I NGHAWNG PHUAR PHELH RAWH

PC. Lianhmingthanga

“Aw Jerusalem, i vaivut kai kha inthing rawh; tho la thu rawh; aw Zion fanu, sala awm, i nghawngphuar kha phelh rawh. Lalpa chuan heti hian a ti sia, “Engmah lovah nangmah i inhralha, tangka lovin tlan i ni tawh ang,’ tiin (Isaia 52:33).

Jerusalema cheng Juda hote hian Pathian tluksanin tih loh loh an ti a, thil bawlhhlawh tiin an tal bal hle ni tur a ni. Zu ruite leiah an mu mai mai a, vaivutte an kai ang hian, an bawlhhlawh kai te chu inthing fai turin Zawlnei hmangin Lalpan a hriattir a ni. Jerusalema chengte chu LALPA an rinloh avanga, sala awm a, tihduhdah leh phuar an ni. Zawlnei hmangin Lalpa Pathian chuan thoharha, thu chhuak a,sal ata inchhuahtir a, an zalen lohna nghawng phuarte chu phelh turin a hrilh a ni. An mahnin an zir loh avangin engmah lovah an mahni an in hralha, Lalpa lam an hawi chuan tangka ngai lova tlanchhuah an ni dawn ani tiin a hrilh a ni. Chutiang chuan ringtu inti te hi, LALPA kan rinloh avangin sual salah kan tanga, engmah lovah kan inhralha, nghawng phuar ang maiin kan awm thin a ni.

NGHAWNG PHUARTE

‘Nghawng phuar’ tih leh ‘Nghawnga hruia hlin’ hi a awmzia a thuhmun mai awm e. Nghawnga phuar emaw nghawnga hruia hlin emaw chu duh anga zalen lo, sala tang dinhmun a ding tihna a ni. Nghawnga phuar chuan a duh lam lama kal turin a thei lo, nghawnga hruia hlin pawh chutiang tho chu a ni. Jerusalem Zion - khawpui hi mi thu-hnuaiah kûnin, zalen lo takin a awm, a duh ang angin a awm thei lo, a nghawngah phuar ani tlat. Mi tam tak te, Pathian lam hawi lova, an rilru leh tisa duhzawng kawng zawhte hi Setanan hmuhtheih loh khaidiatin a hlinga, an nghawng a phuar sak thin a ni.

Zu duh ho hi, diabolan an nghawng a phuar saka, chiri mai dawnin an inhre thin a, zu an sim hlei thei lo, an ngam lo a ni zawk hial awm e. Drugs hmang sual hote hi diabolan an nghawnga phuara, a tha lo tih hre reng mahse an châkna hmangin a phuar tlat thin. Sex lama awm hlei laklawh hote hi diabolan an chakna hmanga an nghawng a phuar tlat; sal ang maia a kaih vir te an ni. Zuk leh hmuam thil; meizial, kuhva, sahdah, khaini hmang hian mi tam tak nghawng a phuara, an châkna hmangin a hling a, a kai dun dun mai thin. Rawngbawltu - Minister leh upa leh Evangelist te pawh hetianga an nghawnga phuar an tam mai. Engmah lovah anmahni an inhralh a, thiam takin hmelmapain an kamhleina leh châknain a hling tlat thin. A tha lo tih hre reng siin, an taksain a chak tlat si avangin nghawng phuar ang maiin an awm thin. Rinna silhfen mawi inbel thei lovin vaivut rim nam rumrum in, chiang kuang lo leh bawlhhlawh deuhvin an nung thin. Buanchaklo leh ngawlveite chu an langtlanga; rawngbawltu nghawng phuarte chu Bible phenah an biru a an mawng a lang reng tho si.

KRISTA NGHAWNG PHUAR PHELHNA LEH SILHFEN MAWI

Ringtute hi an chakna leh an zalenna, Krista Rinnaa an harh chhuah chuan; nghawng phuar phelhin a awm a, Silhfen mawi leh thianghlim Krista in an inthuam thin a ni. Rinlohna leh luhlula Krista lam hnaih duhlohna hi a pawi ber chu a ni. Judate pawh, Zion-Jerusalem khawpui pawh Lalpaa rinna an nghah loh chuan an finna leh chaknain an chhuak thei lo. Hnam dang thuhnuaia kûnin awpbeh an ni fo thin a ni. Ringtute hi harh ila, kan chakna Krista chu ring ila, kan nghawng phuar hi i phelh ang u. Kristan, a thihna leh tholehna hmangin diabola min hnehsak tawh a, sual phuarna min phelhsak tawh a ni. Rinnaa dingin kan nghawng phuar hi phelh mai tur a ni. Krista lovin nun i nei lova, chakna i nei hek lo. Amah chu ringa, i tana a tihsak che kha i hman mai hian; Krista chuan i inthuam a i nghawng phuar chu phelhin alo awm thin a ni. I sual rawngkai leh i vaivut kaite kha thing thla la, sal ata chhuah i ni, zalen i ni. Nangmah leh nangmah engmah lova i inhralh kha sim daih rawh. Krista thawhsakna che chu pawm la, tichuan tangka ni lova Krista Thisen Thianghlima tlan, khawngaihnaa chhandam i lo ni tak tak dawn a ni.

I NGHAWNG PHUAR PHELH RAWH LE:

Krista-ah i nun pum i hlan chuan, I mihring hlui, kamhleina leh tisa châknain a phuarna che chu; Kros-ah Krista ruala i mihringhlui khenbehnaah chuan i lo thihsan tawh ang a. Tho leh Krista nun chu i nun lo ni ve tawhin, a maruala kaithawh leh thiam chantir i nih i lo hrefiah tawh anga. Sal ata chhuah leh nghawng phuar phelh i nihna chu i nunpui ve tawh ang. Krista nun, Silhfen mawi chu miten i nunah an lo hmu tawh dawn a ni. Thil bawlhhlawh i melh ruk thin leh, i khawih ruk thin nun kha i lo hran san tawh anga, ringtu nun zalenna leh hlimna chu i lo hmang thei tawh dawn a ni. Aw Zion, aw ringtu, i nghawng phuar phelh rawh le. Tichuan, mihringhlui, tisa duh zawng chuan chhungrilah hmun a chang tawh lovanga, diabola chu pawn lam mi a lo ni tawh ang.

I CHAKNA INBEL RAWH

PC. Lianhmingthanga

“Aw Zion, harh la, harh la, i chakna inbel rawh: aw Jerusalem, khawpui thianghlim, i silhfen mawi takte chu in bel rawh. . .” (Isaia 52:1).

Zawlnei Isaia hian, LALPA hnen atanga Jerusalem Zion khawpui tana a thuchah dawn chu a puang a ni. Pathian hnam thlan, a mite, Jerusalem Zion a chengte; Lalpa an rin loh avanga hnam dangte tihduhdaha awm reng mai leh hnamdang sala awm reng maite chu, harha an chakna, Lalpa hre chhuak turin a au a ni. An chakna Lalpa chu inbela, an silhfen mawi ber Lalpa thupek chu an inthuam nana hmang turin, Zawlnei hian a hrilh a ni. Lalpa lovin chakna an nei lova, engmah an ni lo. Lalpa thu leh a thupek te chu an mawina ber leh an inthuamna tha ber a ni. Lalpa thu leh a thupek te an zawm loh chuan engmah lo, saruak mai an ni. Zawlnei hmang hian LALPA, an chakna chu inbel tur leh, an silhfen mawi, a thu awih tur leh a thu a inthuam turin a fuih a ni.

CHAKNA NEI LO KAN NI
Mihring hian diabola leh a hnathawh, sual do hneh turin chakna kan nei lo. Bawhchhiatni atang khan mihringte chu diabola fa, rulthlahah kan lut tawh a. Diabola duhzawng sual salah kan lut tawh a ni. Lal Isuan, “Nangni zawng in pa diabola hnena chhuak in ni a, in pa duhzawng tih in duh thin a ni,” a ti (John 8:44). A ni reng a, a tha lamah kan chak lova, a chhe lam sual kawngah kan chak thung a ni. Lal Davidan, “Ngaihteh, khawlohnaa dinin kan awm a; ka nu’n sualin mi paia a,”(Sam 51:5) a tih angin, diabola rawng kaiin sualin kan lo piang a, tichaktu, tinungtu kan mamawh a ni. Kan chaklohna kan man thiam lova, kan hre thei lo fo leh nghala. Kan chaklohna kan hriatfiah loh chuan, kan chakna pawh kan hre thiam leh bawk si lo.

Eden Huana thei eia harhchhuak Hriatna; diabola chhia leh tha hria hian kan nung roh a, â deuh si hian fingin kan inhre ve tlat thin. Tha nia kan hriatte hi Pathianin tha a lo ti lova, dik nia kan hriat te hi Pathianin dik a lo ti lo. Kan finna leh remhriatnate hi setana pum chhuak, diabola rawngkai an lo ni a. Pathian lah chuan, “Mi fing finna ka tiboral anga, Remhre remhriatna chu ka paih thla ang,” a ti hmiah mai si (Isaia 29:14; iKor 1:19). “Mifing chu khawiah nge ? Lehkhaziaktu chu khawiah nge ? He khawvela hnialtu chu khawiahnge ? Pathianin khawvel finna hi atthlak ani tih a hriattir lo em ni ?” Pathian thu in a ti (I Kor 1:20). Diabola leh a hote hian an duh zawngin, bawhchhiatni atang khan mihringte min khawih a, min lo bual â thin a lo ni. Natna leh chaklohna hri hmangin mihringte min tihduhdah a, accident (chetsualna) hmangin min khawih bawka; kan thi kan thi mai anih hi. Israelfate, Jerusalem, Zion khawpuia chengte pawh hian an chakna Lalpa an hre lova. An chakna Lalpa a ringa amah inbel (thuam a hman) nachang an hre lova. An silhfen mawi ber, a thupek leh a kaihhruaina thu awih nachang an hre lo a ni. Keini Tunlai ringtu, Kohhran, Pathian mite pawh hi kan chakna inbel nachang kan hriat a ngai. Kan silhfen mawi ber Pathian thu, Thlarau Thianghim sawmna kan awih a ngai a ni.

KAN CHAKNA LALPA A NI

Mosia chuan, “Lalpa chu ka chakna leh ka hla a ni.” a lo ti a (Exo 15:2). Davida chuan, “Chaknaa ka taia min hrengtu leh, ka kawng ti tha famkimtu Pathian chu,” tiin a sawi (Sam 18:32). Davida vek chuan, “Amah Israelho Pathian ngei chuan a mite hnenah chakna leh thiltihtheihna a pe thin ani,” a lo ti bawk a ni (Sam 68:35). Asapha fakna Hla chuan, “ . . . Pathian chu kum khuaa ka thinlung chakna tur leh ka chanvo tur a ni. Ngaiteh, nangmah hlata awmte chu an boral dawn sia . . .” a ti (Sam 73:26,27). Sam vek chuan, “Nangmaha chakna nei mi chu a enga thawl e; A thinlunga Zion panna lam liante awma chu,” a lo ti bawk (Sam 84:5). Davida chuan Lalpa chu a chakna a ni tih hre chiangin, “LALPA leh a chakna chu zawng ula,. . .” tiin a lo sawi bawk (Sam 105:4) Mosia tih ang khan Davida pawhin, “Lalpa chu ka chakna leh ka hla a ni,” a lo ti ve bawk (Sam 118:14). Zawlnei Isaia chuan, “Chau hnenahte chuan thiltihtheihna a pe thina; chakna reng nei lote chu a tichak thin,” a ti (Isaia 40:29). Isaia vek chuan, “LALPA nghaktute erawh chuan an chakna an siam tha leh ang . .” a ti (Isaia 40:31). Heng Pathian lehkha thute hian chiang takin LALPA chu kan chakna ani tih min tarlan sak a ni. Kan chakna LALPA kan inbel mai hi kan tih tur ani a, kan LALPA chuan a thawk dawn a ni. Israelfaten inchhandam turin chakna an nei lo. Lalpa thawhsak tur chu lo en ngawt mai turin Mosia khan Israelfate kha a hrilha. Tichuan tuipui senah Pathianin kawng a siamsak ta a, Pharoa sipaite man phak lovin an him thei ta a ni. Chakna nei lo kha an chakna Lalpa an chhawr ta a ni (Exo 14:13; 29, 30). Jeriko kulh an hmachawn tum pawh khan, an hmanrua a chau si a, Jeriko kulh tihchim ngaihna a awm lo. Lalpa chakna an inbel hlauhva, Lalpa thu awihin Bawm zawnin Berampaki an ham a, an au-a; kulh chu a chim a, an la ta mai anih kha (Josua 6:20), Lalpa chu an chakna ani chiang hle mai.

I CHAKNA INBEL RAWH LE

Keini tunlai ringtute pawh hian kan chakna Lalpa Kristaa kan inbel ava pawimawh em! Kan chakna Krista hian inthuam ang u. Kan hmaa thil lo thleng leh kan hun tawng zelah hian kan chakna krista chu kan inbel zel a ngai a ni. Kan velah thlemna a tamin, diabola leh ahote chuan nasa takin tan an la mek anih hi. Sakhaw hruaitu leh, mi rinawm âwm pui pui te pawh sum îtna leh lal duhna leh ropui duhnain an âwn ruai ruai mai. Mipat hmeichhiat chakna sual chuan mi tam tak ler ruknaah a pawt lut mek. Rawngbawltu leh Kohhran member zingah, kamhleina leh ruihhlo tenau anga kan ngaih; zuk leh hmuam kalsan thei lo an va tam ve. Diabola leh a hoten Natna hri leh chaklohna hriin min hual reng bawk. Cancer, TB, Hiv Pisitive (Aids) Hepatites, Zunthlum, thisensang, thawhah, kawchhungnâ leh chakloh vei kan va tam em !! Aw nang ringtu, i piangthar tawh ani lawm ni kha ? Harh la, Harh la, i chakna inbel rawh. Krista Isua chu ring la, a duhzawng leh a thu thua awm turin inpe la, tichuan i chakna Krista chu i inbel a lo ni ang. Tichuan i chakna Krista chu i nunah i lo hmang tak tak tawh anga, Lalpa chuan hma a hruaisak zel tawh dawn che a ni.

PATHIAN ROPUI NAN NA LOVIN DAM RAWH

PC. Lianhmingthanga

Nat hian nge Pathian a ropui, kan damin tiin inzawt ta ila. Kan nat ai chuan kan damin Pathian a ropui zawk kan ti awm e. Mi thenkhatin ‘kan nat hi Pathianin a ropui nan a duh a ni’ an ti thin. An natna Pathianin a tihdam khan Pathian a ropui zawk a, an taksaah Pathian chawimawi a ni zawk a ni. Lazara a dam lova, a thi ta a, Thlanah ni li lai a mut khan Pathian a ropui miah lo, tuman Lal Isua an rin phah lo. Thlan ata kaihthawha tihdam a lo nih leh tak khan, Pathian a ropui a, tam takin Lal Isua an ring ta a ni (John 11:45).

Natna leh Damna chungchang:

Natna hi Eden bawhchiat hmain a awm lova, Eden bawhchhiat hnua lo awm a ni. Sual - Setana hnathawh khawvelah, mihringah a luh hmain natna a awm lo, accident (chetsualna) awm lo, nun sual ala awm lo, chaklohna hri a wm lo, thihna a awm hek lo. Heng zawng zawngah hian a thawktu leh a mawhphurtu chu diabola (setana) leh an hote an ni. Diabola hian Eden Huan, Pathian huangchhung atanga a bum chhuah, a sal man te tihduhdah nan natna leh chaklohna hri tinrengte a hmang a ni. Sual thil tinreng leh natna leh chaklohna hmangin diabola hian mihringte a tiduhdah a, khawvel hi tahna leh lungngaihna ramah a lo siam a ni. Lal Isuan, “Rukhmang (diabola) chu ru tur leh tihlum tur leh tichhe tur lo chuan a lokal lo,” a lo ti reng a ni (John 10:10). Peteran a Lalpa rawngbawlna a sawi khan, “Diabola tihduhdah zawng zawng te tidamin a fang vel thin,” a ti a ni (Tirh 10:38b). Natna leh accident avanga chhiatna leh thihna lo thleng thinah hian a phena thawktu chu diabola leh thlarau sual - Ramhuai ho an ni.

Dibbola leh an thlarau sual hote avanga, khawvel sual thuneihna ram, thim thuneihna ram lo ni mek chu; Lal Isuan rawn luhchilhin khawvelah ENG a lo thleng ta a ni. “Khawvel thim en tura chu Hmangaih puan nem sinin” tiin Hla an lo phuah reng a ni. Khawvel thimna chhan chu; Sual hnathawh vang te, Natna leh chaklohna hri avang te, chung avanga thihna leh lungngaihna lo thlengte avang chuan a ni. Pathianin a Fapa mal neihchhun chu khawvel damnan, sual ata chhandam tur leh Natna tinreng ata tidam turin mihringah a rawn chantir ta a ni (John 3:17). Pathian fapa lo lan chhan ber chu diabola hnathawhte a tihboral theih nan a ni (I John 3:8). Diabola hian sual tinreng; awmhleina leh kamhleina leh natna leh chaklohna hmangin hna a thawk a, mihringte a tiduhdah (Oppress) a ni. Lal Isuan a lokal chhan a chhiarchhuah ang khan “. . . Ani chuan salte hnena chhuahna thu leh, mitdelte hnena mitvar neih lehna thu sawi tur te, tihduhdah tuar te chhuahtirna tur te . . .” a ni ( Luke 4:18,19). Indo pawl hnih an awm a; Setana (diabola) leh an hote - tihhlum, tichhiat leh ruk hna an thawk. An thawhna chu mihringah a ni. Indo pawl dang chu Pa leh Fapa leh Thlarau Thianghlim leh an hote an ni. Anni hian chhandam, tihdam leh nun pek hna an thawk thung a ni.

Min tihdam vek hi Pa duhzawng a ni:

Mihring chuan bawhchhiatni atang khan Thlarau, Rilru leh taksa danah thihna hri Natna a vei a. Mihring zawng zawng chu Davida angin - ‘Khawlohna a din suala pai vek kan ni (Sam 51:5). Eden Huan atanga hnawhchhuah hnam, sual - diabola rawng kai vek kan ni. Mi zawng zawng thiam loh chantirna rorelna hnuaia mi (Rom 5:18), thiltisual tawh vek, Pathian ropuina chang zo tawh lo kan ni (Rom 3:22,23). Eden bawhchhiatni atang khan mihring chuan apa ‘diabola’ a ni a, Lal Isuan, “Nangni zawng in pa diabolaa chhuak in ni a, in pa duhzawng tih in duh thin a ni “ a lo tireng a ni (John 8:44).

Lalpa Pathian chuan mizawng zawng tlan nan, chhandam nan a fapa khawvelah arawn tir ta a ni. Krista Isua chuan Pa duhzawng chu rawn hlen chhuakin kan damna turin a nunna a hlana, Kros-ah kan tan a lo tuar ta a ni. Diabola hnathawh tiborala, sal ata min chhuaha, diabola tihduhdahna laka min chhuahtira min tihdam hna chu a thawk ta a ni. Kan Thlarau, kan rilru leh kan taksa a puma min tihdam chu a lokal chhan leh a hnathawh chu a ni. Amah ringa, amah lo lawm a, Amah lo beisei te, damlohna leh natna tinreng a tidama, an sualte a ngaidam a ni. Mizawng zawng chhandama awm tur leh thutak hre turin Lalpan a duh a. Judai ram dung leh vang fanga, natna leh damlohna tinreng tidamtu khan, Thlarau Thianghlim Hunah pawh hian a policy ala thlak lo. Amah ringa amah pan duh apiang a la tidam renga, misualte a la chhandam reng a ni. Kan Nat te, kan chaklohte hi Lalpa duh zawng a ni lo, kan dama, kan hrisel a, kan hlima kan thlamuan hi Pa leh Fapa leh Thlarau Thianghlim duhdan a ni e.

Pathian Ropui nan Dam rawh le:

Kan damna atana lokal Krista kan dampui hian Lalpa chawimwiin a awm a, Lalpa a ropui thin. Kan nat hi Pathian ropuina ani lova, tumah Pathian ropui nan i na lovang u. Natna kan vei a, chaklohnain min bawhbeh hian, Pathian a ropui lova, Setana (diabola) chak zawk anga lantirna leh Setana ropuina a ni. Kan damna atana lokal, Lal Isua hian min tihdam duhin Thlarau Thianghlimin min hnaih renga, min nghak reng a ni. Amah rawn pantu leh, a hnena an rawn hruai leh an rawn zawn, damlo tinreng pakhatmah hmaih lova tidamtu khan, ala tidam duh reng a ni. Amah ringtu leh beiseitu tumah a hnar ngailo. I thlarau, i rilru (Soul) leh i taksa damlohna kha Lal Isua hnenah rawn kalpui la, lo dam rawh, tichuan, Lalpa chu a ropuiin chawimawiin a awm ang. Lal Isua hi nun kan neih nan tam taka kan neih nana lo kal a ni e (John 10:10b).

MALSAWMNA DAWNG RAWH

PC. Lianhmingthanga

Malsawmna dawn hi mi zawng zawngin kan duh veka. Malsawmna hi tute tan pawh a hlu a, a tha bawk a ni. Malsawmna kan tih erawh chu a in ang vek kher lovanga, kan thlir dan pawh a in ang kher lo mai thei. Hriselna te, sum leh pai lama malsawmna te hi mitinin malsawmna kan beisei chu a ni awm e. Thluak finna leh hriatna thate, chakna leh thu sawi thiamna te, zaithiamna te leh hmel thatna tepawh malsawmna an ni kan ti ang. Hla phuahtu chuan:

“Mal min sawm turin Van khuaah ro anrel
Eden kawngkhar an hawng leh ta

Lut rawh chatuan khua a var ta” a ti. He hla in malsawmna thu a sawi hi chu; Eden Huan atanga hnawhchhuah mihringte tana, Pathian nena len dun leh theihna; Eden kawngkhar hawn thu a ni. Thiamloh chang tawh mihringte, Van ram lut thei tura Lal Isua Krista avanga Aringtute tana khawngaihna kawng hawn thu a ni. Hla phuahtu pakhat chuan, “Amah chu malsawmna hnar a ni,” tiin a sawi ve thung. Hetah pawh hian Lal Isua chu a ringtutan thihna ata Chatuana nunnaa luhna a ni a, khawvelah pawh malsawmna hnar a nih tur a sawi a ni.

Kan hmaah Malsawmna leh Anchhia a awm:

Khawvela mihring lo piang zawng zawngte hian malsawmna leh Anchhia kan hmachhawn vek a ni. Chatuana Nunna leh Chatuana thihna kawng thlan tur kan hmachhawn vek a ni. Eden bawhchhiatni atang khan khawvelah Thlarau Indo Pawl pahnih an awm a: Pathian hnawl tawh, Lucifera diabola (setana) lo ni ta leh an hote leh, Pathian - Pa leh Fapa leh Thlarau Thianghlim leh an hote an ni. Diabola leh a hote chu Chatuana Anchhe dawng ram thihna a hruai tura - sual leh natna leh awmhleina tinreng hmanga che an ni. Pathian leh a hote chu; siamtha a, chhandama, nun pe a malsawma - Chatuana Nunnaa hruai luh chu an hna ani thung. Kan lo pian chhuah phat hian kawng zawh tur pahnih - Thihna leh Nunna kawng, Anchhia leh malsawmna kawng kan hmachhawn nghal a ni.

Israel fate hnenah Pathianin “Ngaiteh u, vawiinah hian in hmaah Malsawmna leh Anchhia ka dah a: LALPA in Pathian thupekte tuna ka pek che u hi in zawm chuan Malsawmna; LALPA in Pathian thupekte chu in zawm lohva, in hriat ngailoh pathian dangte be tura ka thupek te chu inpensan erawh chuan, Anchhia tiin a hrilh tih kan hria (Deut. 11:26,27). Hetiang hian keini pawh kan hmaah malsawmna leh Anchhia, kan thlan turin kan hmachhawn theuh a ni.

Lal Isua kan malsawmna a ni:

Adama leh Evi leh Pathian thu awih lova Setana bumna thu awiha thei an ei avangin; Pathian thupek bawhchhiain thiamloh chantirna Rorelna hnuaiah an lo awm ta a. Eden Huan atanga hnawhchhuah niin, anmahni avangin Lei hi anchhedawng a lo ni ta a ni. A chhan chu diabola leh a hote chetna hmun lo niin thihna, lungngaihna, manganna, natna leh chhiatna tinreng hmanga diabola leh a hote chetna ram anih tak avang a ni. Sual tinreng: Kamhleina leh awmhleina, indona, iksikna leh elrelna, ruk rukna leh inthahna ramah setana leh a hoten an siam ta. Eden Huan pawn lam boruak leh Nun chu a rapthlak a; thim thuneihna ram leh hmun a ni. Chu thim hnuaia leng mihringte mal min sawm turin Krista Isua chu mihringah a lo chang a ni. “Mal min sawm turin Van khuaah ro an rel, Eden kawngkhar an hawng leh ta,” tih hlaa kan sak ang hian; Krista Isua thisen leh a thihna leh tawhlehna avang chuan; thihna ata Nunna luhna kawng a lo inhawng ta a ni. Amah chu malsawmna hnar a ni’ tiin hla kan lo sa ta.

Van thlen theihna tluka malsawmna ropui a awm thei lovang. Thihna ata Nunnaa luhna malsawmna aia malsawmna ropui a awm dawn em ni ? Krista Isua Rinna avang chuan, thim thuneihna laka chhanchhuah; fapa hmangaih taka rama kaitir kan ni. Amahah chuan kan tlanna leh kan sual ngaihdamna kan hmu a ni (Kol 1:13,14). Krista Isua rin avang chuan Pathian Hrin (John 1:13), thilsiam thar (II Kor 5:17), chi chhe theilo laka piangthar (I Pet 1:23) leh Fa, Roluahtu kan ni (Rom 8: 16,17; Gal 3:29). Heng aia malsawmna ropui, lei leh Vanah a awm thei lo. Heng zawng zawng hi Lal Krista avanga kan chan an ni. Khawvel (mihringte) kan damna tura Fapa, Krista lokal hi ava hlu in ava ropui em ! Paula chuan, “kan Lalpa Isua Krista Pathian leh Pa chu fakin awm rawh se. Ani chuan Van hmunah te khian Kristaah chuan Thlarau lam malsawmsakna tinrengin mal min sawm a. . . “ a ti (Eph 1:3). Heti hian a ti bawk, “Chutichuan rinnaa awm te chu Abaraham rinawma nen chuan malsawm sakin an awm ve thin a ni” tiin (Gal 3:9). Krista Isua chu kan malsawmna ani tak zet a ni.

Malsawmna chu Dawng rawh le ?

Kan Hla pakhat chuan, “Chhandamna chu Chhandamna chu tunah nei la lo hlim rawh,” a ti. Chu Van malsawmna, Chhandamna, Krista Isua tlanna avanga kan ta lo ni mai chu dawn mai tur a ni. Paulan, “Sual pakhat avangin thiamloh chantirna rorelna chu mi zawng zawng chungah a lo awm a; chutiang bawkin thilfel pakhat tih avangin Nunna hmuh nan thiamchantirna rorelna chu mi zawng zawng chungah vurin a lo awm,” tiin min hrilh (Rom 5:18). Krista Isua mamawha ringtu apiang te tan thiamchantirna thilthlawnpek chu dawn nghal mai theih a ni. Chu malsawmna hlu lutuk mai chu dawng nghal mai rawh le.

He malsawmna hian Van hmuna Thlarau lam malsawmna tinreng bakah, leia kan chamchhunga kan mamawh malsawmna tinreng pawh a keng tel a ni. Chung malsawmna te chu; thlamuana leh hlimna te, Thlarau lam thilpek chi hrang hrangte, Damna leh hriselna te, ei leh bar sum leh pai mamawh leh finna leh thil dang tam tak a awm thei ang. Heng hi Ringtuten khawvela a ‘BONUS leh RUNNING BILL kan lak theih te an ni.Vanah Billpui leh Hlawhpui - malsawmna chu kan chang tawh dawn a ni. Krista Isua chu ring la, a thawhsak che chu pawm hmiah mai la; Vana Thlarau lam malsawmna tinreng leh, leia i cham chhunga malsawmna, i mamawh tinreng chu Lalpan a pe dawn che a ni. Malsawmna lam chu kan thlan loh chuan, Anchhia chu kan chan ani mai si a. Malsawmna - Nunna lam chu kan thlan loh chuan thihna chu kan chan tur a ni mai. Unau duh tak Nunna chu thlang la, malsawmna chu dawng la chang nghal rawh le.

MALSAWMNA DAWNG RAWH

PC. Lianhmingthanga

Malsawmna dawn hi mi zawng zawngin kan duh veka. Malsawmna hi tute tan pawh a hlu a, a tha bawk a ni. Malsawmna kan tih erawh chu a in ang vek kher lovanga, kan thlir dan pawh a in ang kher lo mai thei. Hriselna te, sum leh pai lama malsawmna te hi mitinin malsawmna kan beisei chu a ni awm e. Thluak finna leh hriatna thate, chakna leh thu sawi thiamna te, zaithiamna te leh hmel thatna tepawh malsawmna an ni kan ti ang. Hla phuahtu chuan:

“Mal min sawm turin Van khuaah ro anrel
Eden kawngkhar an hawng leh ta

Lut rawh chatuan khua a var ta” a ti. He hla in malsawmna thu a sawi hi chu; Eden Huan atanga hnawhchhuah mihringte tana, Pathian nena len dun leh theihna; Eden kawngkhar hawn thu a ni. Thiamloh chang tawh mihringte, Van ram lut thei tura Lal Isua Krista avanga Aringtute tana khawngaihna kawng hawn thu a ni. Hla phuahtu pakhat chuan, “Amah chu malsawmna hnar a ni,” tiin a sawi ve thung. Hetah pawh hian Lal Isua chu a ringtutan thihna ata Chatuana nunnaa luhna a ni a, khawvelah pawh malsawmna hnar a nih tur a sawi a ni.

Kan hmaah Malsawmna leh Anchhia a awm:

Khawvela mihring lo piang zawng zawngte hian malsawmna leh Anchhia kan hmachhawn vek a ni. Chatuana Nunna leh Chatuana thihna kawng thlan tur kan hmachhawn vek a ni. Eden bawhchhiatni atang khan khawvelah Thlarau Indo Pawl pahnih an awm a: Pathian hnawl tawh, Lucifera diabola (setana) lo ni ta leh an hote leh, Pathian - Pa leh Fapa leh Thlarau Thianghlim leh an hote an ni. Diabola leh a hote chu Chatuana Anchhe dawng ram thihna a hruai tura - sual leh natna leh awmhleina tinreng hmanga che an ni. Pathian leh a hote chu; siamtha a, chhandama, nun pe a malsawma - Chatuana Nunnaa hruai luh chu an hna ani thung. Kan lo pian chhuah phat hian kawng zawh tur pahnih - Thihna leh Nunna kawng, Anchhia leh malsawmna kawng kan hmachhawn nghal a ni.

Israel fate hnenah Pathianin “Ngaiteh u, vawiinah hian in hmaah Malsawmna leh Anchhia ka dah a: LALPA in Pathian thupekte tuna ka pek che u hi in zawm chuan Malsawmna; LALPA in Pathian thupekte chu in zawm lohva, in hriat ngailoh pathian dangte be tura ka thupek te chu inpensan erawh chuan, Anchhia tiin a hrilh tih kan hria (Deut. 11:26,27). Hetiang hian keini pawh kan hmaah malsawmna leh Anchhia, kan thlan turin kan hmachhawn theuh a ni.

Lal Isua kan malsawmna a ni:

Adama leh Evi leh Pathian thu awih lova Setana bumna thu awiha thei an ei avangin; Pathian thupek bawhchhiain thiamloh chantirna Rorelna hnuaiah an lo awm ta a. Eden Huan atanga hnawhchhuah niin, anmahni avangin Lei hi anchhedawng a lo ni ta a ni. A chhan chu diabola leh a hote chetna hmun lo niin thihna, lungngaihna, manganna, natna leh chhiatna tinreng hmanga diabola leh a hote chetna ram anih tak avang a ni. Sual tinreng: Kamhleina leh awmhleina, indona, iksikna leh elrelna, ruk rukna leh inthahna ramah setana leh a hoten an siam ta. Eden Huan pawn lam boruak leh Nun chu a rapthlak a; thim thuneihna ram leh hmun a ni. Chu thim hnuaia leng mihringte mal min sawm turin Krista Isua chu mihringah a lo chang a ni. “Mal min sawm turin Van khuaah ro an rel, Eden kawngkhar an hawng leh ta,” tih hlaa kan sak ang hian; Krista Isua thisen leh a thihna leh tawhlehna avang chuan; thihna ata Nunna luhna kawng a lo inhawng ta a ni. Amah chu malsawmna hnar a ni’ tiin hla kan lo sa ta.

Van thlen theihna tluka malsawmna ropui a awm thei lovang. Thihna ata Nunnaa luhna malsawmna aia malsawmna ropui a awm dawn em ni ? Krista Isua Rinna avang chuan, thim thuneihna laka chhanchhuah; fapa hmangaih taka rama kaitir kan ni. Amahah chuan kan tlanna leh kan sual ngaihdamna kan hmu a ni (Kol 1:13,14). Krista Isua rin avang chuan Pathian Hrin (John 1:13), thilsiam thar (II Kor 5:17), chi chhe theilo laka piangthar (I Pet 1:23) leh Fa, Roluahtu kan ni (Rom 8: 16,17; Gal 3:29). Heng aia malsawmna ropui, lei leh Vanah a awm thei lo. Heng zawng zawng hi Lal Krista avanga kan chan an ni. Khawvel (mihringte) kan damna tura Fapa, Krista lokal hi ava hlu in ava ropui em ! Paula chuan, “kan Lalpa Isua Krista Pathian leh Pa chu fakin awm rawh se. Ani chuan Van hmunah te khian Kristaah chuan Thlarau lam malsawmsakna tinrengin mal min sawm a. . . “ a ti (Eph 1:3). Heti hian a ti bawk, “Chutichuan rinnaa awm te chu Abaraham rinawma nen chuan malsawm sakin an awm ve thin a ni” tiin (Gal 3:9). Krista Isua chu kan malsawmna ani tak zet a ni.

Malsawmna chu Dawng rawh le ?

Kan Hla pakhat chuan, “Chhandamna chu Chhandamna chu tunah nei la lo hlim rawh,” a ti. Chu Van malsawmna, Chhandamna, Krista Isua tlanna avanga kan ta lo ni mai chu dawn mai tur a ni. Paulan, “Sual pakhat avangin thiamloh chantirna rorelna chu mi zawng zawng chungah a lo awm a; chutiang bawkin thilfel pakhat tih avangin Nunna hmuh nan thiamchantirna rorelna chu mi zawng zawng chungah vurin a lo awm,” tiin min hrilh (Rom 5:18). Krista Isua mamawha ringtu apiang te tan thiamchantirna thilthlawnpek chu dawn nghal mai theih a ni. Chu malsawmna hlu lutuk mai chu dawng nghal mai rawh le.

He malsawmna hian Van hmuna Thlarau lam malsawmna tinreng bakah, leia kan chamchhunga kan mamawh malsawmna tinreng pawh a keng tel a ni. Chung malsawmna te chu; thlamuana leh hlimna te, Thlarau lam thilpek chi hrang hrangte, Damna leh hriselna te, ei leh bar sum leh pai mamawh leh finna leh thil dang tam tak a awm thei ang. Heng hi Ringtuten khawvela a ‘BONUS leh RUNNING BILL kan lak theih te an ni.Vanah Billpui leh Hlawhpui - malsawmna chu kan chang tawh dawn a ni. Krista Isua chu ring la, a thawhsak che chu pawm hmiah mai la; Vana Thlarau lam malsawmna tinreng leh, leia i cham chhunga malsawmna, i mamawh tinreng chu Lalpan a pe dawn che a ni. Malsawmna lam chu kan thlan loh chuan, Anchhia chu kan chan ani mai si a. Malsawmna - Nunna lam chu kan thlan loh chuan thihna chu kan chan tur a ni mai. Unau duh tak Nunna chu thlang la, malsawmna chu dawng la chang nghal rawh le.

KA THLARAU ZAWKIN LE

by P.C.Lianhmingthanga

Zerubabela leh Jesua ten Pathian In sa tha tura an beih laia dodaltute avanga an tawp khan, “Ka thlarau zawkin le” tiin Van Pathian a rawn che a ni. Judate Lal Kûran an rama kir leh tura thu apek khan Pathian In, Jerusalema mi chu sa tha leh turin a phal sak a. “LALPA Israel hote Pathian In, Jerusalema awm chu han sa rawh se, Amah chu Pathian a ni,” tiin thu a pe a ni (Ezra 1:2-3). Chumai nilovin tangkaruate, rangkachak te, bungruate, ran te a tanpui turin thu a pe bawk (Ezra 1:4). Zozadaka fapa Jesua leh a unau puithiam te leh, Sealtiela fapa Zerubabela leh a unaute chuan Pathian In chu an sa tan ta a ni (Ezra 3:2; 5:2). Hmelma ti buaitu an neia , Lal Kûra lal chhung leh Daria lal thlengin an ti buai a. Jerusalem kulh te an din tha leh ang tih hlauvin Persia lal Artezerzia hnenah te hekna lehkha an thawn a, (Ezra 4:11-16). Lal chuan an hna chawlhtir turin thu a pe ta a (Ezra 4:21). Lal Daria lal kum hnihna thlengin Pathian In sak that hna an lo thawh chu chawlhsan a ngai ta a (Ezra 4:24).

Pathian Thu a lo thleng:

Hetianga Zerubabela ten Pathian Insak thuah leh kulh siam thua harsatna an tawh lai hian Pathian a lo che ta a. Zawlnei pahnih Hagaia leh Idova fapa Zakaria te chuan Pathian hmingin thu an sawi a, tichuan Zerubabela leh Jesua te chuan Jerusalema Pathian In sak chu an han bei tan leh ta a ni (Ezra 5:1-2). Chuta zawlnei Zakaria hnena thu lo thleng chu hei hi a ni: “Chakna ni lovin, thiltihtheihna ni hek lovin, ka thlarau zawkin le, tiin Sipaihote LALPA chuan a ti e. Tunge i nih ? Aw tlang lianpui, Jerubabela hmaah chuan phai zawlah i chang mai ang; A ni chuan Temple chu a sa anga, lungphum pawimawh rem ni chuan hlimna au a rawn thleng ang,” tiin (Zakaria 4:6-7). Chu lo pawh chu Lalpa thu alo thlenga ,” Zerubabela kut chuan he lungphum hi a phum ta, ama kut bawkin a puitlin ang a, Tichuan Sipaihote LALPA chuan inhnenah mi tir a ni tih in hre tawh ang. . “ tiin (Zakaria 4:9). LALPA Thlarau zawkin hma a la-in a thawk ta a ni.

Lalpa Pathian chuan, Pathian In sa tha tura beihna a harsatna; Setanan tute emaw hmanga a rawn thlen chu - mihring lam chakna ni lovin, thiltihtheihna ni hek lovin ‘ ka Thlarau zawk in le’ tiin a rawn humhalh ta a ni. Chu thu chu a zawlnei Zakaria hmangin a rawn puang ta a. Zawlnei thu hriain Zerubabela te chuan an hna an thawk zela, lui ral ram awptute pawhin an hna chu an chawlhtir mai ngam lo (Ezra 5:5). Lal Daria hnenah lehkha an thawn a, Lal Daria chu Pathianin hmangin an hna chhun zawmtir tur leh, Euphrates lui khawthlang bial chhiah, lal sum tur atanga tanpuina pe thuai turin thu pek khauh tak a chhuah ta a ni (Ezra 6:6-12). Lalpa Thlarau zawk a lo chet chuan; dodaltute an tlawma, tlangliante chu phai zawlah an chang ta a ni.

Amah Ring turin min duh:

Khawvela kan cham chhung hian, kan rawngbawlnaah emaw thahnemngaia hma kan lakna kawng hrang hrangah hian, LALPA hian amah ringa a lam hawi tlat turin min duh a ni. Kan velah Thlarau sual leh, he thim chunga roreltu, harsatna leh buaina thiam taka siam thin, diabola leh a hote an awm reng a. Chuvangin Lalpa Pathian hian kan chakna leh thiltihtheihna ni lova, Amah Pathian zawk ring thiam turin min duh a ni. A lama rilru dik tak putute chunga a chakzia lantir turin Lalpa mit chu khawvel zawng zawngah hian a len g ruai ruai thin a ni (II Chro 16:9). Amah ringa a lam kan hawi chuan a lamah rilru dik kan pu a lo ni. LALPA chuan a Thlarauvin a chakzia a lantir thin a ni. Zerubabela te harsatna, lal thupeka hna chawlhsan thuah chuan Lalpa thlarau lo che-in, Lal Daria a rawn hmanga harsatna chu hneh taka lak kian ani ta ani (Ezra 6:6-12). Kan chakna te, kan thiltihtheihnate, kan finna leh rem hriatnate hi a tha ve viauvin kan hre thin, mahse Lalpan A Thlarau zawka thawh a duh a ni. Keini ringtute chu a hmanrua leh a Berampaki ham tur mai kan ni. Amah ringa kan nghah hian A Thlarau Thianghlim chuan zalen takin hna a thawk thei thin a ni. Kan thahnemngaihna a kan chakna leh theihna nena kan lo chet vak hian; LALPA chetna kan lo dal thei thin a ni. Amah chu nghak ila, A Thlarau (Pathian) zawk chuan thawk rawh se. Tichuan Tlanglianpui, kawng daltu chu phaizawlah alo chang zel dawn a ni.

“Ka Thlarau zawkin le” Lalpan a ti:

Lalpa hian kan rilru hahnaah te, kan manganna leh phurrit phurhnaah te, “ka Thlarau zawkin le” tiin min sawm a ni, A hnenah kan rilru hahna leh phurrit te kan thlen chuan Lalpa Thlarau chuan min lo chawlhtir thin. “Ka hnenah lo kal ula keiman ka chawlhtir ang che u” min ti a ni (Mt 11:28). Manganna leh thil harsa kan hmachhawn pawhin, ‘Ka Thlarau zawkin le’ Lalpan min ti a ni. Jeriko kulh Israel faten an hmachhawn bûr mai, Lalpan a Thlarau zawka a thawh chuan a chim mai a ni. Tuipuisen chu lî dumkûkin, kalna kawng dang awm lo mahse; Lalpa, a Thlarau zawka a lo chet chuan a kawngpui lo insiamin an kal kai mai a ni. Kan mihring lam leh tisa duhzawng lo thawk ve thin te hi, felin chakin thiltithei ve hle mahse; Lalpan, “Ka Thlarau zawkin le” a ti tlat a ni. Kan nun leh khawsakna tin rengah Lalpa Thlarau chu min hruaitu leh min zirtirtu ni sela; harsatna tlangte chu phaizawlah a chang zel dawn a ni. Tisa danah awm lovin thlarauah awm ila, taksa thiltihte Thlarauva tihlum zelin, Lalpa Thlarau zawkin i nungin i che ang u. Pathian a ropui anga, kan hnate a tluang anga, kan thiltih te a hlawhtling dawn a ni. Lalpa hian a tana kan thawhna leh chetna tin rengah hian, A Thlarau zawka min thawhsaka hma min hruaisak a duh a ni. Lalpa zawk, a Thlarauva chettir turin a lam hawiin, a aw i ngaithla thin ang u.

I AWM DAN LEH THIL TIH SIAM THA RAWH

PC.Lianhmingthanga

Zawlnei Jeremia hnenah Pathian thu alo thleng a, Lalpa be tura a Temple kawngkaa lut zawng zawngte hnena puan tur a ni. Chu thu chu; “Sipaihote LALPA chuan heti hian a ti : In awm dan leh in thiltihte chu siam tha ula, he hmunah hian ka chen tir ang che u. . .” tih hi a ni (Jeremia 7:3). Dawt thu a, “Sual mahila, Jerusalema Temple hi Pathian Temple ani a, Pathianin a hum tlat dawn” tia sawi te thu awih lo turin a hrilh bawk (Jeremia 7:4).

Heng hun lai hian, sualna a nasa a, dawta chhia chhamin Baal hnenah rimtui te an hala, Pathian dang hriat loh te an um a. Dawt an sawi a, an uire a, tual an that bawk a. Dik lo takin ro an rela, hmeithai te, Pa nei lo te, hnam dang mi te an hnehchhiah a, thil tenawm tichungin Lalpa Inah an lo kal a. Lalpa chuan Jeremia hmangin, “Ngaiteh u, kei, keimah ngei hian ka hmu alawm, tih hi Sipaihote LALPA thu chhuak a ni,” tiin a hriattir a ni (Jer 7:11). In awm dan leh in thiltihte in siam that tak meuh chuan in thlahtute hnena ka pekah hian kum khuain ka chentir ang che u tiin a zawlnei hmang hian a hrilh a ni. Tha awm taka Pathian In (Temple) a kal reng chung si hian hnam Thlan Juda hote hian, pathian dangte zawngin Pathian duh loh zawng an ti a ni.

Engtinnge kan awm, Engnge kan tih ?

Keini hian engnge kan tih a, engtin nge kan awm ? Pathian hian kan nun thuruk a hriain a hmu vek a, Tha awm taka langa, Inkhawma, Sunday Sikul kal reng si hian, engtinge kan awm thina, engnge kan tih le ? I thinlung hian tual i that in i uire reng lo maw ? Hmeithaite, Pa neilote, hnam dang kan zinga awmte hmusitin i hlamchhiah lo maw. Mahni hmasialin sum-hi i pathianah i lo be hial lo maw ? Dawt sawiin, mite i rel fo thin em ? Pathian hian min hmu reng a, i chungchangah engnge a sawi ang le ? “Kei, keimah ngei hian ka hmu a lawm,” Lalpan a ti a ni. Kan awmdan leh thiltihte i siam tha ang u.

LALPAN a Ngai zam lo

Judate, Pathian bia in a Inah lokal thin mahse, an awm dan leh thiltih a that loh chuan Lalpan angai zam mai lo. Inkhawmpui te siamin tha awm takin che mahse, an khawmpui te chu a ningin a hnê tawh a. Inthawinate chu hlan ve tlut tlut mahse a tan pawm tlak loh rimchhia mai a ni. (Isa 1:13,14). Kohhran Pawl ringawt a tangkai lo. Serh leh sang te zawma, fel taka Kohhran mit hmuha lan ringawt a tawk lo. Lalpa chu thinlung lam entu leh kan chetzia min hmutlang vek tu; kan ngaihtuah thuruk nen lama hre vektu a ni. Thianghlimna lovin Lalpa hnen kan thleng dawn lo a ni. ‘Nangni inthianghlim tur ani kei ka thianghlim si a ,’ tih ziak anih kha (I Pet 1:16). A lang maia Kristian nihin awm zia anei lo. Incheimawi nana nihna pawimawh chelh a, rawngbawltu kawr hak hi Lalpa ten zawng tak a ni. Kan awm dan leh chet dan te i siamtha ang u.

I chaklohna hmuchhuak rawh

Zungawlvei te, Buan chak lote, Drugs addict te kan endawnga, kan hmusit a, kan dah hniam khawp mai. Anni hi chuan an sualna an tlinlohna hi an pawm thlapa, mizingahte an inthlahrung em em thin. Pathian Biak Ina lokal pawh an zak a, an inthlahrung thin. An hnehloh an buan a, diabola leh thlarau sual hovin an thisen zung zam fanin a tha lo tih an hriat reng kha ti lovin an awm thei lo. Tanpui ngai, chhan ngai, Thlarau Thianghima, thiltihtheihna nena tanpui mamawh an ni. Kristian inti; Kohhran member, nihna pawimnawh tak tak chelh, Upa leh rawngbawltu, Pastor/Officer te thleng hian kan chak lohna kan hmuh chhuah a ngai.

Chapona, mite aia thaa inhriatna, mi dangte hmusitna i nei thin maw ? Mitdel saruak mai i ni, i thiltha tih te kha Lalpa hmaah eng tihna mah ani lo. Nihna leh dinhmun tha i duh a, i duhawm bawka, i tawngkam chauh a polite ani maw ? Lem chang mai i loni reng lo maw ? Thlarau bo veina leh hmangaihna nei miah lovin tul em em in Kohhran/Corps-ah i inhmang thin maw ? A tawk lo, thlaraubote hmangaiha misualte thleng phak rawngbawlna Lalpan a duh. Nang roreltu, inpekna tel hauh lovin, mite leh hotute tihlawm nan mai, thahnemngaihna tel miah lovin i thawk a ni lo maw ? Pathian pawi i sawi a nia, Pathian hian khawvel chhandam nan tihtak zetin thil a ti a, a fapa mal neihchhun a pe a ni.

Inti Pathian thuawih viau si, Zu ruite, Drug ngawlvei te, buanchaklo te hmusit viau si khan engnge i tih thin ? I taksa Pathian In, Thlarau Thianghlima a chenna turah khan engnge i lakluh thin kha ? Rawngbawltu, piangthar inti ve si, meizial i la zu maw ? Sahdah te khaini te i la hmuam zoh zoh maw ? Kuhva leh eng eng emaw tuibur te i la hmuam ve thin maw ? Buanchaklo te, Zu sim thei lote leh Drugs addict ai khan i tha chuang lo. I tem vir leh i khawi nun chu mihringhlui, tisa duhzawng tho kha a ni. Kan awm dan leh kan thiltih hi i siam tha ang u. I tisa duhzawng khawi nunga i bansan loh chuan diabolan mal a sawm anga, Natna tha lo tak tak hmangin i nunna a la mai ang. Rin lohna thinlung sual a pe ang che a, i boral mai ang.

A Hlawkna kan tel ang

Hawh u, kan awm dan leh thiltihte hi siam tha ila, Thlarau lam malsawmna tinreng kan dawng thei dawn a ni. Lalpa nen nitin kan leng dun anga, Van nun he khawvelah hian kan tan thei dawn a ni. Pathian ram (Kingdom) chu keimahniah a lo ding chhuak anga, thiltihtheihna nen rawngbawlin, setana ram kan thiat thei dawn a ni. Thlarau lam malsawmna chauh ni lovin, Rilru taksa damna leh hriselna chu kan ta ani ang a, hri reng rengin i puan In chu a hnaih lo thei hial dawn a ni (Sam 91:10).

HREMHMUNAH KAL LUL SUH

by PC. Lianhmingthanga

Pathianin Inlarna hmanga a hmuhtir ten; Hremhmun rapthlakzia te, Rawngbawltu, Pastor leh Upa leh Evangelist te pawh, hremhmunah an awm ve thu an sawi kan chhiarin kan hria a. Heng hi a dik lovang kan tihsak ngawt thei lo. Pathianin a hmuhtir chu huaisen takin an ziakin an sawi chhuak ani a, pawmsak loh ngawt chi pawh ani lo. Mihring leh Lei Kohhran hmaa that te, dinhmun pawimawh chan te hi a tha e; Pathian nen kan inkar hi a fel tha em tih erawhchu thu dang a ni. Rev H. Lalengmawia inlarna te, Sangtei inlarna te, Angelica Zambrano inlarnate han ngaithlaka, han chhiar chuan, an thil hmuhte hi a chiang riau mai. Inti sakhawmi fe fe, Kohhrana mi pawimawh leh tul em em te hi, hremhmunah a kal theih dawn tih a chiang hle a ni. “Tu hming pawh Nunna Bua ziak an hmuh loh chuan meidilah an paih bawk a” tih a nih kha (Thup. 20:15). I hming kha Nunna Bua an hmuh ve loh miau chuan Hremhmun, Meidilah chuan an paih dawn che a ni mai.

Hremhmun (Meidil) hi sawibo chi a ni lo

Setana hian Pathian thu zir, piangthar si lo mi thenkhat te hnenah, meidil leh hremhmun chungchang hi a sawi dal tir mek a. Mi tam zawk hremhmuna a awmpui theih nan diabola (setana) hian tan a la a ni. Jehova Witness pawl dintu hian meidil Hremhmun hi a hlauh em avangin a sawi bona a zirtir ta a. Vawiin thleng hian Hremhmun sawi bo hi hnaah an neih ve mek bawk. Heng mi, Setana bum theihhote hian, “Pathian chu hmangaihna a khat a ni a, mite hremhmuna paih khawpin a nun a rawng lo” tiin zirtirna an phuah chawp ve a ni.

“Tin, anmahni bumtu diabola chu sakawlh leh zawlnei der awmna, mei leh kât dilah chuan an paih ta a; tichuan chatuanin a chhun a zana nghaisakin an awm ang” (Thup 20:10) ‘ Mei leh kâta dil’ chu Meidil, hremhmun chu a ni. “Tin, thihna leh mitthi khua te chu meidildah an paih a chu chu Thihhnihna chu a ni - meidil chu,”(Thup 20:14). Meidil - Hremhmun hi ‘thihhnihna’ tia sawi a ni bawk. Hun tiam thlen hunah Setana (diabola) leh a thuihruaite chu chatuan hremna, meidila dah tur an ni a, chu hun tiam thlen hma chuan mihringte a tam thei ang ber, buma hremhmuna luhtir ve an tum a ni. Hremhmun, meidil hi mihringte tana siam ani lo. Mahse Pathian thu aia diabola bumna an zawm zawk miau chuan an lut ve dawn a ni. Hremhmun, meidil hi bumtu; Setana (diabola) leh a hote laka Pathian thinurna vawrtawp-hremna tur a ni. Setana (diabola) leh a hote chu Pathianin a hrem dawn chiang a, a thuawih mihringte chu an pa, diabola hnenah chuan an awm ve dawn a ni mai.

Lalpan Hremhmuna i luh a phallo

Pathian hian a mite titlua hremhmun lama an luh a phallo tak meuhva. Titlutu chungah pawh na takin a che dawn tih Pathian Thu atangin kan hmu. “Tin, tupawh heng mi ringtu mi tete zinga pakhat pawh titlu apiang chu, an nghawngah buh rawtsawmna lung lianpui awrhtirin tuifinriatah thlak sela, an tan a tha zawk tur a ni,” Lalpan a ti (Mk 9:42). Tlukna awmtirtu chung a pik thu min hrilh bawk (Mt 18:7).
Pathian hian meidila kan kal hi tha a ti lovin a phal lo tak zet a, a thu vuakthlak rum zia hi i han en teh ang:”Tin, i kutin emaw, i kain emaw a tihtluk che chuan, tan la, paih daih rawh; kut pahnih emaw ke pahnih emaw neia kum khaw meidila paih ai chuan, piangsualin emaw, ke baiin emaw nunna a luh i tan a tha zawk e. Tin, i mitin a tihtluk che chuan, kher chhuak la, paih daih rawh; mit khinghnih neia Gehena meia paih ai chuan, mit khing khat neia nunnaa luh i tan a tha zawk e,” Lalpan a ti a nih chu (Mt 18:8,9; Mark 9:43-48). Hremhmun, meidila chatuana awm hi a rapthlak dawn em avangin, Lalpa hian kan pumpelh theih nan hetiang khawpa thurum hi min hrilh a ni. Ringlo thi te hi an tawpin an boral ringawt dawn lo. An thlarau thi thei lo; nasa taka hreawm hre si kha, chatuanin meidil, hremhmunah chuan a tal tawh dawn a ni.

Lalpa thu awiha, amah hlauh ber tur

Hremhmun, meidila kan tlak loh nan Lalpa thu hi kan awiha, amah hi kan hlauh ber tur a ni. Lalpa hian Thlarau Thianghlim leh Tirhkoh Thianghlim te hmangin a thu leh a duhzawng min hriattir a. Lal Isua ngeiin a tisa putlai ni a a thuchah leh zirtirte Chanchin Tha buah kan hmu thei vek a ni. A thu kan zawma, nitin Thlarau Thianghlima min kaihhruaina kan zui a, kan helsan loh a ngai a ni. Khawvelzia leh nunte nitin thihsana, a tana kan nun zel a pawimawh a ni. Thil te thamte ni a kan ngaihte hi diabola’n thiam taka min tihchhiatna tura, thuril leh thang tha deuh a ni thei tlat a ni. Angelica Zambrano chuan hremhmunah a Pi Nu a hmu ve a. Lalpa hnenah hremhmuna a awm chhan a zawh chuan, a chunga tisualtu a ngaihdam loh vangin a lo nireng mai. “Mi an bawhchhiatnate in ngaihdam chuan, in Pa vana min a ngaidam ve ang che u. Nimahsela mite in ngaihdam si loh chuan in Pain inbawhchhiatna a ngai dam bik lovang,” Lalpan a ti reng a ni (Mt 6:14,15). “A kotu che u a thianghlim angin nangni pawh in chetzia zawng zawngah lo thianghlim zawk rawh u; ‘Nangni in thianghlim tur a ni, kei ka thianghlim si a’ tih ziak anih kha,” tiin thianghlim tura koh kan ni tih kan hmu a ni (I Pet 1:14,15).

Pathian hi kan pawisak tur leh kan hlauh ber tur a ni. Lal Saula pawhin Pathian Thu awih lovin ama ngaihdan leh duh danin thil a ti a, Lalpan lal atan a duh ta lo a ni tih kan hria (I Sam 15:22,23). A tisa put laini khan Lalpan heti hian a ti, “Taksa tihluma, chumi hnua engmah dang ti leh thei tawh lote chu hlau suh u. Amaherawhchu tunge in hlauh tur ka hrilh lawk ang che u: A tihlum hnu pawha Gehena-a paih theihna thuneia chu hlau rawh u, a ni, ka hrilh a che u, Amah mawlh chu hlau rawh u,” tiin (Lk 12:4,5). Lalpa hi i tihin i hlau ang khai, thil tha lo leh sualte kalsan turin inbuatsaih ang u. Miten Lalpa tihna leh hlauhna avangin sual an kalsan thin a ni.

Hremhmunah kal lul suh

Pathianin a thutak, chhandamna thute min hriattir tawh a, rinna bansan lovin Pathian Thu i awih tlat ang u. “Thutak hriattirna famkim chu kan chan hnua thil kan tihsual luih si chuan sualte tana inthawina a awm tawh hauh lovanga, Rorelna hlauhawm tak lo thleng tur leh dotute kangral tur thinurna mei kan hmabak a ni mai,” Pathian thuin a ti (Heb 10:26,27). Smurna khaw hnena thuchah ang khan, “Thih thlengin rinawmin lo awm rawh, tichuan nunna lallukhum ka pe ang che,” min ti a ni (Thup 2:10b). Lo ti tha fu thin tawh mah la, thih thlenga i rinawm si loh chuan - dotute kangral tur, hremhmun mei i hmabak tho dawn a ni. Kan nitin nun leh thiltihte in enchiang ila, Israelfate ang mai khan Pathian nung bansanin rinlohna thinlung sual kan lo nei palh ang e (Heb 3:12). “Chuvangin i hlau ang u, Chutilo chuan a chawlhnaa luhna thutiama la awm reng siin, inzingah tupawh tling lo angin in lo awm mial dah ang e. . . tiin Hebrai ziaktuin min hrilh a ni (Heb 4:1). Hremhmunah chuan kal lul suh.