KRAWS THU!

 

“Kraws thu chu boral mêkte tân chuan âtna a ni si a; keini chhandam mêkte tân erawh chuan Pathian thiltihtheihna a ni zâwk e.” I Korinth 1:18

             Boral mekte tana âtna, chhandam mêkte tana Pathian thiltihtheihna chu a fiah tawh sa teh reng nen, kan nuna awmze neia tam leh zuala rah a chhuah theih nan i han bihchiang dawn ang hmiang. 

            Kraws chu misual tawp, khawvelah dam ve tlaklo te hremna leh an tihhlumna (capital punishment) hmun a ni. Kraws a khai kan te chu ânchhe dawng an ni. Isua kraws a an khenbeh hma hian Rom lalramah misual tawrawt bikte hremna/tihhlumna (capital punishment) atana hman thin a ni. Mahse, Rom lalramah hian kraws lera khenbeh meuh tur chuan Rom khua leh tuite (Rome citizens) an hrem ve ngai lo. Kaisara (Tiberius Caesar Augustus) a lalna hnuaia Judai ram Governor Pilata (Marcus Pontius Pilate) a chuan kraws a khenbeh turin Isua chu a pe ta a. Rom sipaiten nasa takin an nghaisa a, a silhfen te an hlihsak vek a. Amah khenbehna tur kraws pu in ‘luruhhmun’ (Greek: Golgotha) lam an panpui a. Isua kraws putna kawng (Via Dolorosa) hi kawng chho 70% a ni a, a bak 30% vel hi zawl leh chhuk deuh a ni. (Source Isua kraws put kawng! : Rev. Chuauthuama) Chuti a nih chuan ringtu zinkawng nena hmeh bel theih turin Kraws kawng hi kawng ngil leh awlsam a ni lo tih kan hre thei bawk ang. Kalvari (Grk.-Golgothâ; Lat.-Calvariae) ah chuan ah an khengbet ta a ni. Chuta chinah chuan kraws chuan a nihna alo thlak ta a. Miten an thinhrik, misualte khenbehna hmun thing ânchhedawng kraws chu Pathian thiltihtheihna alo ni ta a ni. 

            Chu Pathian thiltihtheihna, a fapa Isua Krista meuh thihna chuan vawiin thlengin khawvelah awmze neiin mitin nunah thu ala sawi reng a. Mi sual berte nun a sawi danglama, mifel berte nun a chingral mek zel a nih hi. Kum sangtam ral hnuah pawh chu kraws chuan a hlutna leh a nihna ala hloh lova. Chu kraws a thisen chhuak chuan mi sang tam tak sual senlar anga sen tawh pawh vur aia varin a silfai thin hi a mak a ni. Nang leh kei pawh krawsa thisen chuan min tlengfaia, min tidama, min ti thianghlim a nih hi. A ropui ngawt mai! Lalpa chu fakin awm rawh se. 

Upa Sanglianthanga hla in mawi takin min chhawpchhuah saka-

    Anchhedawng thing Krista thihna chu,

    Ka thihnaah Lalpan min puan sak ta;

    Adama mihrinna chu hlip thla in,

    Krawsah ngei chuan min ti boral ta si.

             Kraws chu misual dum ber avarna a ni a. Kraws lera thi a nun hlantu Isua Krista thihna chuan kan nâ (pains) zawng zawngte phura, a thihpui tawh avangin, Isua Krista neitute chu natna laka fihlim/tihdam kan ni a. Kraws lera thi a nun hlantu Isua Krista thihna chuan kan sualna zawng zawngte phura, a thihpui tawh avangin, Isua Krista neitute chu Pathian mit hmuhah mifel kan lo ni ta a. Eden bawhchhiatna avanga mihringte a Pathian ânchhia zawng zawng kha, kraws lera thi a nun hlantu Isua Kristaah Pathian a lungawi tawh avangin Isua Krista neitute chu ânchhe lak atanga fihlim kan lo nita a. Eden bawhchhiatna avanga Pathian nena in mihran tawh, inzawmna nei thei tawh lo kha, kraws lera thi a nun hlantu Isua Krista ah Pathian a lungawi tawh avangin Isua Krista neitute chu Pathian nena nun inzawmna neiin, ‘Abba’ ka pa tiin kan mamawh tinreng kan thlen leh thei ta a. Eden bawhchhiatna avanga Pathian fa nihna hloh tawh, Pathian laka mihrang tawh kha, kraws lera Isua Krista tihnaah Pathian a lungawi tawh avangin, Isua Krista neitute chu Pathian fa a vuah kan lo ni leh ta a ni.

         Rev. Taisena hla hian fiah takin hlaah min lo puanchhuah saka-    

    Eden hunah Setana'n kan lallukhum min chhuh hnu kha,

    Tunah hian kan Lal Isuan a hneh a, min rawn pe leh ta.

    Lalpa chu fakin awm sela. Lalpan malsawm che rawh se.