RINGTUTE CHAKNA

“Vawiin ni hi kan Lalpa tana ni thianghlim a nih hi, lungngaiin awm suh u; Lalpa chunga lawmna chu in chakna a ni si a”

Nehemia 8:10

“Khawvelah lawmna a kin fo,
A nawmna pawh a tawp;
Kumkhaw lawmna dang a awm lo,
Lal Isua fak loh zawng.”

 “Aw Thlarau Thianghlim, lokal la” tih hla mawi tak, Pathian Biakna a kan sak zin pawl tak hi kan ngaihtuah ngai em? Kan sa fo thin a, a hla thuin engnge min hrilh a tum le!

Khawvela awm nang leh kei hian hlimna kan zawng a, nawmna kan zawng a. Chu kan zawn chu khawvelin min pe thei emaw tiin, khawvel kan tlir a. Lawmna leh hlimna min petu ni a kan ngaih lamah kan han tlan a. Mahse, chu chuan a tawpa tahna, lungngaihna ruamah min hruailut thin a nih hi. Khawvel ropuina leh hausaknate hian kan hlimna leh lawmna min pe thei nita se, mi hausa, duh duh leh thei, in leh lo ropui tak tak neite hi an va awhawm bik awm ve. Mahse, chung milian, hausa tak takte chuan an lo kawl vek bik hauh lo mai.

Chuti chu khawiah chuan nge kan zawn hlimna leh lawmna chu a awm tak? Nang leh kei, Lal Isua neitute hian chu chu kan kawl reng a ni. Chu kan kawl hlu tak chu a hlutna kan hriat theih lohna turin setana hian thlir loh tur khawvel lam min thlir tir a. Kan chanvo ropui tak  leh kan dinhmun kan lo hrelo thin a ni. Chutia kan chanvo hmu theilo tur chuan kan chantawka lungawilohna (duhamna) hmangin tupawh mai hi setana bumna hmanga sal kan ni a. Chu setana bumna laka chhuak tur chuan Lal Isuan nang leh kei hi min duh a ni.

Kan hlim chuan khawvel a mi awhawmber dinhmun chu kan ta a lo ni reng si a. Chu tak chu kan ringtu nun kawngah pawh hian kan chakna tur a lo ni. Lal Isua a kan lawm tlatna hi thlemna kan hnehna, setana leh a hnathawh kan rahbehna tha ber pakhat a ni.

Joba nun te hi ava ropui take em! A fate, leh a thil neih zawng zawng laksak a nih pawhin Pathian laka vui lovin Pathian hnenah lawmthu a sawi zel a. Setana’n a nunah tihtheih a nei lo. Joba 42:12-17 kan en chuan, Joba’n Pathian a hnaih tlat rah leh Pathiana a lawm zel rah sengin Pathianin a let tam takin malsawmna a vur a. Kum 140 damin, Tar khup bih a nih thlengin a dam hunchhun a tise ta a ni.

Kum khaw lawmna dang a awm loh zia hre tur hian tih mangan a kan awm chang a awm thin a. Mahse, chung hunah pawh chuan Pathian kan fak a, Pathian kan hnaih tlat chuan Pathian hnen ata malsawmna kan dawng thin dawn a ni. Pathian hnaih tlat la, Amah chu fak tlat la. Setana’n ruksak che a tum I chanvo ropui tak kha nei let leh rawh le.

Lalpan malsawm che rawh se. Amen