Monday, March 19, 2012

MALSAWMNA DAWNG RAWH

PC. Lianhmingthanga

Malsawmna dawn hi mi zawng zawngin kan duh veka. Malsawmna hi tute tan pawh a hlu a, a tha bawk a ni. Malsawmna kan tih erawh chu a in ang vek kher lovanga, kan thlir dan pawh a in ang kher lo mai thei. Hriselna te, sum leh pai lama malsawmna te hi mitinin malsawmna kan beisei chu a ni awm e. Thluak finna leh hriatna thate, chakna leh thu sawi thiamna te, zaithiamna te leh hmel thatna tepawh malsawmna an ni kan ti ang. Hla phuahtu chuan:
“Mal min sawm turin Van khuaah ro anrel
Eden kawngkhar an hawng leh ta
Lut rawh chatuan khua a var ta” a ti. He hla in malsawmna thu a sawi hi chu; Eden Huan atanga hnawhchhuah mihringte tana, Pathian nena len dun leh theihna; Eden kawngkhar hawn thu a ni. Thiamloh chang tawh mihringte, Van ram lut thei tura Lal Isua Krista avanga Aringtute tana khawngaihna kawng hawn thu a ni. Hla phuahtu pakhat chuan, “Amah chu malsawmna hnar a ni,” tiin a sawi ve thung. Hetah pawh hian Lal Isua chu a ringtutan thihna ata Chatuana nunnaa luhna a ni a, khawvelah pawh malsawmna hnar a nih tur a sawi a ni.

Kan hmaah Malsawmna leh Anchhia a awm:
Khawvela mihring lo piang zawng zawngte hian malsawmna leh Anchhia kan hmachhawn vek a ni. Chatuana Nunna leh Chatuana thihna kawng thlan tur kan hmachhawn vek a ni. Eden bawhchhiatni atang khan khawvelah Thlarau Indo Pawl pahnih an awm a: Pathian hnawl tawh, Lucifera diabola (setana) lo ni ta leh an hote leh, Pathian - Pa leh Fapa leh Thlarau Thianghlim leh an hote an ni. Diabola leh a hote chu Chatuana Anchhe dawng ram thihna a hruai tura - sual leh natna leh awmhleina tinreng hmanga che an ni. Pathian leh a hote chu; siamtha a, chhandama, nun pe a malsawma - Chatuana Nunnaa hruai luh chu an hna ani thung. Kan lo pian chhuah phat hian kawng zawh tur pahnih - Thihna leh Nunna kawng, Anchhia leh malsawmna kawng kan hmachhawn nghal a ni.

Israel fate hnenah Pathianin “Ngaiteh u, vawiinah hian in hmaah Malsawmna leh Anchhia ka dah a: LALPA in Pathian thupekte tuna ka pek che u hi in zawm chuan Malsawmna; LALPA in Pathian thupekte chu in zawm lohva, in hriat ngailoh pathian dangte be tura ka thupek te chu inpensan erawh chuan, Anchhia tiin a hrilh tih kan hria (Deut. 11:26,27). Hetiang hian keini pawh kan hmaah malsawmna leh Anchhia, kan thlan turin kan hmachhawn theuh a ni.

Lal Isua kan malsawmna a ni:
Adama leh Evi leh Pathian thu awih lova Setana bumna thu awiha thei an ei avangin; Pathian thupek bawhchhiain thiamloh chantirna Rorelna hnuaiah an lo awm ta a. Eden Huan atanga hnawhchhuah niin, anmahni avangin Lei hi anchhedawng a lo ni ta a ni. A chhan chu diabola leh a hote chetna hmun lo niin thihna, lungngaihna, manganna, natna leh chhiatna tinreng hmanga diabola leh a hote chetna ram anih tak avang a ni. Sual tinreng: Kamhleina leh awmhleina, indona, iksikna leh elrelna, ruk rukna leh inthahna ramah setana leh a hoten an siam ta. Eden Huan pawn lam boruak leh Nun chu a rapthlak a; thim thuneihna ram leh hmun a ni. Chu thim hnuaia leng mihringte mal min sawm turin Krista Isua chu mihringah a lo chang a ni. “Mal min sawm turin Van khuaah ro an rel, Eden kawngkhar an hawng leh ta,” tih hlaa kan sak ang hian; Krista Isua thisen leh a thihna leh tawhlehna avang chuan; thihna ata Nunna luhna kawng a lo inhawng ta a ni. Amah chu malsawmna hnar a ni’ tiin hla kan lo sa ta.

Van thlen theihna tluka malsawmna ropui a awm thei lovang. Thihna ata Nunnaa luhna malsawmna aia malsawmna ropui a awm dawn em ni ? Krista Isua Rinna avang chuan, thim thuneihna laka chhanchhuah; fapa hmangaih taka rama kaitir kan ni. Amahah chuan kan tlanna leh kan sual ngaihdamna kan hmu a ni (Kol 1:13,14). Krista Isua rin avang chuan Pathian Hrin (John 1:13), thilsiam thar (II Kor 5:17), chi chhe theilo laka piangthar (I Pet 1:23) leh Fa, Roluahtu kan ni (Rom 8: 16,17; Gal 3:29). Heng aia malsawmna ropui, lei leh Vanah a awm thei lo. Heng zawng zawng hi Lal Krista avanga kan chan an ni. Khawvel (mihringte) kan damna tura Fapa, Krista lokal hi ava hlu in ava ropui em ! Paula chuan, “kan Lalpa Isua Krista Pathian leh Pa chu fakin awm rawh se. Ani chuan Van hmunah te khian Kristaah chuan Thlarau lam malsawmsakna tinrengin mal min sawm a. . . “ a ti (Eph 1:3). Heti hian a ti bawk, “Chutichuan rinnaa awm te chu Abaraham rinawma nen chuan malsawm sakin an awm ve thin a ni” tiin (Gal 3:9). Krista Isua chu kan malsawmna ani tak zet a ni.

Malsawmna chu Dawng rawh le ?
Kan Hla pakhat chuan, “Chhandamna chu Chhandamna chu tunah nei la lo hlim rawh,” a ti. Chu Van malsawmna, Chhandamna, Krista Isua tlanna avanga kan ta lo ni mai chu dawn mai tur a ni. Paulan, “Sual pakhat avangin thiamloh chantirna rorelna chu mi zawng zawng chungah a lo awm a; chutiang bawkin thilfel pakhat tih avangin Nunna hmuh nan thiamchantirna rorelna chu mi zawng zawng chungah vurin a lo awm,” tiin min hrilh (Rom 5:18). Krista Isua mamawha ringtu apiang te tan thiamchantirna thilthlawnpek chu dawn nghal mai theih a ni. Chu malsawmna hlu lutuk mai chu dawng nghal mai rawh le.

He malsawmna hian Van hmuna Thlarau lam malsawmna tinreng bakah, leia kan chamchhunga kan mamawh malsawmna tinreng pawh a keng tel a ni. Chung malsawmna te chu; thlamuana leh hlimna te, Thlarau lam thilpek chi hrang hrangte, Damna leh hriselna te, ei leh bar sum leh pai mamawh leh finna leh thil dang tam tak a awm thei ang. Heng hi Ringtuten khawvela a ‘BONUS leh RUNNING BILL kan lak theih te an ni.Vanah Billpui leh Hlawhpui - malsawmna chu kan chang tawh dawn a ni. Krista Isua chu ring la, a thawhsak che chu pawm hmiah mai la; Vana Thlarau lam malsawmna tinreng leh, leia i cham chhunga malsawmna, i mamawh tinreng chu Lalpan a pe dawn che a ni. Malsawmna lam chu kan thlan loh chuan, Anchhia chu kan chan ani mai si a. Malsawmna - Nunna lam chu kan thlan loh chuan thihna chu kan chan tur a ni mai. Unau duh tak Nunna chu thlang la, malsawmna chu dawng la chang nghal rawh le.

No comments: