PATHIAN THUCHAH (15.4.2018)

 

Tirhkohte 1:8      Nimahsela Thlarau Thianghlim chu in chunga a lo thlen hunah

thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang.

 Rom 8:14           Pathian Thlarau hruaia awm apiangte chu Pathian fate an ni si a”.

 TAWNGTAINA :

Founder/General William Booth (10 April, 1829 to 20 August, 1912) i.e 83.4.10 an kum zabi 20-na a thil hlauhawm lo thleng tur a sawite-

 1. Thlarau Thianghlim tellova Sakhuana (Religion without the Holy Spirit)

2. Krista tellova Kristianna (Christianity without Christ)

3. Simna tellova Ngaihdamna (Forgiveness without repentance)

4. Nun danglamna tellova Piantharna (Salvation without regeneration)

5. Pathian tellova Politics (Politics without God)

6. Hremhmun tellova Vanram (Heaven without hell)

 

Khawvel pumah hian religions 4200 (approx) vel an awm a.

 (http://www.worldometers.info/world-population/)

World population is 7.6 billion as of April 2018 according to the most recent United Nations Population Division estimates

 India (1.354 Billions) China : 1.415 Billions

1. Hinduism         - 82%                    2. Islam       - 12%

3. Christianity      - 2.5%                   4. Sikhism  - 2%

5. Buddhism        - 0.7%                   6. Jainism   - 0.5%

7. Zoroastrianism - 0.01%                 8. Judaism  - 0.0005%

9. Baha’-i Faith    -……..                   10. Others   -…………..

 World  

1.       Christianity (2.17 billion) i.e 31% of World (50% Catholic, 37% Protestant, 12% Orthodox, 1 % others)

2.       Islam (1.59 billion) i.e 23% of World (fastest religion)

3.       Nonreligious (Secular/Agnostic/Atheist) (1.13 billion)

4.       Hinduism (1.03 Billion) i.e 15% of World

5.       Buddhism 487 millions i.e 7% of World

6.       Chinese traditional religion (394 million)

7.       Primal-indigenous (300 million)

 1. THLARAU THIANGHLIM TELLOVA SAKHUANA

Sakhuana heti khawpa in anglo(diverse) ah hian keini Ringtute hi Pathian in leiah min dah a. Ama rawngbawl tur leh midangte pawh a ke bula hruai tura koh kan ni a. Kan hmabak hi a namai lo hle mai. Chu hmabak ko tak hmachhawn tur chuan kan mihring mihrinna chuan a tlin lova, a thei lo. Chutah chuan min puitu atan Thlarau Thianghlim pekin kan awm ta a. Chu chu Lal Isua Thawhleh atanga ni 50 na (fiftieth) Greek-Pentekost

Tirhkohte 1: 4-8 (Tin, an awm khawm a pawl ve a, “Jerusalem khua kalsan suh u, Pa thiltiam ka sawi in hriat kha lo nghak rawh u,” a ti tlat a. “Johana khan tuiin a baptis thin a, nimahsela ni rei lo tean Thlarau Thianghlimin baptisma in chang ang,” a ti a. Tin, anni chuan an rawn inkhawmin a hnenah, “Lalpa, tunah em ni Israelte hnenah ram i pek leh dawn?” an ti a, an zawt a. Tin, ani chuan an hnenah, “Pain a hun leh a ni, ama thu thua awma a ruat chu, nangni lo hriat tur a ni lo ve. Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti a.

 

Chu Pa thiltiam Thlarau Thianghlim tello chuan kan tunlai khawvelah hian sakhuana a kal nasa em em a. Keini Kristian ram ngei pawh min run mek a. Thlarau Thianghlim tellova, felna, zeina, finna leh thiamna hmanga Pathian rawngbawl mi tam tak an lo chhuak mek a.

Kan Mizo thlalaite zingah ngei pawh min luhchilh mek a. Keini Chhandamna Sipai/Thalaite hian Pathian Thlarau Thianghlim awmpuina nena thuk zawka Pathian rawng kan bawl hi ava tul tawh tak em!

           Thlarau Thianghlim tello sakhuana chuan Religious Pluralism (Sakhaw in tluk tlanna) a rawn hring chhuak mek a. Khawvel ram ropuite tunlai hian a tuam mek a. Kristian te an chungnung bik lo, Sakhaw hrang hrang hi kan intluk tlang vek a ni tiin mifing leh mithiamten an au pui mek a. He thil rapthlak tak lo thleng tur avang hian General William Booth a hi Thlarau Thianghlimin a lo hriatlawk tir a ni.

          Kristiante hi sakhaw dang nen kan inanglo mai nilovin, khaikhin chi pawh a ni chiah lo. Engvangin nge milem be ho nen kan in an ang? Ban sawm nei hmaa thingthi ho nen eng vangin nge kan in an ang. Kan inanlohna tam tak zingah I Lalte 18 A Elija leh Baal Puithiamte Van atanga mei ko thla tura an in beih khan Baal puithiamten theih tawpa an Pathian an kohva, chemte te, feitete a in zaithi zawih zawih chung pawhin an ko thla thei lova. Kristiante Pathian chu Elija chuan an ko ve ta Chang 37 naah chuan Pathian chuan mei a rawn tir ta a. Khawvel a sakhaw dang nen Kristiante hi kan in anglo mai ni lovin, Kan chung nung zawk em em a. Engkimtithei Pathian neitu kan ni tih hi kan in hriatnawn fo a ngai a ni.

          Pathian Engkimtitheia chu Thlarau Thianghlimin kan hnenah a awm a. Kan Bible Rom 8:14 a kan chhiar tak ang khan “Pathian Thlarau hruaia awm apiangte chu Pathian fate an ni si a”. Pathian Thlarau hruaiin kan awm em? Chu Thlarau Thianghlim duhdan chuan kan nung em?

Chu Thlarau Thianghlim kawllo, ringtu/Upa/Local Officer/Corps cadet/Junior Soldier kan nih chuan nakinah Pathian rorelna hmaah, khup tinreng kan thingthit hunah chuan a tlai tawh ang. Pathian hruaiin kan awm em, Thlarau Thianghlim kan nei em?  Thlarau Thianghlim tello sakhuana William Booth an a lo sawilawk ti hlawhtlingtu kan lo ni ve reng em? Mahni lo inzawt theuh ila.

 2. KRISTA TELLOVA KRISTIANNA

Krista kan tih hi a saptawng chuang ‘Christ’ tihna a ni mai a. Greek tawng “Χριστός, Christós”  awmzia chu “Hriak thih” (the anointed one) tihna a ni. General William Booth a hnenah hian Thlarau Thianghlimin a lo hriat lawk tir leh a. Pathian hriak thihna tello Kristianna hi thil hlauhawm tak a ni. A langa Kristian, a tak tak pawh si lova Kristian hming pu ve si hi kan ram ah pawh hian mi tam tak kan awm ta.

Zurui kawngsira let reng pawh hi “kristian I ni em?” tiin han zawt ila, “Aw ni e” kan ti thei ta vek mai. Mizoram ah 1894 atangin Kristianna hi a rawn lut a. Kum 124 chhung Kristianna in min chiah ta. Kristian kan inti ta thup mai. Naupang kan nih atangin nu leh pate kaihhruaina in kan inkhawm a. Form kan ha a, nalh takin Biak in lam kan pan sung sung mai. Kristianna chuan nasa takin kan society a luah a.  Kristianna/Krista nun tak tak pawh si lovin, kalphungah kan nei a. Kohhrana kan inhmanna leh kan thiltih that hmangin kan lo in muan ve sur sur a. Nun tak Krista nei si lo hian kan thla a lo muang ve ngawt ang tih hi thil hlauhawm tak a ni.

Kohhran/Corps ah chanvo pawimawh tak tak lo chelh ve tawh si, nun buai ru tam tak mizote zingah (Upa/Local Officer) pawh an awm ta. Mite ngaiha lo in hmuam up ve tawh lak lawh, mipui bek chhawn zawnga lo inti kohhran mi ve tawh lak lawh si. Vanram chabi kawllo nih chu thil hlauhawm tak a ni. Kan thiltih that laia thlamuang, tih that loh deuh a hlauthawng ringtu kan nih chuan in enlet na hun kan neih lai hian Pathian hnenah in hlan ang u.

Kristian lem/dazat, Pathian hriatna tak tak nei silo Biak in tinah hian kan thu teuh lawng maw? Keini Chhandamna sipaite pawh hi kan in enlet ava tul em? Krista thisen I kai tawh em? Thuthlung hlui hun (Exodus 12) ah chuan an chhungkaw him nan kawngka lu chungah emaw kawngka biangah emaw beramno thisen an tat a. An him thin a. Thuthlung thar hunah erawh chuan Beramno Lal Isua Krista thisen kaite chauh kan him dawn a. Ka kristianna/I Kristianna hi Krista thisen kai a ni em? Krista tello Kristianna hi setana thang hlauhawm tak a ni.

3. SIMNA TELLOVA NGAIHDAMNA

          Keini zanin a lo inkhawmte hi misual ngaihdam kal khawmte kan ni a. Pathian ngaihdamna changa Amah fak thei chauhte kan ni. Hun kal tawh ah eng sual pawh lo ti tawh mah ila, Pathian hnenah inchhira Alam kan hawi hun hunah Pathian ngaihdamna kan chang thei a. Hun kal tawha kan sualte theihnghilha, hun lola awm tura Sima Pathian tana kan inhlan chuan Pathian hian min la pawmin, min la ngaidam duh em em a ni.

Piangthar rei tawh, Pathian rawngbawl hrep tawh leh zanin a piangtharte hi Pathianin kan hlawh tur vanram min siam sak vek a.

 Matthaia 20:1-16 Grep huan inhlawhfate nikhata duli hlawh tura inrem thu-

(i)           Fehreh san                        (ii)   Chawfak hun leh Behliang mun hun

(iii)        Pahmei zanriah chhum    

 Heng inhlawhfa te ang hian kan chan tur Pathianin vanram min ruatsak vek a ni.

           Mahse, kan nun hlui sualte kalsan loh va/simna kan neih loh chuan Pathian thinurna kan hmabak a ni. A ruka zakkep nei reng chung, alang a mawi ringawt kan mihringpuite mit hmuha lem kan chan chuan kan chan tur chu rapthlak tak a ni ang. Pathian hian sual a ngaidam lova, sual sim te chauh a ngaidam thin tih hi kan hriat nawn a mamawh a ni. Pathian ngaihdamna chu misual sim ten an chang thin.

 4. NUN DANGLAMNA TELLOVA PIANTHARNA

          Piantharna chu Lal Isua Krista Lal leh chhandamtu a kan pawm a, kan nuna kan sengluhna hi a ni a. Chu piantharna in automatic a a ken tel chu nun danglamna a ni.

          Tunlaiin Camping/Crusade kan ti a, mi tam tak kan piangtharin, Pathian hnenah kan inhlan a. Mahse chu kan inhlanna chuan kan nun a tidanglam pha leh tlat silo.

          Nun danglamna lanchhuahnate chu

(i)           Zu in thin chuan a zu in a sim ngei ngei tur a ni. A thian hlui ten zu leh sa in thlem mahse, Lal Isua neitu a nihna a lan chhuah tir tur a ni.

(ii)          Corruption/Hlepruk ching thin chuan, tuma hriatpui loh a ruka hlep ruk tur a hmuh pawhin Lal Isua Krista neitu a nih tawh chuan a nun a tidanglam tur a ni.

(iii)        Nulat tlangvalna, Hurna/lerhna sual hmanga setana’n a thlem hunah Lal Isua Krista neitu chuan danglam a nei ngei ngei tur a ni. Hei hi kan sawi zau lawk- Tunlai khawvelah social media facebook/whatsapp/instragram/twitter etc kan hmang nasa em em a. Pitar/Putar/ Nu leh pa leh thalai/naupang te te pawhin account kan nei a. Smartphone kan hum firfer tawh a. Hei hi setana’n a hmang nasa em em a ni.

Kan Smartphone/Tablet/Computer te, social media a kan account te hi Pathian hnenah hlan thin tur a ni. Social media kaltlanga uirena/nupa inthenna a nasa em em a ni.

(iv)         Social media te hi Pathian thu puan chhuah na platform tha takah nang leh kei hian kan hmang thei. Helai pulpit ah hian thusawina hun kan chang kherlo thei/ chang pawh ni la mi 100 vel zinga thusawi kan nimai. Mahse, social media ah chuan Pathian thu kan puanchhuahte hi mi tam tak hnen a thleng thei asin. A tha zawngin kan hmang thei a. Kan kutah a in nghat. Khawvel zaithiam hmingthang Cliff Richard “Why should the Devil have all the good music” a tih ang hian keini Chhandamna sipaite, thalai (SAY) te hian “Why should the Devil have all the social media” kan ti ve dawn lawm ni.

Chuvangin kan pianthar avanga kan nun danglamna hi khawihmunah pawh kan lanchhuah tir dawn lawm ni. Kan piangthar tawh a ni tih hi kan school/college/office/dawr/hnathawhna hmun hrang hrangah hian kan tilang dawn lawm ni.

 5. PATHIAN TELLOVA POLITICS

          Politics thil thleng tur lamah pawh William Booth a hian hriattirna a lo dawng advance khawp mai. Kan corps hi kan vannei a, Mizoram a party liana mi tangkai tak takte kan kawl nual a. Politics field a zuang lut ve kher lo pawh hi inthlan dawnah chuan Politics in min chiah anga, eng party candidate emaw ber chu kan la vote ngei a ngai dawn. Chuti chu politics ah chuan kan tel ngei ngei dawn a nih chu. Kan Bible zirtirna a thil pawimawh tak kan hmuh chu kan mihring puite, kan thenawm khawvengte, kan kohhran/corps a kan thawh hona boruak tha siam hi a ni a, chu chu politics pakhat ani.

           Kan nun kan hmanna kawng tinrengah Pathian hi kan dah hmasak a pawimawh a. Buaina, harsatna, lungngaihna, hlimna engpawh tawk ila Pathian nen zel ni se. A bikin kan corps chhung a politician te khan min lo chhinchhiah sak se. Kan ram inrelbawlnaah, kan rorelnaah Pathian duhzawng, Pathian lawmtlak politics kan kalpui a pawimawh a ni. Kumin inthlan kum te a ni bawka Politics inchirh thena a lang chho leh tan mek a. Hengah hian Pathian neitu kan nihna tih lan hram hram ava tul em!

          Israel mipui nuai tam takte enkawl turin Solomona chu Pathianin a thlang a. Puithiam Zadoka kaltlangin hriak a thih a (I Lalte 1:39). Pathian tanpuina in Israel te rorelsak turin Politics ah a zuanglut a. I Lalte 3:8-13 “I chhiahhlawh hi mite i thlanho, mi tam tak, an tam avânga chhiar sen rual loh leh, a zat hriat sen rual lohte zingah hian a awm a ni a. Chutichuan i mite rorêlsakna tûrin i chhiahhlawh hi hriatna thinlung pe ang che, a chhia leh a tha ka thliar theih nan; i mi heti zozai hi tuin nge rorêlsak thei ang le?" a ti a. Tin, Solomona’n chu thil chu a dil avângin, chu thu sawi chuan LALPA a tilawm hle mai a. Tin, Pathianin a hnênah, "Nangin i tan dam reina dil lova, hetiang hi i dil zawk avâng leh, i tan hausaknate pawh dil lova, i hmêlmate thihna pawh dil lova, i tan rorêl thiamna i dil zawk avângin, ngai teh, i dil ang chuan ka ti ta a: ngai teh, finna leh hriatna thinlung ka pe a che; tichuan i hmaah nangmah ang rêng rêng tumah an awm lo va, i hnuah pawh nangmah ang rêng rêng chu tumah an lo awm tawh hek lo vang. Tin, i dil loh, hausakna leh ropuina pawh ka pe bawk ang che; tichuan i dam chhûngin lal zingah chuan nangmah ang rêng rêng an awm lo vang.”

         Pathian nena ram rorelna hnathawh chu a hlawk a. Chuvangin Pathian tel ngeiin Politics khelh tur a ni.

 6. HREMHMUN TELLOVA VANRAM

          Vanram chanchin hi kan sawi fo thin a. Pathian ringtu, Isua chu Lal leh chhandamtu a pawm tute kalna tur tih chu kan hre tlangpui a. Mahse, Hremhmun hian sawi a hlawh lovin, a hlauhawmzia phei chu kan sawi tam lo khawp mai. Sakhaw thenkhat Hremhmun sawi bo pawlte pawh an awm tan mek a ni.

          Matthaia 7:13-14 “Kawngka zimah chuan lut rawh u; boralnaa kalna kawngka (hremhmun) chu a zau va, a kawng pawh a zau bawk a, chu mi lama lut chu tam pawh an tam hle a ni; nunnaa kalna kawngka (Vanram) chu a zim a, a kawng pawh a chep bawk a, a hmutute pawh tlemte an ni.”

           Helai Bible changah hian kawng hnih chiah duhthlan tur kan nei a chu chu Boralna kalna kawng (hremhmun) leh Nunna kalna kawng (Vanram). A bak kawng dang a awm lova, Vanram kawng kan zawh loh chuan hremhmun lam pan kan ni tihna a ni a.

Luka 16:19-31 Mi hausa, engkim neia ropui tak Mahse Lal Isua nei lo leh Mi rethei, kutdawh Lazara, mi hausa kawngka bula mu thin, mi hausa pa dawhkana ei nawi tla te lo ei ve thin chu an han ti ta ve ve a. Vanram leh hremhmun ah an awm ta.

Hremna/Mei/Boralna tih sawina hi Bible ah hmun hrang hrangah kan hmu a

Thuthlung Hlui:  II Lalte 23:10                  II Chronicles 28:3                    II Chronicles 33:6          

Thuthlung Thar: Mathaia 10:28                 Philipi 3:19;          I Thessolonika 5:3         

II Thessolonika 1:9         II Peter 3:7

 Mathaia 10:28 “Tin, taksa tihluma thlarau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zawk ang che u.”

 II Thessolonika 1:9 “Pathian hrelo mi leh kan Lalpa Isua Chanchin Tha awih lo mite chuan hrem an tuar ang, Lalpa hnen ata leh a chakna ropuina atanga chatuana boralna chu.”

 TLANGKAWMNA :

Thuthlung hlui (Numbers 21) kan en chuan Israelten Pathian leh Mosia kalha an phunnawi khan Lalpan an mahni hremna atan rul chuk na mi a tir a. Rul khan Israel mi tam tak a chuk a, an thi a. Lalpan chung rul chuk ho an damna turin Mosia hnenah Rul lem chu banah khai kang turin a ti a. Rul chuk en apiang chuan damna an chang ta a. Mosia Rul khai kan en duhlo chu an thi ang khan, Thuthlung thar hunah chuan kan damna turin Lal Isua Krista Krawsah min khai kan sak a. Lal Isua lam enduh apiangte chuan Vanram kan chang dawn a. Lal Isua Kraws en duh lote chuan chatuan Hremhmun an chang dawn a ni.

 Johana 14:6 “Isuan a hnenah, "Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo.”

Pa hnen, Vanram kan thlenna turin Lal Isua (Nunna buah) kan hming a chuang tawh em?

          Matthaia 7:21-23 “" 'Lalpa, Lalpa' mi ti nazawng chu vanramah an lut lo vang a; ka Pa vana mi duhzawng titu erawh chu an lut ang. Chu mi niah chuan mi tam takin, 'Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti thin lo vem ni,' an la ti ang. Chu mi hunah chuan, 'Nangni thil sual tite u, ka hre ngai lo va che u, ka hnen ata kal bo rawh u,' tiin anni chu ka la hrilh ang.”

          Pathian rawng hi nasa takin kan lo bawl ve anga, Pathian hmingin thil mak tam takte tiin, ruahsur hnuaiah te inkhawm kan lo taima ve em em si anga, mahse “ka hre ngai lova che u, ka hnen ata kal bo rawh u” a tih zingah hian kan lo awm ve loh nan kan damchhung hian kan duhthlanna hmanga Lal Isua Krista hi Lal leh chhandamtu a kan thlan fel a ngai a ni.

          Keini pawh chatuana Vanrama Pathian nena kan lendun theuh theih nan kan za in Lalpan kan thusawite mal min sawm sak rawh se. Amen!