*Chutichuan a hun a thleng dawn ta, tunah pawh a thleng tawh mêk, chu mi hunah chuan Pathian chibai buktu taktak ten thlarau leh tih tak zetin Pa chibai an buk ang, Pain chutiang mi chu a chibai bûktu turin a zawng a ni. Pathian chu Thlarau a ni; a chibai buktu ten thlarau leh tih tak zetin chibai an buk tur a ni,” a ti a.* Johana 4:23-24
He Bible châng lar leh pawimawh tak hi Isuan mipui tam tak hma a a sawi ni lovin, Sukar hmuna Jakoba tuichhunchhuah bula Samari mi, nawhchizuar pasal 5 nei tawh, midang tui chawi rual pawha tui chawi ve ngam lo, chhun chawkfak hunlai, mi reh lai chânga tui chawi hnena a sawi a ni a.
Isua hian *Messia, Krista* a nih thu hi temple ah te, mipui pungkhawm hmaah te a sawi lang duh lo mai nilovin, an hriat a hlau em em a. Chutih laiin, Juda ten engah maha an hman ngai loh Samari hmeichhia, nawhchizuar hnenah leh nghal a inpuang tlat lawisi hi a ropui a ni. *Lalpa chu fakin awm rawh se.*
Khawvela a lênlai aṭang tawh khan he khawvel ngaiha mi ropui, mifing (pharisai & lehkhaziaktute), sakhaw puipa, kohhran hnarkaitute hnenah nilo, daikil kar mi leh mi fello, mi ṭhalo, mi tlawmte hnenah a inpuang ṭhin a. Tin, an buaipui leh an chhuan em em Temple a tlawh ṭum te khan *Isuan an hnenah, “He in hi tichhia ulang, ni thum chhungin ka tungding leh ang,”* Johana 2:19 a ti duh lek a.
Lal Isuan a ngaih pawimawh leh a target ber chu mihring a ni a. An chhuan em em an temple ropui aiin mimal a luh chilh chat chat zel a ni.
Bible a châng lar leh pawimawh em em mai, Bible thu fûnkhawm tu, mitinin en lova kan sawi theih Johana 3:16-17 _Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan. Khawvel thiam loh chantir turin Pathianin a Fa khawvelah a tir lo, khawvel amah avanga an dam theihna turin a tir a ni zawk e._ tih te pawh hi Isuan Nikodema (mimal) a counseling na a a sawi a ni.
Pathian hian kan mimal nun ṭheuh hi a ngai pawimawh a, a ngai hlu a. Chuvang tak chuan keimahni theuh hi Pathian ngaihin kan hlu a.
_Kan hnena inpuang ṭhin Pathian Engkimtithei kan nei hi kan va vannei em!_
*Lalpa chu fakin awm rawh se.*
No comments:
Post a Comment