*"Ka beramten ka âw an hre ṭhin, kei pawhin anni chu ka hria, anni chuan mi zui ṭhin; an hnenah chatuana nunna ka pe a; kumkhuain an boral lo vang a, tuman ka kut ata mi chhuhsak hek lo vang."* Johana 10:27-28
Lal Isuan rawng a bawl laiin thilmak tam tak tiin mipuiin an zui a. Juda hovin a thilmak tih an hmu chungin an ring thei lo.
"Ka hrilh ka hrilh chung che u pawhin min awih lova, ka beram zinga mi innih loh avang a nih kha" tiin Isuan he Bible chang Johana 10:27-28 hi a sawi zui ta a.
Isua hunlaia amah zuitu, a thilmak tih hmutu, thilmak tih avang leh a thusawi ngaihthlak duh avanga zuitu tam tak an awm chung hian Lal Isua thusawi (aw) hi an hre fiah theilo. An man lo. A chhan chu a beram zinga mi an nih loh avangin.
Tunlai ringtu tam tak pawh hi, Lal Isua ringtu, zuitu, a rawngbawl hna chhunzawm kawngah pawh ṭhahnemngai em em, thilpek leh kohhran rawngbawlnaah pawh thawhhlawk tak, mahse, Isua aw hre ngailo leh Isua pawn an aw a hriat ngaihloh kan awm a ngem? Mahni ṭheuh lo in chhût ila.
Amah Isua ngeiin, _"Ka beramten ka aw an hre ṭhin, kei pawhin anni chu ka hria, anni chuan mi zui thin;_ a tih zingah hian kan tel em? Isua aw kan hre ngai em? Kan zui tak tak em? Engtia rei nge Isua aw hrelo hian kan lo awm tawh?
Isua âw kan hriat ngailohna chhan leh kan hriat theihlohna chhan ṭhin chu zawlnei Isaia hian *Isaia 59:2 (MKJV)* _"Pathian laka tihrangtu che u chu insualna hi zu nia; In laka a hmêl hliahtu pawh in sualna bawk hi a ni, Chuvangin, in aw pawh a hre theilo a nih hi."_ tiin alo sawi reng a. Pathian laka min ti hrangtu, a hmel hliahtu hi keimahni sualna leh dawngdahna, inthlah dahna alo ni fo ṭhin.
Petera engtin nge *"Ar khuang mai maiah"* pawh Isua aw a hriat theih kan tih chuan Isua nen an inbe ṭhin a. Ar alo khuan khan Isua aw alo hre thar thei a ni.
Lal Isua aw hria a, a biak ṭhin ni tur hian Amah nen inkungkaihna neiin Isua hi i hnaih hmasa ila, a nin min hnaih anga. Kan aw kan inhre pawhin Amah nen kan inbia anga.
Amah Lal Isua zarah rawngbawltu thiltithei, rawngbawltu nung leh rawngbawltu hlawhtling kan lo ni dawn a ni.
Lal Isuan ngeiin "Ka âw hre ṭhin, an âw pawh ka hriat ṭhin ringtute chu chatuana nunna ka pe anga. Tumah an boral lovanga, ka kut ata pawh tuman (setana leh a tirhkohten) min chhuhsak hek lovang" a ti a ni. Ava thlamuan thlak em!
Tirhkoh Paula'n Hebrai 12:1 _"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin....."_ ti a min fuih ang hian dah tur, paih ṭhen turte paih in, Lal Isua âw hre tur hian ṭan ila thar ang u.
*Lalpan malsawm rawh se.*
No comments:
Post a Comment