FIAHNA

 

*“Thlemna tuar hrâm hrâmtu chu a eng a thawl e; fiaha a awm hnuin nunna lallukhum, Lalpan amah hmangaihtute hnena a tiam chu a hmu dawn si a.”*

Jakoba 1:12

 

*“I tuar turte hi hlau suh: ngai teh, fiaha in awm theih nan diabola chuan in zinga mi thenkhat tan inah a khung dawn che u a ni; tin, ni sawm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che.”*

Thupuan 2:10

 

Zirlai ten pawl sang an kai dawn chuan fiahna an paltlang thin a. Kar kalta lawk khan Mizoram pum huap HSLC Exam result a lo chhuak a. Kan chhungte, kan fate atang pawhin hlawhtlinna ropui tak tak nei kan awm a. Pawl 10 zirlaite kha a aia pawl sang zawk pawl 11 zirturin fiahin an awm a, an tling a. pawl sang zawkah hlan kaiin an awm a ni. A lawmawm hle mai. 

 

Chutiang chiah chuan Pathian hian a mite hi a lakah kan rinawm leh rinawm loh min fiah thin a. Edena huanah khan a thlawnin engkim eitur tinrengin a châwm a. A dawtah chiah chuan fiahna. “Huan lai taka mi theirah hi chu in ei tur a nilo, in ei chuan in thi ang” a ti a (Gen 3:3), mahse rûl hmangin ava fiah zui a. Ngatinge a fiah kher? Engatinge khatiang sual awmlohna hmun Edena huanah khan setana ‘rûl’ kha luh a phal a. Pathian in A thu an awih dawn nge dawn lo a hre duh mawle. Adama leh Evi chuan fiahna an paltlang zo lova, Eden huan atanga hnawhchhuahin an awm a (Gen 4:24). Tin, mak leh em em chu Pathianin a mite fiah nan setana a hmang tlat hi a ni. Setana hi Pathian thu hnuaia awm a ni a, Pathian thu a hnial ngam lo. 

 

Abrahama pawh kum 100 mi a nih hnuah fapa Isaaka a pe seuh seuh a (Gen 21:2). A dawt leh chiah chu fiahna a ni a. A tarlam fa Isaaka chu Moria tlangah hlan turin a ti a (Gen 22:2). Abrahama chuan Pathian fiahna a pass a. Vana arsi zat, tuifinriata tiau vaivut zat a tam a thlahte la pun tur thu a puang zui a (Gen 22:17). Pathianin malsawmna vur a intiam nghal zawih zawih mai a nih kha.

 

Aigupta ramah buh leh bala hausak kum kum 7 chhung Pathianin mal a sawm te te a (Gen 41:48). A dawt leh chiah chu fiahna kum 7 chhung tâm (Gen 41:54). Tâm kuma Aigupta ram Prime Minister tura Pathian in a ruat Josefa pawh kum 17 mi a nih atangin a unaute hmanga fiahin a awm a. Kum 13 chhung zet corruption leh sex hmanga fiahna a paltlang hnuah Pathianin mal a sawm a. Kum 30 mi a nih meuh chuan Aigupta ramah dinhmun ropui takah Pathianin a hlang kai ta (Gen 41: 41). Amah tiduhdahtute tan malsawmna a ni ta zawk a ni.

 

Israel fate pawh kha Pathianin ‘Manna’ a pe a, an duh tawkin an ei a. A dawt leh chu fiahna in a chhu zui a. Jordan lui daikaite leh Kanan ramah khan a fiah mawlh mawlh a nih kha. Mak em em thin chu Pathian hian a mite a fiah reng reng hian mihring te ngaiha sual, thalo, tawrhna, tahna kan tih hi a hmang zel hi a ni. Pathian thuneihna hnuaia mi vek a ni si a.

 

Pathian hian a mite hi a fiah lo ngai lo. A fiahna chhan chu a tan an rinawm leh rinawm loh a fiah duh a ni. Chuvang tak chuan chuan Thupuan 2:10 “..Thih thlengin rinawmin lo awm rawh, tichuan nunna lallukhum ka pe ang che.” a tih ni. Pathian hian a fiahna paltlang tute chu a ngai hlu em em a. Nunna lallukhum amah hmangaih tute tana a buatsaih dawng tur chuan nang leh kei hian fiahna kan paltlang a ngai fo thin.

 

Lalpan Joba a fiahna te hi ava rapthlak em! Misual tawrh awm tak kha ‘mi famkim, mi ngil tak, Pathian tih mi, thil thalo laka insûm thei mi Joba hnenah a tawrh tir a. A fiah. Mahse, Joba’n Lalpa fiahna a pass meuh chuan a hma a a thil neih zawng zawng let hnihin mal a sawm zui a. Tu chhuan li (4) thleng hmu in, dam reina in a ti lungawi zui a ni.

 

Kan nunah Pathian fiahna kawng hrang hrangin a lo thleng thin ang. Chûng hunah chuan Pathian tân rinawm takin nung ila. A fiahna paltlangte hnena malsawmna ropui tak a pek thin ‘fa takte chan tur’ malsawmna kan dawng ngei ang.

 

*Lalpan malsawm rawh se. Amen!*