl tak pêka kan awm mek lai hian kan savun lehkha hi kan keu ngai em?

Nunna bu, damna bu, thawnthu satliah mai nilo, kan nun min thlakthleng hlawk thei thunung inziahna kan savun lehkha hi hawh u i ngaihluin, i ngaina thar leh angu.

Hetah hian kan mimal, chhungkua, khawtlang, ram leh hnam damna a awm si a.

*Lalpan malsawm rawh se.*

*CHOÂK AṬANGA ZIRLAI!* (June, 25, 2021)

 *Tin, choâkten zing lamah chhang leh sa an rawn putsak thin a, tlai lamah chhang leh sa an rawn putsak leh thin a; tin, lui tui chu a tlân a.*

1 Lalte 17:6

Lalpa zawlnei Elija chuan Pathian tirhin Jordan bula awm Kerith luiah a biru a. Elija hi Pathian nen an inngheng hnai hle a. Elija ṭawngkam ah pawh "Lalpa, a bula ka awm ṭhinna Israelte Pathian" a ti ngat a ni.

 

Chutiang taka Pathian nena lengdun ṭhin Elija thu pawh hi Pathian hian a ngai pawimawh kher mai. Elijan "kum eng emaw ti chhung chu ka thu lo chuan dâi leh ruah rêng rêng a tla lo vang," a ti a. Hun engemaw ti chhûng dâi leh ruah reng reng a tla ta lo reng a.

 

Chutih hunlaia Pathianin Elija châwm tura a ruat choâk a hmang tlat mai hi a ropui lai bawk chu a ni. 

 

Choâk (Ravens)hi Bible ah hian vawi tam tak a langa ( OT : Genesis 8:7,

Leviticus 11:13, Deuteronomy 14:14, 1 Lalte 17:4, Joba 38:40-41, Sam 30:17, Sam 147:9, Isaia 34:11).

Pathian hmanraw pawimawh tak an ni fo ṭhin a. (Thûk zawka sawi tur a awm nual mai)

 

Elija ei tur zing leh tlaia an rawn putsak ṭhin *chhang* leh *sa* hi choâk chaw tui tak (an favourite food) te zing ami ani chung hian Elija chanpuan hi an eisak miah lo mai te, a ei tur dik tak Elija hnena zing tin, tlai tin an pu thleng ṭhin te hian an mahni chunga thuneitu Pathian tirh na a an rinawmzia a tarlang chiang hle.

 

Tin, Pathian hian amah ngheng tlata awm ṭhin Elija hi a ngaihsak a, a hmangaih a. A chanpual him takin a dawn tir a ni.

 

Elija anga Pathian hnaih, Choâk anga a tirtu laka rinawm nih hi Lalpa min duh dan a ni.

 

*Lalpan malsawm rawh se.*

ṬHUILOH KAWRFUAL (June, 24, 2021)

"Kan kohhran huaihawt a nilo, kan kohhran programme a nilo. Hei chu chumi kohhran/pawlho hmalakna a ni, keini pawl chuan chuti khati" kan tih ṭhin zawng zawngte hi dah ṭha in, thinlung thianghlimin Lalpa bêl ila.

Kohhran leh pawl (denomination) in a daidan loh, pawl pawl tih bîkna in a phuar loh, "ṭhuiloh kawrfual" ha in Zoram ringtute hi Pathian hmaah inngaitlawma ṭawngṭaiin, sual thupha chawi in kûn za ila.

 

Kan mimal nun ṭheuh leh kan ram sualna, hlemhlêtna, leh rilru thianghlim lohnate hi Thlarau Thianghlim meiin min kângfai turin sawm ila.

 

Thlarau Thianghlim kan faina, Pathian venhimna, malsawmna leh ram hmasawnna hi engvanginnge kan koh thlak loh tehlul ang.

 

"Ka hming pu ka mite chuan inngaitlâwma an tawngtai a, min zawn a, an awm dan sualte an hawisan chuan, vân atangin ka lo ngaithla ang a, an sualte ka ngaidam ang a, an ram chu ka tidam leh ang."

II Chronicles 7:14

*ENGAH NGE I RINHLELH LE!* (June 24, 2021)

*......Petera chu lawng ata a chhuk a, Isua hnen lam panin tui chungah chuan kein a kal a. Nimahsela, thli tleh chu a hmuhin a hlau va; tin, a pil dawn a, "Lalpa, mi chhandam rawh," tiin a au ta a. Tin, Isuan a ban ta nghal a, amah chu a chelh a, a hnenah, "Nang rin tlem, engah nge i rinhlelh le?" a ti a.*

Matthaia 14:29-31

 

Mipui 5000, chhangper 5 leh sangha 2 hmangin a hrai a. Hlim takin an eizo mipui a ṭîntir hnu lawkah a zirtirte lawngah a chuan luihtir a, ṭawngṭai turin tlangah a chhoh san a.

 

A zirtirte chuanna lawng chu thlîin a nilo zâwnga a nem avangin an phî buai hle mai.

 

Lal Isua zuitu, a bula khawsa a a thil mak tih tinreng hmutu a zirtirte chuan khawfîng chah dawna Isua dîl chunga ke a rawnkal an hmu a. An hlau a, 'hmuithla (ghost-NIV)' emaw an tia.

 

Lal Isua thil mak tih, a tihdamna, a malsawmna tam tak hmu ṭhintu a kianga awm rengte pawhin Isua hi 'thlarau/hmuithla' emaw an ti. An hmu chianglo, an hmufiah lo a ni.

 

Nang leh keipawh hian Isua hi hria inti in, a malsawmna, a tihdamna, a ropuina leh a thilmak tih hmufo mah ila kan ring zolo fo ṭhin. A mawh love, a zirtirte pawn an ti ve alawm.

 

Mahse, Isua hi khawvel tuifawn chunga kal, engkim chunga thuneitu a nihzia in lantirin tui chungah a rawn kal a. A zirtirte zinga amah ngaina leh zar buai ber Petera'n a lo fiah hman a.

 

Fiah a dawlzia tarlangin Petera pawh tui chunga kal thu a pe, a kal ve mai. Mahse, khawvel thli leh tuifawn lam a en a, a pil dawn ruai a. Mahse, Isuan a bana, a chelh a, a kam khat zui a, Amah a ringhlel kha a hau a ni. Isua hian amah kan rin tak tak hi a duh a, amah kan rinhlelh hi a duh lo a ni.

 

Khawvel lam en lova Isua lam en hi khawvel buaina thlipui chunga kal/lênna a ni a. Isua en reng loh chu hlauhna, buaina leh khawvel lipuia pilna a ni.

 

Isua hian amah chauh kan en a, amah ringhlel lova kan rin tak tak hi a duh a ni.

 

*Lalpan malsawm rawh se.*

*THUNEITU ISUA!* (June 23, 2021)

*Tin, a hnenah phâr a lo kal a, "I duh chuan mi tithianghlim thei e," tiin a hmaah ṭhingṭhiin a ngen chiam a. Tin, ani chuan a lo khawngaih em em a, a han ban a, a dek a, "Ka duh e, lo thianghlim tawh ang che," a ti a. Tichuan, chawplehchilhin a phâr chu a lo reh ta nghal a, a lo thianghlim ta a.* Marka 1:40-42

Lal Isuan Galili ram afan vel naah a hnenah phâr a rawn kal a.

 

Ngun taka kan en chuan, phâr hian hruaitu nei lovin Isua a rawn pan ve tawp mai. Phâr hi natna tenawm, inkaichhawn awlsam tak a ni a. Miten an thinhrik a, an ten a. Khawchhungah pawh an awmve an phal ngai lova, daipawnah an dah ṭhin a.

 

Chutiang taka miten an thinhrik mah nise, tidamtu Isua kha a hmuh phakah a awm tih hriain, mite sawiselna leh diriamna pawh pawisa lovin Isua lam a rawn pan ve ngawt mai a.

 

Chutah pawh, inthlahrung takin "i duh chuan min ti thianghlim thei" a ti ngam ṭawkin, ṭhingṭhi in ngen a.

Lal Isuan engtinnge a lo tih? A lo khawngaih em em a, a han ban a, a dek a, *"Ka duh e, lo thianghlim tawh ang che,"* a ti a. Ava ropui em!

 

Phar, mite thinhrik, khawih pawh an khawih duhloh chu Isuan hmangaih takin *a ban a, a dek a,* a phâr tihdam sak chu alo duh teh meuh mai. *" Ka duh e. Lo thianghlim tawh ang che"* a ti a. *Chawplehchilhin a phâr chu alo reh ta nghal a, a lo thianghlim ta.* Halleluiah!

 

Phâr chunga thuneitu khan phâr kai a hlau ve lova, a dek a, a tidam ta a ni.

 

Isua hi engkim chunga thuneihtu a nih avangin ahma ah chuan engkim a tlâwm ṭhin. Mi chi hrang hrang, harsatna nei-Natna nei, ramhuai man, thla em ât, bengawng, piangsual, setana phuarte, setana tihduhdahte A hmaa rawn kal reng reng engmah ding zo an awm lo. Natna khirh tak-Cancer, Hiv, Diabetes, Thisensang, etc... i nei em Isua hmingin thu pe rawh. Isuan a tidam ang che.

 

*"Engkimin a thupek an awih ṭhin".* Kan nunah Isua thupek mamawh kan awm chuan Lal Isua hmingin thu pe ila. Lal Isuan hna a thawk zel ang. Tirhkohte 19:11-12 a Paula hmanga thilmak ti ṭhin Thlarau Thianghlim kha kan hnenah pekin kan awm ve a ni.

 

*Lalpan malsawm rawh se.*

*BEIDAWNG LOVIN ṬAWNGṬAI ZEL RAWH!* _(Alo thleng ngei dawn si a)_ (June 22, 2021)

*Ani (Kanaan hmeichhia) chuan, "Lalpa, nih zawng a ni a; nimahsela, uite pawhin an pu dawhkan ata chhang nawi tla chu an ei thin alawm," a ti a. Chu veleh Isua chuan a hnenah, "Hmeichhia, i rin a nasa em mai; i duh ang takin i chungah awm rawh se," a ti a, a chhang a. Tichuan, a fanu chu, chu mi achinah chuan a lo dam ta mai a.*

Matthaia 15:27-28

 

Hebrai (Israelte) mite tan chuan Gentailte hi engahmah an ngaih loh uicho ang leka an hmuhsit ṭhin a ni a.

 

Kha Kanaan hmeichhia (Gentail) nu khan mangang takina fanu ramhuai man hnawhchhuah sak tura Isua a rawn ngen pawh khan Isuan a tirah chuan engahmah a ngailo.

 

A zirtirten "kan hnungah a au a au si a" an tih pawhin Isuan "Israel hnam beram bo hnenah lo chuan tirh ka ni love" tiin ala chhang a.

 

Kha Kanaan hmeichhe tana a beidawnthlak mai a nilo, a zirtirte thlengin Isuan beidawng takin a chhâng a. Mahse, Kanaan hmeichhe nu chuan "Lalpa min pui rawh" tiin tlawm leh zah pawh sawi lovin Isua hmaah chibai a buk a.

 

Mahse, Isuan "Fate chhang laksak a, uite hnena paih chu mawi lo ve," a ti a, a chhang a. Beidawn thuah thumna in Kanaan hmeichhia kha a chhânga. 

 

Isua zirtirte phei chuan sawitur an nei tawh lo. An boss berin ṭawngkam na tak takin kha hmeichhia kha a hnar tawh si a.

 

Mahse, Kanaan hmeichhia chu a kaw tawp tak meuh aṭangin, *"Lalpa, nih zawng a ni a; nimahsela, uite pawhin an pu dawhkân ata chhang nawi tla chu an ei thin alawm,"* (Matthaia 15:27) ala ti fan a. Ṭawngkam na leh dengkhawng tak taka a hnawl chung pawha Amah beiseitu lakah Isua a in sûm zo ta lo.

 

Isua chuan a hnenah, *"Hmeichhia, i rin a nasa em mai; i duh ang takin i chungah awm rawh se,"* a ti a, a chhang a. *Tichuan, a fanu chu, chu mi achinah chuan a lo dam ta mai a.*

 

Pathian hnenah kan ṭawngṭaia, chhânin kan awm mai lova, kan beidawng a, kan tâwpsan fo ṭhin. Ṭhenkhat chuan, Pathian hi a awm nek love, kan ṭawngṭaia, min chhâng chuang hlei nem! Tiin kan tawp san fo ṭhin.

 

Mahse, he Kanaan hmeichhia anga Pathian hnena kan ngen tlut tlut chuan Pathian chhânna kan hmu ngei ang.

 

*Lalpan malsawm rawh se.*

*THUNEIHNA KAN NEI!* _(Tunah neila, lo hlim rawh)_ (June 21, 2021)

 

*Tin, ani (Isua) chu a lo harh a, thli chu a hau va, dil hnenah pawh chuan, "Ngawi la, awm hle hle rawh!" a ti a. Tin, thli chu a bang a, a lo reh ta thup mai a.* Marka 4:39

Lal Isuan Galili dil hnena thu a pêk hian lo ngaithla tu, lo hretu leh a thu lo awih/zâwmtu an awm a. Thupetu (Isua) hi a ropui êm avangin thliin 'ka tleh laklawh' a tilova, tuiin 'ka fâwn laklawh' a ti lo. Thu an awih a, an ngâwi a, an awm hle hle nghal mai. (Tûn thlengin Galili ah khuan tui ala fawn leh lo an tih chu.) Isua thu a ni tlat alawm!

 

Lal Isua ngeiin vana hruai chhohva a awm dawn avangin a aiawh tur Thlarau Thianghlim a rawn tirh tur thu leh thiltihtheihna kan neih tur thu Tirhkohte 1:8 _"Nimahsela *Thlarau Thianghlim* chu in chunga a lo thlen hunah thiltihtheihna in la nei ang;......."_ tiin a sawi a. Chu Thlarau Thianghlim chu amah ringtu nang leh kei hian kan kawl a. Thiltihtheihna kan nei a nih chu.

 

Lal Isuan Matthaia 17:20 _"....‘Heta tangin sawtah sawn va insawn rawh,’ in ti ang a, a insawn mai ang; *in tan tih theih loh reng engmah a awm lo vang,"* a ti a._

Thiltihtheihna a thuam kan ni tih kan inhriat loh nan diabola hian min bum tawh suh se. Amen!

 

Kan nunah eng tuifâwn leh thlipui nge min ti buai tura rawn thawk/tleh mek?

Natna thlipuite, hlawhchhamna leh beidawnna tuifâwnte, chaklohna thlipuite, natna nei tlata in hriatna tuifâwnte, hlauhna leh hahdam theihlohna (anxiety) thlipuite, nguina leh chauhna (depression) nei tlata in hriatna tuifâwnte, adt.... hmangin setana'n hmuh theih lohvin a phuar che em?

 

*Lal Isua hmingin pelh ini e.*

*Lal Isua hmingin chhuah zalen ini e.*

*Lal Isua hmingin lo dam rawh.*

 

I nuna thli tleh a, tui rawn fâwn tirtu (a phêna hmuh theihloh setana leh a tirhkohte) kha Lal Isua hmingin *ngawia, awm hle hle turin* thu pe la. A awm hle hle mai ang.

 

*Lalpan malsawm rawh se.*

*TEHKHIN THU!* (June 21, 2021)

 

*Tin, ani chuan an hnenah, "Pathian ram thuruk chu nangni hriat zawng phal a ni a, pawna mite tan erawh chuan engkim tehkhin thua tih a ni"* Marka 4:11

Kan Lal Isua hian a rawngbawlna leh thu a hrilna ah hian tehkhinna/tehkhin thu hi a hmang uar hle a. Mathaia ziakah hian vawi 23, Marka ziakah hian vawi 8 leh Luka ah hian vawi 24 ngawt a lang a.

 

He tehkhin thu a sawi tam tak hi ringtute tana awmze nei tak tak vek a nia. Chu Pathian ram thuruk hrefiah tura phalsak zinga kan awm hi kan va vannei em!

 

Buh chi thehtu tehkhin thu a _"Buh chi ṭhenkhat, hnimhlîngnei zînga a tla, hnim alo ṭo sanga, hnimin dîp ral avanga rah chhuah theilo"_ hi han luhchilh bîk ta ila.

Zoram kristian tam zawk dinhmun hi he dinhmun hi a ni thei mai awm mange?

 

Pathian thu chu kan duh a, kan ngaihsak a, kan buaipui a, hriat pawh kan hriain, Pathian thu a degree nei pawh kan ngah hle mai. Miin TV/youtube leh pulpit sermon an sawite pawh lo sawichhâwng zung zung thei, Bible châng refer pawh a sawitu sawi bak bak lo belh zung zung thei kan tam ang.

 

Mahse, kan nuna buh chi (Pathian thu) a ṭo va, a ṭhanlen theih lohna chhan chu- khawvel lungkhamnate, hausakna bumna te, thil dang châknate chu a lo luhin, thu chu a dîp a, rah lovin a lo awm thin(Marka 4:19).

 

Kan Pathian thu hriat leh kan chhiar ṭhinte hi dampui tham, hrisel pui tham, chak pui tham leh nuntam (abundant life) neih pui tham a ni tih hi setana hian a hriat khiau avangin kan thinlunga a tova, rah a chhuah theihloh nan hnimhlîng nei hmangin min dîp ral sak ṭhin tih kan hria em?

 

Heng khawvel lungkhamnate, hausakna, ropuinate, lansarhna, sânna te, thil dang châknate ai hian dah hmasak tur Pathian thu buaipui ila. Heng zawng zawng hi pêkin, chinfel sakin kan awm dawn a ni.

 

*Lalpan malsawm rawh se.*

*PATHIAN BAWM (PATHIAN THU), MALSAWMNA!* _(Father's Day pual)_ (June 20, 2021)

*Tin, Davida chuan Mikali hnênah chuan, "I pa leh a chhûngte zawng zawng aia mi thlang a, LALPA mi, Israelte chunga lala mi ruattu LALPA hmaah asin; LALPA hmaah chuan lam awm rêng ka ni alawm, Hêng ai mah hian ka la zahpuiawm ang, keimah pawh ka la insit cheu ang; amaherawhchu chung chhiahhlawh nula i sawite chawimawiin ka awm ang," a ti a.*

2 Samuela 6:21-22

 

Davida remruatna in mi ṭha thlanchhuah 30,000 hovin Pathian bawm chu Abidadaba in aṭangin tawlailir thar hmangin an phur chhuak a.

 

Davida khawpui (Jerusalem)a luh hma thla 3 chhung lek Git mi Obed-Edoma in a awm chhung ringawt pawhin Obed-Edoma leh a chhûngkua in malsawmna an dawng.

 

Davida khawpui (Jerusalem) ah Pathian bawm lakluh a an awm chu, an ram lalber Davida lawm lutuk chuan, a Lal kawr hlipin puanzaisîn a sin a, a chhiahhlawh nula ho zingah Pathian chawimawiin a lam ta zak zak mai.

 

A nupui (Lal Saula fanu) Milaki'n alo zahpui a. Mahse, Davida chuan mihring hma a lâm a nih lohzia leh Lalpa hma a lâm a nihzia sawiin, a aia nasa pawha Pathian ala fak tur a sawi zui ta a.

 

Pathian bâwm (Pathian thu) kawltu Obed-Edoma leh a chhungkua in Pathian bawm an kawl a, malsawmna an dawng ang hian, chhungkaw pa ber leh chhungtin hian Pathian thu (Pathian bawm) hi dah pawimawhin, ngaihluin, zâwm ila. Chu chu chhungkua in Pathian malsawm dawnna hnâr a ni.

 

Tin, Israel ram lalber Davida meuhvin a lal thuam hlîp a, a ropuina kalsana Pathian bawm buaipui a, chu Pathian bawmin an khawpui Jerusalem a luh avanga a hlim a, Pathian faka a lam ang hian chhungkaw hotu (Pa) berin khawvel thilte dah a, Pathian thu kan buaipui chuan ram, chhungkua in Pathian awmpuina, malsawmna kan dawng ang. Davida, Pathian bâwm buaipuitu pawh Israel ram lal atan kum 40 Lalpan mal a sawm a nih kha.

 

Pathian fak leh chawimawi tu Davida lo nuih zata, lo zahpuitu Milaki (Lal Saula fanu) chuan a thih thlengin fa a nei thei ta lo. _(Juda ho ngaihdanah chuan fa neih theihloh hi Pathian ânchhia anga ngaiha ni a.)_

 

Pathian fak leh chawimawi sawisel, zahpui hi Pathian ânchhia dawnna te pawh alo ni thei dawn a ni.

 

Chuvangin, Davidan Pathian bawm a buaipuia, a lâwm ang hian chhungtin hian Pathian thu buaipui ila, lâwm ila. Chu chu Pathian duh dan leh a malsawmna kalkawng a ni.

 

*Lalpan malsawm rawh se.*

*MI Â / MIFING!* (June 19, 2021)

 

*Nimahsela, Pathianin a hnenah, ‘Mi â, zaninah hian i thlarau an laksak dawn che a ni; i thil dehchhuahte kha tu ta nge ni ta ang le?’ a ti a.* Luka 12:20

Mi tu emawin Isua hnenah "Zirtirtu, ka u hnênah ro mi sem ve turin hrilh rawh" a ti a.

Isua kha an unau inkara ro sem turin a sawm a.

 

Mahse, Isuan a kam khat rualin, a fuih zui a. _"Fimkhur ula, awhna reng reng lakah chuan inveng rawh u; sum ngah hi mihring dam chhan a ni lo ve,"_ a ti zui a.

 

Chumi hnuah chuan he tehkhin thu Luka 12:20 hi a sawi zui ta a. Mahni tana sum khâwla, Pathian lama ngah silo chu *mi â* a ti a ni.

 

Lei lamah ṭhahnem kan ngaia, kan inkhawl ṭûn a ni thei. Mahse, damchhan a tling lova. Khawvela mahni hlawkna leh mahni hmasial quit ṭhak tura awm kan nilo. Chutianga nung te chu mi â zawk an lo ni.

 

Tin, diklo taka hausak leh lakluh chu Jeremia 17:11 ah chuan _Mi, kut tling lova lo hausa chu varung, mahni tui ni lo awp keu ang a ni a, A la dam laiin amah an hransan ang a, A tawpah chuan mi â a lo ni mai ang_ tih kan hmu a.

 

Zankhat thilthu a engmahlo chang thei khawvel rosum leh thil hlu aiin Pathian dah pawimawh ila *mifing* kan lo ni ang.

 

Pathian hian engkim a chhuichhuak a, min hmu a, min hre vek a. A mit hmuha mifing kan nih hi a duh a ni.

 

*Lalpan malsawm rawh se.*

*SIMNA* (June 19, 2021)

 

*Tin, ani chuan, “Lalpa, tuman mi chantir lo ve,” a ti a. Tin, Isuan, “Kei pawhin thiam loh ka chantir lo va che; kal la, tun hnuah tisual leh tawh suh,” a ti a.* Johana 8:11

Simna chungchang hi kan Bible zirtirna laimu pawimawh tak a ni a. Thuthlung hlui lama Pathianin Simna a ngaih pawimawh zia kan hria.

 

Thuthlung thar lam ah pawh *simna* ngaih pawimawhna hlir kan hmu a. Baptistu Johana thuhril leh thuchah hmasaber pawh *"Sim rawh u, Vanram chu a hnai tawh e"* (Matthaia 3:2) tiin uar takin *simna* thu a tlangau puia.

 

Isua pawh hian Uirenu, a uire lai ngei an mana, Juda dâna denhlum tur hnenah pawh hian tisual chhunzawm lo turin *Sim* turin a chah a.

 

Isua zirtir Petera te pawhin Thlarau Thianghlim an chana, chanchin ṭha an hrilh bul ṭanna, an au pui leh ngaih pawimawh em em chu *simna* thu bawk a ni.

 

Tirhkohte 2:38 _Tin, Petera chuan an hnenah, “Sim ula, in sual ngaihdam nan Isua Krista hmingin baptisma chang theuh rawh u; tichuan Thlarau Thianghlim pek hi in hmu ang._

 

Ringtute hi 'Isua Krista thisena tlan ka ni a lawm' tiin Isua min tlanna chu kan chhandamna famkim a ni. Chutih ruala Isua kan zuina kawngah kan sualte kan sim lohva, kan chin ṭhin thil ṭhalote kan sim loh chuan Van kawngkhar khi kan tan a in hawng thei dawn tlat lo a ni.

 

Baptistu Johana'n Luka 3:8 ah _‘Abrahama kan thlahtu a ni alawm’ in rilruin ti mai suh ang che u;_ a ti ang hian, ringtute hian Isua kan neih hnua kan tih ve tur *simna* hi kan ngaih thah fo ṭhin. Kan sim ve tur lam kan hlamchhiah hi Diabola min bumna a ni.

 

Vanlalsailova hla in-

_"Simna tello pianthar a tawk lo ve,_

_Kross thleng lova nun chan ten chhandam an hloh si lo,_

_Sual haw lo mualpho hlau mai ringtu chu,_

_Tihboral in an la awm dawn e."_

 

*Lalpan malsawm rawh se.*

*KRISTA AIA PALAI KAN NI* (June 18, 2021)

 *"Tin, ngai teh u, ka Pa thil tiam chu in chungah ka rawn tir dawn e; nimahsela chung lam ata thiltihtheihnaa an thuam hma loh che u zawng khawpuiah hian awm reng rawh u," a ti a.*

Luka 24:49

Lal Isua thihna hneha a thawhleh hnua a zirtirte hnena a thuchah/a sawi hrang hrangte hi ngun taka ngaihtuah hian kan Lal Isua hi ṭhahnem ava ngai êm!

 

Matthaia 28:18-20 ah chuan _Tichuan, Isua chu an hnenah a lo kal a, anniho chu a bia a, *"Lei leh vana thuneihna zawng zawng ka hnenah pek a ni tawh. Chutichuan kal ula, hnam tina mi zirtirahte siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u. Tin, ngai teh u, kei kumkhuain, khawvel tawp thleng pawhin, inhnenah ka awm zel ang,"* a ti a._

 

He leia thuneihna Pathianin Adama te a pek, Eden bawhchhiatna avanga kan hloh tawh chu Krawsah min laklet sak a. Chu thuneihna hmang chuan mi zawng zawng, thilsiam zawng zawng hnena chanchin ṭha hril tura a tirh te hi midang ni lovin he thu chhiartu *nang leh kei* hi kan ni. Amen Halleluiah.

 

Chu khawvelah chuan van aṭanga paih thlak setana leh a tirhkohte an phe vêl reng tih hria in (amah Isua ngei pawh thlêma nih kha) Isua hian 'chunglam thitihtheihnaa thuama in awm loh chuan khawpuiah (Jerusalem) a awm tura a fuih na chhan hi' a hriat chian em avang a ni.

 

Kan buante hi tisa leh thisen an ni si lova. Chung ho chetzia, mizia kan hriat theih nan chuan *chung lam ata thiltihtheihna a thuam* kan ngai tih min hriatpui a ni.

 

Chunglam thiltihtheihna *Thlarau Thianghlim* chu pentecost ni ah lo thlengin, Isuan a aiawhin a rawntir a. Chu chuan Pathian ringtu (nang leh kei) hi min chenchilh a, kan chhungah hian a awm a ni. Lalpa chu fakin awm rawh se. (Pathian ringlo tute ah a awm ve lo).

 

Chu Thlarau Thianghlim kawltu kan entawn tura in pe Tirhkoh Paula ṭawngkam chhuak (1 Korinth 11:1) _Mi zirtute ni rawh u, kei pawh Krista zirtu ka ni ang bawk hian_ titu nun hi en ila.

 

Tirhkohte 19:11-12 *Tin, Pathianin Paula kutin thilmak namen a tihtir lo va; chutichuan a taksa ata inhrukna puante emaw, fenthuahte emaw damlote hnenah an rawn keng a, an nate a reh thin a, an kawchhung ata ramhuaite pawh an chhuak thin a* kan hmu.

 

Paula hnena Thlarau Thianghlim hi i hnenah, ka hnenah a awm a. Tuna kan hnena awm ve talo- Kathryn Kuhlman hnenah te, Rev. Billy Graham hnenah te, Reinhard Bonnke hnenah te, Prophet TB Joshua hnenah te, tuna khawvel pum huap rawngbawltu ropui tak tak te hnenah vawiin thlengin nasa takin a inpuang (revealed) mek a.

 

Chutiang taka khawvel thilsiam zawng zawng hnena ṭhahnem ngai taka Isua chanchin ṭha thutak leh setana hnehna thu puang turin Lalpan i kut lo chu kut dang a neilo. I sawia, i puanchhuah loh chuan tu nge puang ta ang.

 

*Lalpan malsawm rawh se.*

*INTHLAHDAH A PAWI* (June 17, 2021)

*‘Davida, Jesaia fa, ka thinlung ang pu mi ka char ta, ani chuan ka duhzawng ang apiang a ti ang,’ a ti a.* Tirhkohte 13:22 

_Ani chu sar veng vawng, mit meng mawi tak, hmêlṭha tak a ni_ (1 Samuela 16:12) a tih chu Tleirawl *Davida* a ni a. Lalpan Lal turin zawlnei Samuela kaltlangin malsawmna hriak a thih a.

 

Hriak thih a chan hnu hian Lalṭhuthleng luah mai lovin Davida hian fiahna rothap tak tak a paltlanga. Thihna hlim kawrruam zawhin thlalerahte, pûkah te a bibo zak zak a. Chûng fiahna hrang hrang kum 15 vel a paltlanga, a pass hnuah chuan Lalṭhuthleng a hruai thleng chauh a ni.

 

Lalpa hian kan hmaah malsawmna (lalṭhuthleng) min hûnsak a. Chu malsawmna kalkawng erawhchu fiahna a ni fo ṭhin. Chu fiahna chu a rei emaw reilo emaw kan pass hunah 'malsawmna' kan chang thei chauh a ni.

 

Davida chu kum 30 mi lek niin Lalṭhutthleng a luah a. Kum 40 chhung a lal a. Pathianin mal a sawm nasa hle mai.

 

Mahse, indo laiin lalber Davida chu indona lama kal lovin Lal in chungzawlah a lo hawi mai mai a. Pathian huat zawng mipat hmeichhiatna suala tluin "uirena" khurah a tlu lut a. Chu a thiltih sual thup nan chuan tualthahna in a zui a ni.

 

Keini pawh Pathian hmangaihtu, a rawngbawltu, a thinlung ang pumi kan nih tawh hnu hian he khawvel setana nena kan indonaah hian tha thlaha, kan in thlahdah a, kan awm mai mai chuan Pathian huat zawng leh chhiatna tihna khurah kan tlu lut leh thei a ni.

 

Nitin inthlahdah lova, Pathian duh dan a kan nun hi, setana thang laka kan himna a ni.

 

*Lalpan malsawm rawh se.*

*CHAWNGHEI (FASTING)* (June 16, 2021)

 

Bible hian chawnghei hi a ngai thupuiin a ngai pawimawh em em a.

Thuthlung hlui lamah pawh vawi duailo kan hmu a. Chung zinga mi 2 lek lo la chhuak ila.

 

*1.* Juda hote rawn bei tura Moab hote, Ammon hote leh midang tam tak rawn thawkte bei turin chakna theihna an neilo, an hlauva, an zam a. Mahse, an ralthuam ṭha tak chu chawngheia Lalpa lam hawi a ni. (2 Chronicles 20:3)

 

Lalpan a chhâng chiang kher mai. _"He indona hi in beih a ngai lo vang: inzar ula, ding ngawt mai ula, in lama tan LALPA chhandamna chu en reng mai rawh u, aw Juda mite leh Jerusalem mite u: hlau suh ula, zam hek suh u, naktukah bei tûrin thawk rawh u, LALPA chu in lamah a tang si ," a ti a._ 2 Chronicles 20:17 

 

*2.* Judate suat tura Hamana ruahmanna dan chah leh tihtawpsak na hmanrua chu Judate in ngaihtlawmna leh chawngheia ṭawngṭaina a ni a. (Estheri 4:3)

 

Lalpan a chhang chiang kher mai. _Chutichuan lal Ahasuera chuan lalnu Estheri leh Juda mi Mordekaia hnênah chuan, "Ngai teh u, Judate chunga a kut a thlâk avângin Hamana in chu Estheri ka pe a, amah pawh chu an awhhlumtir ta a. Tin, Judate hnênah i duh ang takin lal hminga thawn tûr lehkha ziak bawk la, lal zungbuna nemin char rawh; lal hminga ziak leh lal zungbuna nem leh char chu tuman an tidanglam thei lo a ni," a ti a._ Estheri 8:7-8

 

Thuthlung thar lamah pawh hian chawnghei hi a turah an ngai a. *Nang erawh chuan _chaw i nghei hunin_ sahriak thih la, i hmai phih rawh;* Matthaia 6:17.

Pathian kan biak pawhna tur leh ama tan kan in serh hranna chhinchhiahna atan *chawnghei* hi Lalpan a ngai a ni.

 

Tin, Isua hnenah Mipa naupang phungzawl, vawi tam tak meiah te, tuiah te tlu ṭhin an rawn hruaia. A zirtir ten an ṭawngṭai sak pawha dam theilo Isuan a tihdam ṭum khan *Isuan "Hetiang hi tawngtai leh chaw nghei chauh lo chuan a chhuak ṭhin lo"* Matthaia 17:21 kan hmu a.

 

Kan ṭawngṭaina chhâna a awmna tur hian mahni insengso va, tlawmna nen _chawngheia_ Lalpa kan kar a ngai ṭhin.

 

*Lalpan malsawm rawh se.*

*NGAMNA IN KAN ÛM LÊT TURA NI.* (June 15, 2021)

 *"Tichuan, Davida chuan virvawm leh lungtêin Philistia mi chu a that a. Davida chuan khandaih pawh a keng ve lo."* (I Samuela 17:50 MKJV)

Kan hma a hian kan beih tur, kan hmachhawn tur Goliatha alo ding ṭhin. Kan Goliatha erawh chu a in ang lovang. Kan Goliatha chu - Zunthlum, Cancer, Thisen sang, Anxiety, Depression, Covid-19, kan thinchhiatna, duhâmna, mahni hmasialna, lansarh duhna, ropui duhna, damchhung khawsak lungkhamna leh chi hrang hrang a ni thei.

 

Davida'n Goliatha bei tura Lal Saula thuam a inbela, mahse a kalpui zo lova, a hmang theilova, a hlip ang hian kan nuna Goliatha kan beihna tur chu he khawvel ralthuam ropuite ni lovin keini ringtute ralthuam chu *Pathian thu* leh *Ṭawngṭaina* (virvawm leh lungtê) a ni.

 

A dawt leh chiah hi kan chhiar chhunzawm a ngai. I Samuela 17:52 ah chuan Philistia palian Goliatha thah a nih hnu chuan _'Israel sipaite chu an in lamah an haw ta a'_ *tih kan hmulo.* 

 

An hlauh ber Davida'na hneh sak hnu chuan Israel sipaite chuan Philistia sipai rualte chu *ngamna in an ûm let ta a, an that a, an hneh ta a ni.*

 

Kan hma a Goliatha hi Pathian thu leh Ṭawngṭaina hmanga kan beih chuan Lal Isuan min hnehsak ngei ngei dawn a. Hnehsaka kan awm hnuah chuan *ngamna in setana kan ûm anga, a ram kan ṭhiat zui tur a ni.*

 

*Lalpan malsawm rawh se.*

*SAULA LEH DAVIDA* (June, 14, 2021)

 *SAULA:* Pathian thu a awih loh avanga lal atana a hnawl chu Pathian tirhin a hnenah thlarau sual a lo lut a. 

 Saula hnenah thlarau sual a awm a ni tih hi, thlarau sualin a tihbuai ve loh a chhiahhlawh ten an lo hre thei tlat (I Sam 16:15)

 

*DAVIDA:* Samuelan Lalpa tirha lal tura hriak a thih hnuin Lalpa Thlarau chu Davida chhungah alo thleng a.

 

Davida chunga Lalpa Thlarau lo thleng hi thlarau sualin a chenchilh Saula'n a lo hre thei thung (I Sam. 16:21-22).

 

Kan hnena thlarau awm hi kan sawi ngai lovin kan bula mite hian an lo hre thei a. Intih thlarau mi emaw intih khawvel mi hran ngailo hian kan bula mite hian an lo hre (feel) thei a ni.

 

Chumi dawta ropui leh em em chu thlarau sual kawltute hi Lalpa Thlarau kawltute avangin harhna, damna an chang ṭhin a ni.

 

_*Nang leh kei hi Isua Krista zarah Thlarau Thianghlim (Lalpa Thlarau) kawltu kan ni hi ava ropui em!*_

 

*Lalpan malsawm rawh se.*

*INTHAWINA AIIN THUAWIHNA* (June 14, 2021)

*.."LALPA chuan LALPA thu zawm chu a lawm angin hâlral thilhlante leh inthawinate hi a lawm em ni? Ngai teh, inthawina aiin thuawih chu a tha zawk a, berâmpa thau aiin a thu pawm chu a tha zawk a ni..."* 1 Samuela 15:22

 

Pathian thu Samuela hnena lo thleng angin Israel Lal Saula chu Amalek ho that chimit vek tura thupek a ni a.

 

Suala chuan Pathian thu ṭhenkhat zawmin, ṭhenkhat a mipuite a hlauhthawn avang leh an thu a ngaihchân luat avangin a zawm famkim lova. Pathian thin a ur ta.

 

Amalek ho te chu a that ngei a. Mahse, Amalek ho Beram leh Bawng thau ṭha ṭhate a zuah a, a hawn a. Heng rallak thilte hi Saula hian Lalpa hnena inthawi nan a ti tho chungin, Lalpa erawh a lawm hlek lo.

Amalek ho laka an thil hawn hi Saula hian an mahni tan ti lovin Lalpa hnena hla tur atan ti tho mahse Lalpan a lungawi miah lo.

 

Lalpa thu a awih lohna tak hi Pathian ti thinur tu a ni.

 

Keini, ringtute pawh hi Pathian hian a hnena thilpêk tur pawisa, rohlu leh thilpek hlu tak tak aiin *a thu kan awihna* hi kan nuna a phût a ni a.

 

Tin, Pathian hnena kan thilpêk tur pawh hi dik leh thianghlim taka kan neih, kan lakluh a phût a. Diklo taka (râl lak thil) kan hawn Pathian hnena kan hlan hi Lalpa tan rimtui a nilo.

 

Lal Saula hian Lalpa aiin a mipuite a venthâwn leh a ngaihchân luat hi a lalthutthleng a chânna bul a ni ang hian kan nunah Lalpa aia khawvel thil kan dah pawimawh, leh kan buaipui hi kan chêtchhiatna bul a ni fo.

 

Chuvangin kan nunah Lalpa kan dah hmasak hi Pathian malsawmna (lalṭhutthleng) kan luahna/channa a ni. A thu kan awih hi Lalpan a ngaih pawimawh leh a phût chu a ni.

 

*Lalpan malsawm rawh se.*

*PERSONAL PROTECTIVE EQUIPMENT (PPE)* (June 13, 2021)

 Tunlai hripui enkawlna hmunah chuan PPE ha lo tan chuan a luh ngawt theih lova. Lut tur chuan PPE a inthuam a ngai thin.

Chutiang chiah chuan Van Khawpui lut turin kan mihring taksa pu in emaw heti ngawt hian a luh theih lova. Lut tur bikte inthuamna (Vanthuam PPE) a inthuam a ngai a. Chu PPE chu lei ngai lovin Pathianin Bethlehem-Kalvary tlang suih zawmin min rawn thui sak a, a thlawnin min rawn pe ta ani. _Lalpa chu fakin awm rawh se._

 

Chu PPE ha tu apiangte tan chuan Van khawpui kawngkhar hawnin a awm dawn a ni. Vanlam PPE la dawng lo chuan tunah Isua hnenah a thlawnin lak tur a awm e.

 

*Lalpan malsawm rawh se.*

*ṬAWNGKA CHHUAK THILTIHTHEIHNA* (June 13, 2021)

*Tin, Josuan mipuite chu, "Au suh ula, in aw pawh hriat ni suh sela, au tura thu ka pêk ni che u a thlen hma loh chuan in ka atangin thu reng reng chhuak hek suh se,...."* Josua 6:10

 

Pathian thu aia khawvel thil sawi tam zawk ṭhin kan ni fova. Kan damna aia kan natna, kan buaina, kan chaklohna sawi tam zawk kan ni fo ṭhin.

 

Israel fate pawh hi Pathian hma a vui reng mai, thil engkim sawisel reng mai an nih avang khan, kulh ropui Jeriko an hma a a din luah lai khan Josua hian a khap a ni. 

 

Josua hian khap lose chu an hmaa kulh lian leh ropui tak Jeriko pawh kha an hupphurh thu leh an hneh theihloh tur thu sawiin an phun nuai nuai dawn tih a hriat avangin *in ka atangin thu reng reng chhuak hek suh se* tiin a warning lawk a ni.

 

Kan Pathian thu ah chuan _"Miin a tawngkam chhuak rah chu a seng ang a, Ama kut thiltih ngei chu a hnena hlan a ni ang."_ Thufingte 12:14 a awm a.

 

Kan ka a kan sawi hi a a ṭha zawng leh a chhe zawngin thil a thi thei (powerful) em em a. Chuvangin kan ṭawngka chhuak hi kan ven fimkhur a ngai a ni.

 

Kan tunlai hripui lên lai boruakah pawh hian "Hripui hlauhawmzia nge kan sawi tam, Pathian thiltihtheihzia? Kan natna, kan chaklohna nge kan sawi tam, kan damna Isua chanchin?" Kan ka a kan sawi tam hian kan nun a kaihruai thui em em a ni.

 

Chuvangin, Isua a kan damna, kan chakna, kan thiltihtheihna, hnehtu kan nihna hi sawichhuak tam a pawimawh.

 

Josua'n "Au rawh u khai, Lalpan khawpui hi a pe tawh che u asin.." ti a hrilh hnua an auva, an hma a Jeriko kulh tih chim saka an awm ang, Pathian hminga hnehna kan puan hian khan kan hma a Jeriko kulh hi hnehsakin, tih chim sakin kan awm ṭhin dawn a ni.

 

*“I ka (mouth) in Isua chu Lalpa a ni tih i ṭan a, Mitthi zing ata Pathianin a kai tho tih i thinlunga i rin chuan chhandamin i awm ang"* Rom 10:9

 

*Lalpan malsawm rawh se.*

KAN RIN ISUA ROPUI VÂNG ALAWM!* (June 12, 2021)

*Tin, chutia a tawng zawh veleh chuan aw ring takin, “Lazar, lo chhuak rawh,” a ti a, a au va. Tin, mitthi chu a kut, a ke thlan puana tuam chungin a lo chhuak ta a, a hmai pawh inhrûkna puana tuam a ni a. Isuan an hnenah, “Phelh ula, kaltir rawh u,” a ti a.* Johana 11:43-44

 

Isua hnenah kan nate, kan chaklohnate, kan buaina chi hrang hrangte kan thlen a. A châng chuan 'kan aw a hreta lo emaw'n chu' tih turin a reh vung vung ṭhin.

Tin, ringtu tam tak chuan "mite angin ka inring dam ve zo lo, ka ring thiamlo" kan ti ṭhin. Ṭhenkhat chuan, "damna te chu ringtu tute emaw chan bîk tur, an hnena thleng bîk turah" an ngai fo ṭhin.

 

Tute chan bîk tur, tute hnena thleng bîk tur nitase, Isua hi khawvel dam nan ni lovin mi ṭhenkhat dam nan chauh va lokal a ni anga. Mitin a huapzo a nilo tihna a ni dawn asin.

 

Chuti a nih chuan *"Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e."* Johana 3:17 (Bible chang tam tak pawh a awm thei e) hi dâwt a nita em ni?

 

*Teuh lo mai.* _"......Thu chu Pathian hnenah a awm, Thu chu Pathian a ni."_ Johana 1:1

 

Chuti alo nih takah chuan Pathian thu (Bible) kan chhiar hian Pathian nen kan lêngdun/kan inbia alo ni reng.

 

Chutichu, Lalzara kha inring dam turin *a thi* tawh a, thlanah lung lianpuia khâr hnan a ni tawh. Mahse, damin alo tho/chhuak tlat si.

 

Lazara rinna lam ni lovin, a lo ṭan ve vak lam nilovin, a ko tu *Isua* hi a ropui êm avangin, alo tho mai a ni. 

 

Chuvangin, keini natna chi hrang hrang in a tlakbuak mêkte pawh kan innghahna, kan rin *Lal Isua* hi a ropui êm avangin, ama'n min lo tidam mai zawk a lo ni.

I rin (Ka rin) Isua hi a ropui êm avangin lo dam ang che.

 

*Lalpan malsawm rawh se.*

*EBENEZER* (June 12, 2021)

*"Tin, Israel mite chuan Baala-te leh Asterothi-te chu an dah bo ta a, LALPA rawng chauh chu an bâwl ta a."*

1 Samuela 7:4

 

Israel fate chu Philistia mite awp behin, an thuhnuaiah an awm a. A chhan pawh Pathian tak nilo, pathian lem hma a an kûn tak vâng a ni.

 

Chutia hrehawm taka an awm lai chuan Pathian mi zawlnei Samuela hnenah thu alo thleng ta, mipuite chu Mizpe khuaah a ko khawm vek a- _"In thinlung takzeta LALPA lam in hawi dawn tak tak chuan, ram dang pathiante leh Asterothi-te chu in zing ata dah bo daih ta che u, in thinlung chu LALPA tan buatsaih ula, ama rawng chauh bawl rawh u, tichuan Philistia mite kut ata hi a chhanchhuak dawn che u nia."_ (1 Samuela 7:3)

 

Samuela thusawi chu zawmin pathian lem (Baal leh Astorethi) te chu dah bovin Lalpa rawng chauh an bawl ta.

 

Chumi hnuah chuan an mahni ti duhdahtu Philistia ho lo thawk leh chu Lalpan *khawpui ri nasa tak hmangin* a zuk ṭhawng ta a. Philistia ho chu hlauvin an tlan chhe ta a ni.

 

Lalpan a ṭanpui avang chuan, Samuela chuan lung a la a, Mizpe leh Sen inkarah chuan a phun a, _"Hei leh chen hi LALPAN min pui a ni,"_ tiin a hmingah chuan *Ebenezer (Stone of help)* a vuah ta a (1 Sam. 7:12).

 

He thu mawi tak hi hmun hmingah te, In hmingah te, hla ah te kan sa in, kristian te zingah chawilar a hlawh hle mai.

 

Mahse, 'Ebenezer' lo in ṭanna tak chu *Lalpa hnena kir a, Lalpa tan thinlung buatsaih a, khawvel thilte paih a, Lalpa rawng chauh bawl"* aṭanga inṭan leh lo thleng a ni.

 

Kan nunah khawvel thilte kalsan/paiha, Pathian rawng chauh kan bawl chuan Lalpa ṭanpuina ropui tak (Ebenezer) alo thleng ṭhin dawn a ni.

 

*Lalpan malsawm rawh se.*