He film hmuhnawm tak hi puitling leh naupang tan pawh a hmuhnawmin
ennawn a ninawm loh viau mai. He film hi Columbia Pictures in an produce a ni
a. Director chu Harald Zwart a ni a. Robert Mark Kamen a thawnthu ziah behchhan
a chan a ni.
He filmah hian kan hriat leh kan hmuh angin khawvel Hollywood star
ropui Hongkong martial artist ropui Jackie Chan leh Will Smith a fapa Jaden
Smith a te in zui phenah hian thawnthu ngaihnawm tak a awm.
He film chan hunlai (2010) hian Jaden Smith (Movie nick name ‘Dre’)hi
kum 12 mi a ni a. A boss Jackie Chan (Movie nick name ‘Mr. Han’) hi kum 56 mi a
ni thung. (Dre leh Mr. Han tiin kan sawi chhunzawm tawh ang)
Tunah chuan kan
sawi tumah lut dawn tan tawh ila.
He movie ah hian
Dre a hi Mr. Han a hnenah Real Kungfu zir turin ava kal a. Chuta a lesson
hmasaber hi a pawimawh lai chu a ni.
Mr. Han a tualzawl Drea ava thlen chuan a jacket chu chhuatah a paih
thlawrh a. Chu tak chu Mr. Han hian a lo hmu khiau mai. A jacket chu la a,
abanna ah bang turin a hriattir a. Chu ringawt chu vawi sangchuang, ni tam tak
chhung a tih nawn tir a. Dre a pawhin a ningin, a pumpelh dan a zawng thin a.
Mahse, Mr Han a chuan chu bawk chu a tih nawn tir a. Ruah sur hnuaiah pawh a
tih ngai chu a ti nawn tluk tluk mai a ni. Chutia rei tak ‘Jacket phelh,
chhuata paih, a banna a ban’ an tih tlauh tlauh hnu chuan chu an thil nin em em
ah chuan ‘Thuawihna’ leh a zir tum ber ‘Real Kungfu’ a lo inzepru reng a ni tih
Mr. Han a chuan an hrilhfiah ta a.
An zir tum tak Real Kungfu an luh chilh ta a. Taima tak leh rinawm
taka Mr. Hana enkawlna hnuaia a train tlauh tlauh hnuah chuan a tawpah
tournament ropui takah chawimawina ‘Nopui’ a chawi thei ta a ni.
He movie ka en laia ka rilru hneh em em tu chu- Pathian hnungzui tur
leh a rawngbawl tur hian kan nin em em leh kan tihpeihloh kan lo tih talh talh
a tul a. Chu chu kan mihring mihrinna hian a peihlo fo thin a. Peihlo chung
chunga Dre an Mr. Han a thu a awih ang hian keini pawh hian kan Boss Pathian
thu kan awih hram hram a- Bible chhiar, Tawngtai leh Inkhawmte adt. a taimak
kan chhuah deuh deuh hi kan tan a lo tha hle dawn a ni. Dre an thuawihna a
zirchhuah hnuah, Real Kungfu hmanga chawimawina a dawng ang hian, keini pawh
Pathian thuawih kan zirchhuah hnuah malsawmna kan hmaah chhawp sakin kan awm chauh
alo ni.
Isua sipai rinawm ni tura ‘Chhandam
tura Chhandam’ sipaite hian Lal Isua hi vawi tam tak kan rinawmloh sanin,
kan tluk san fo thin. Kei ngei pawh ka ni. Mahse, kan tlukna a kan thut reng
chuan kan tum ram (Vanram) kan thleng thei dawn si lo. Kan dinhmun theuh chu
keimah nin kan hre ber a. Pathian hlatah nge kan awm em? Pathian kan bo san mek
em? Kan dinhmun theuh atang hian Pathian i pan ila, i hnaih sauh sauh ila. A
thuawihna nen a hnung kan zui chuan a tawpah Tournament ropui (Rorelna ni) ah
Chawimawina ‘Nopui’ kan chawi dawn a ni.
Lalpan malsawm rawh se.
Pathianthu
innghahna :
I Korinth 9:25
“Tin, intihsiaknaahte chuan a bei talh talh
apiang chu engkimah an insum thin a ni. Anni zawngin lallukhum chhe thei hmu
turin an bei a, keini erawh chuan lallukhum chhe thei lo hmu turin.”
Thupuan 2:10
“Thih thlengin rinawmin lo awm rawh, tichuan
nunna lallukhum ka pe ang che.”
No comments:
Post a Comment